പീഡന പരാതി ഒതുക്കി തീര്ക്കാന് ശ്രമം; മന്ത്രി എ കെ ശശീന്ദ്രനെതിരെ നടപടി ആവശ്യപ്പെട്ട് ഗവര്ണര്ക്കും വനിതാ കമ്മീഷനും പരാതി നൽകി യൂത്ത് കോണ്ഗ്രസ്
പീഡന പരാതി ഒതുക്കി തീര്ക്കാന് ഇടപെടല് നടത്തിയ മന്ത്രി എ കെ ശശീന്ദ്രനെതിരെ നടപടി ആവശ്യപ്പെട്ട് ഗവര്ണര്ക്കും വനിതാ കമ്മീഷനും പരാതി നല്കി. യൂത്ത് കോണ്ഗ്രസ് സംസ്ഥാന സെക്രട്ടറി അഡ്വ. വീണ എസ് നായരാണ് പരാതി നല്കിയത്. കേരളത്തില് സ്ത്രീകള്ക്കെതിരെ അതിക്രമങ്ങള് കൂടിവരുന്ന സാഹചര്യത്തില് സംസ്ഥാനത്തെ ഒരു മന്ത്രി തന്നെ സ്ത്രീ പീഡന കേസ് ഒതുക്കി തീര്ക്കാന് ശ്രമിക്കുന്ന അപൂര്വങ്ങളില് അപൂര്വമായ കാഴ്ചയാണ് ഇന്ന് കേരള സമൂഹം കണ്ടതെന്ന് പരാതിയില് പറയുന്നു. ചാനലുകള് സംപ്രേഷണം ചെയ്ത ശബ്ദരേഖയുടെ ടേപ്പ് അടക്കമാണ് പരാതി നല്കിയിരിക്കുന്നത്.
ഗവര്ണര്ക്ക് നല്കിയ പരാതി കൊല്ലത്തെ പ്രാദേശിക എന്സിപി നേതാവിന്റെ മകള്, ജി പത്മാകരന് എന്ന വ്യക്തിക്കെതിരെ നല്കിയ സ്ത്രീ പീഡന പരാതി ഒതുക്കിത്തീര്ക്കാന് പ്രേരിപ്പിച്ച മന്ത്രി എ.കെ ശശീന്ദ്രനെ മന്ത്രിസഭയില് നിന്നും പുറത്താക്കാന് മുഖ്യമന്ത്രിക്ക് നിര്ദേശം നല്കണമെന്ന് അഡ്വ. വീണ എസ് നായര് ഗവര്ണര്ക്കു നല്കിയ പരാതിയില് ആവശ്യപ്പെട്ടു. ഒരു മന്ത്രി തന്നെ സ്ത്രീപീഡന പരാതി ഒതുക്കി തീര്ക്കാന് ശ്രമിക്കുന്നത് കേട്ട് കേള്വിയില്ലാത്തതും ഇന്ത്യന് ഭരണഘടന മുന്നോട്ടു വയ്ക്കുന്ന മൂല്യങ്ങള്ക്കും എതിരാണ്. ധാര്മികമായും നിയമപരമായും ഈ മന്ത്രിക്കു തല്സ്ഥാനത്തു തുടരാന് അവകാശമില്ല. സംസ്ഥാനത്തെ സ്ത്രീകളുടെ ആകെ അഭിമാനം ഉയര്ത്തിപ്പിടിക്കാന് മന്ത്രിയെ പുറത്താക്കാന് ഗവര്ണര് മുന്കൈ എടുക്കണമെന്നും കത്തില് ആവശ്യപ്പെട്ടു.
https://www.facebook.com/Malayalivartha
