പ്രധാനമന്ത്രി നരേന്ദ്ര മോദിയുടെ എളിമയെ പുകഴ്ത്തിയ സംവിധായകന്‍ പ്രിയദര്‍ശൻ രംഗത്ത് എത്തുകയുണ്ടായി. എന്നാൽ അദ്ദേഹത്തോട് കുരുക്ക് കൊള്ളുന്ന ചോദ്യവുമായി നടന്‍ ഷമ്മി തിലകന്‍. സ്വയം കുടപിടിക്കുന്നത് ലാളിത്യമാണെങ്കില്‍ കാര്യസ്ഥന്മാരെക്കൊണ്ട് കുട പിടിപ്പിക്കുന്ന സൂപ്പര്‍താരങ്ങള്‍ ഏത് ഗണത്തില്‍പ്പെടും എന്നാണു ഷമ്മി തിലകന്‍ തന്റെ ഫേസ്‌ബുക്ക് പോസ്റ്റിലൂടെ ചോദിച്ചത്.

മഴയത്ത് സ്വയം കുടപിടിച്ച്‌ പാര്‍ലമെന്റിലേക്ക് എത്തി മാധ്യമങ്ങളെ കാണുന്ന മോദിയുടെ ചിത്രം പങ്കുവച്ചായിരുന്നു പ്രിയദര്‍ശന്‍. 'പ്രധാനമന്ത്രിയുടെ ഈ എളിമയെ താന്‍ അഭിനന്ദിക്കുന്നു' എന്നാണ് അദ്ദേഹം പ്രതികരിച്ചത്. ഇതിനെ പരോക്ഷമായി വിമര്‍ശിക്കുന്നതാണ് ഷമ്മി തിലകന്റെ ഫേസ്‌ബുക്ക് പോസ്റ്റ്.

'സ്വയം കുടപിടിക്കുന്നത് ലാളിത്യമെങ്കില്‍, സഹജീവികള്‍ നോക്കിനില്‍ക്കേ നട്ടുച്ചക്കും നട്ടപ്പാതിരയ്ക്കും കാര്യസ്ഥന്മാരെക്കൊണ്ടത് പിടിപ്പിക്കുന്ന സൂപ്പര്‍താരങ്ങളൊക്കെ ഏതു ഗണത്തിലാ പെടുക..?', എന്നാണ് താരം കുറിച്ചത്. താരത്തിന്റെ പോസ്റ്റിനു വന്‍ സ്വീകരണമാണ് ലഭിക്കുന്നത്. ഷമ്മി തിലകന്‍ ഉദ്ദേശിച്ചത് മോഹന്‍ലാലിനെയും മമ്മൂട്ടിയെയും അല്ലേ എന്ന ചോദ്യങ്ങള്‍ കൊണ്ട് ഷമ്മി തിലകന്റെ കമന്റ് ബോക്സ് നിറയുകയാണ്.

അതോടൊപ്പം തന്നെ ഇതേ വിഷയത്തില്‍ പ്രധാനമന്ത്രിയെ അഭിനന്ദിച്ച്‌ കേന്ദ്ര സഹമന്ത്രി വി. മുരളീധരനും രംഗത്തുവന്നിരുന്നു. മുഖ്യമന്ത്രി മുതല്‍ പഞ്ചായത്ത് പ്രസിഡന്റ് വരെ കുട പിടിക്കാന്‍ സേവകരെ വയ്ക്കുന്ന കാലത്ത് സ്വയം കുട ചൂടി വന്ന ഇന്ത്യന്‍ പ്രധാനമന്ത്രി ചരിത്രത്തിലെ അപൂര്‍വ കാഴ്ചയാവുകയാണെന്ന് മുരളീധരന്‍ പറഞ്ഞു. തൊഴിലാളിവര്‍ഗത്തിന്റെ പ്രതിനിധിയെന്നവകാശപ്പെടുന്ന മുഖ്യമന്ത്രിക്കു പോലും ജീവിതത്തില്‍ ഈ ലാളിത്യം പുലര്‍ത്താനാവില്ല എന്നും മുരളീധരന്‍ കൂട്ടിച്ചേര്‍ത്തു.