കഴിഞ്ഞ മന്ത്രിസഭയിലും ആദ്യഘട്ടത്തില്‍ മന്ത്രി എ.കെ. ശശീന്ദ്രന് പൊല്ലാപ്പ് തന്നെയായിരുന്നു. മംഗളം ചാനല്‍ ഒരുക്കിയ ചാനല്‍ കെണിയില്‍ മന്ത്രിയും ചാനലും ഒരുപോലെ വീഴുകയായിരുന്നു. അവസാനം മന്ത്രിക്ക് രാജി വയ്‌ക്കേണ്ടിയും ചാനലുകാര്‍ക്ക് അറസ്റ്റ് നേരിടേണ്ടി വരികയും ചെയ്തു. അവസാനം കെട്ടിപ്പൊക്കിയ ചാനല്‍ റേറ്റിംഗ് തകര്‍ന്ന് തരിപ്പണമാകുകയായിരുന്നു. ഇപ്പോള്‍ മറ്റൊരു കേസാണ് ഉയര്‍ന്നു വന്നിരിക്കുന്നത്. ഇതും ശക്തമായാല്‍ മന്ത്രിസ്ഥാനത്തിന് ഭീഷണി തന്നെയാണ്.

കുണ്ടറ സ്വദേശിനിയായ യുവതിയെ എന്‍.സി.പി നേതാവായ ഹോട്ടല്‍ ഉടമ അപമാനിച്ചെന്ന പരാതി ഒത്തുതീര്‍പ്പാക്കാന്‍ മന്ത്രി എ.കെ. ശശീന്ദ്രന്‍ ഇടപെട്ടെന്ന് ആരോപണം. പാര്‍ട്ടി നിര്‍വാഹക സമിതി അംഗമാണ് ആരോപണ വിധേയന്‍. വിഷയം പരിഹരിക്കണമെന്ന് യുവതിയുടെ പിതാവിനോട് മന്ത്രി ഫോണില്‍ ആവശ്യപ്പെടുന്നതിന്റെ ശബ്ദരേഖ പുറത്തുവന്നിട്ടുണ്ട്. എന്‍.സി.പി ബ്ലോക്ക് ഭാരവാഹിയാണ് യുവതിയുടെ പിതാവ്.

പെണ്‍കുട്ടി പറയുന്നത്, കഴിഞ്ഞ മാര്‍ച്ച് 6ന് കുണ്ടറയിലെ പത്മാകരന്റെ ഹോട്ടലിന് മുന്നിലൂടെ പോകവേ, 'ബി.ജെ.പിക്കാരീ ഇങ്ങോട്ട് വാ' എന്നുപറഞ്ഞ് അകത്തേക്ക് വിളിച്ചു. കൈയില്‍ കയറിപ്പിടിച്ചു. ആ ദിവസങ്ങളില്‍ പരാതി നല്‍കാന്‍ കഴിഞ്ഞില്ല. ജൂണ്‍ 28നാണ് കുണ്ടറ സ്‌റ്റേഷനില്‍ പരാതി നല്‍കിയത്. പൊലീസ് കേസെടുത്തില്ല. കാരണം സ്‌റ്റേഷനില്‍ നിരന്തരം അന്വേഷിച്ചതോടെയാണ് പിതാവിനെ ഈ മാസം 4ന് മന്ത്രി ഫോണില്‍ വിളിച്ചത്.

യുവതി കഴിഞ്ഞ പഞ്ചായത്ത് തിരഞ്ഞെടുപ്പില്‍ ബി.ജെ.പി സ്ഥാനാര്‍ത്ഥിയായി മത്സരിച്ചിരുന്നു. കാശ് വാങ്ങിയാണ് ബി.ജെ.പി സ്ഥാനാര്‍ത്ഥിയായതെന്ന് ആരോപിച്ച് നവമാദ്ധ്യമങ്ങളില്‍ അപമാനിച്ചതായും യുവതി പരാതി നല്‍കിയിട്ടുണ്ട്. അന്വേഷണം നടന്നുവരികയാണെന്ന് കുണ്ടറ പൊലീസ് പറഞ്ഞു. കേസെടുത്തിട്ടില്ല.

അതേമയം രാഷ്ട്രീയ ഗൂഢാലോചനയെന്ന് പരാതിക്ക് പിന്നിലെന്ന വാദവും ഉയര്‍ന്നിട്ടുണ്ട്. യുവതിയുടെ പിതാവിനെ അടുത്തിടെ കൊലപാതകശ്രമ കേസില്‍ റിമാന്‍ഡ് ചെയ്തു. ഇങ്ങനെയുള്ളവരെ പാര്‍ട്ടി സ്ഥാനങ്ങളില്‍ തുടരാന്‍ അനുവദിക്കരുതെന്ന് പാര്‍ട്ടി കമ്മിറ്റിയില്‍ താന്‍ നിലപാടെടുത്തതായി ജി. പത്മാകരന്‍ പറഞ്ഞു. ഇതിന്റെ പ്രതികാരമാണ് പരാതി. യുവതി പരാതി നല്‍കിയതിന്റെ തൊട്ടടുത്ത ദിവസം സംഭവത്തിന്റെ നിജസ്ഥിതി അന്വേഷിക്കണമെന്ന് ആവശ്യപ്പെട്ട് താനും പൊലീസില്‍ പരാതി നല്‍കി.

ഹോട്ടലിലെയും നേരെ എതിര്‍വശത്തെ പൊലീസ് സ്‌റ്റേഷനിലെയും സി.സി ടിവി ദൃശ്യങ്ങള്‍ പരിശോധിക്കാം. ഏത് അന്വേഷണവും നേരിടാന്‍ തയ്യാറാണെന്ന് ജി. പത്മാകരന്‍ പറഞ്ഞു.

അതേസമയം യുവതിയെ അപമാനിച്ച പരാതിയില്‍ എന്‍.സി.പി സംസ്ഥാന നിര്‍വാഹക സമിതി അംഗം ജി. പത്മാകരനെതിരെ കുണ്ടറ പൊലീസ് കേസെടുത്തു. ഇന്നലെ വൈകിട്ട് പെണ്‍കുട്ടിയുടെ മൊഴി രേഖപ്പെടുത്തിയ ശേഷം സ്ത്രീകളുടെ അന്തസിന് കോട്ടം വരുത്തല്‍, ശല്യം ചെയ്യല്‍ എന്നീ വകുപ്പുകള്‍ ചുമത്തിയാണ് കേസെടുത്തത്.

അതേസമയം മന്ത്രി എ.കെ. ശശീന്ദ്രന്റെ പ്രതികരണവും വന്നു. പാര്‍ട്ടി പ്രശ്‌നമാണെന്ന് കരുതിയാണ് ഇടപെട്ടത്. വിഷയം മനസിലായപ്പോള്‍ സംഭാഷണം അവസാനിപ്പിച്ചു. പിന്നീട് ഇടപെട്ടിട്ടില്ല എന്നാണ് മന്ത്രി പറഞ്ഞത്.

പരാതിക്കാരിയെ നേരില്‍ കണ്ടിട്ടു പോലുമില്ലെന്ന് എന്‍.സി.പി നിര്‍വാഹക സമിതി അംഗം ജി. പത്മാകരന്‍ പറഞ്ഞു. സംഭവത്തിന് പിന്നില്‍ പാര്‍ട്ടിക്കുള്ളിലെ ചില പ്രശ്‌നങ്ങളാണെന്നും മന്ത്രി പറഞ്ഞു.