ഒരാഴ്ച മുൻപ് തിരുനക്കരയിൽ നിന്ന നിൽപ്പിൽ തമിഴ്‌നാട് സ്വദേശിയുടെ ബാഗ് പരിശോധിച്ച പൊലീസ് ഞെട്ടി..! ബാഗിനുള്ളിൽ കണ്ടത് ഉയർന്ന മാർക്കിന്റെ ഉന്നത ബിരുദത്തിന്റെ സർട്ടിഫിക്കറ്റ്. ഒരാഴ്ചയായി തിരുനക്കര ക്ഷേത്രത്തിന്റെ ഗോപുരത്തിന് സമീപം മഴയും വെയിലും കൊണ്ട് നിന്ന നിൽപ്പിൽ നിന്ന ജ്യോതിരാജിനെയാണ് വെസ്റ്റ് പൊലീസ് കണ്ടെത്തി, തിരികെ നാട്ടിലെത്തിച്ചത്.

ഒരാഴ്ച മുൻപാണ് മാന്യമായി വസ്ത്രം ധരിച്ച യുവാവ് നഗരത്തിൽ അലഞ്ഞ് തിരിയുന്നത് നാട്ടുകാരുടെ ശ്രദ്ധയിൽപ്പെട്ടത്. തുടർന്നു, നാട്ടുകാർ വിവരം പൊലീസിൽ അറിയിക്കുകയായിരുന്നു. ഇതിനിടെയാണ് വെസ്റ്റ് എസ്.ഐ ടി.ശ്രീജിത്തിന്റെ നേതൃത്വത്തിലുള്ള പെട്രോളിംങ് സംഘം തിരുനക്കര ക്ഷേത്രത്തിനി സമീപത്ത് എത്തിയത്.

ഈ സമയം ജ്യോതിരാജ് ഇതേ നിൽപ്പ് തന്നെ നിൽക്കുകയായിരുന്നു. തുടർന്ന് പൊലീസ് സംഘം അടുത്തെത്തി കാര്യങ്ങൾ ചോദിച്ചറിയാൻ ശ്രമിച്ചെങ്കിലും ഒന്നും സംസാരിക്കാൻ തയ്യാറായില്ല. തുടർന്ന്, ഇവർ ജ്യോതിരാജിന്റെ കയ്യിലുണ്ടായിരുന്ന ബാഗ് പരിശോധിച്ചു.

ഇതോടെയാണ് ഉയർന്ന മാർക്കിന്റെ സർട്ടിഫിക്കറ്റുകൾ കണ്ടത്. ഈ സർട്ടിഫിക്കറ്റിൽ നിന്നും ലഭിച്ച വിലാസത്തിൽ പൊലീസ് വിവരം അറിയിച്ചു. ഈ വിവരത്തിന്റെ അടിസ്ഥാനത്തിൽ ബന്ധുക്കൾ വെസ്റ്റ് പൊലീസിനെ ബന്ധപ്പെട്ടു.

ബന്ധുക്കൾ എത്തും വരെ ഇയാൾ സുരക്ഷിതനായി ഇരിക്കുന്നതിനായി പൊലീസ് സ്റ്റേഷനിൽ തന്നെ കൊണ്ടു വന്നു. എന്നാൽ, ബന്ധുക്കൾ എത്തും വരെയുള്ള രാത്രി മുഴുവൻ ജ്യോതിരാജ് ഇരിക്കാൻ തയ്യാറായില്ല. മുഴുവൻ സമയവും പൊലീസ് സ്റ്റേഷനിൽ തന്നെ നിൽക്കുകയായിരുന്നു ഇയാൾ. ഇന്നു രാവിലെ സ്റ്റേഷനിൽ എത്തിയ ബന്ധുക്കൾ ജ്യോതിരാജിനെ ഏറ്റെടുത്തു.