കോവിഡ് വ്യാപനത്തെത്തുടര്‍ന്ന് നടപ്പാക്കിയ നിയന്ത്രണങ്ങളില്‍ മാറ്റം... ഹോട്ടലുകളില്‍ ഇരുന്ന് കഴിക്കാന്‍ അനുമതി;ഭക്ഷണം കഴിക്കാനെത്തുന്നവരില്‍ 18 വയസ്സിന് താഴെയുള്ളവര്‍ക്ക് രണ്ട് ഡോസ് വാക്‌സിന്‍ നിബന്ധന ബാധകമല്ല
സംസ്ഥാനത്ത് കോവിഡ് വ്യാപനത്തെത്തുടര്‍ന്ന് ഏര്‍പ്പെടുത്തിയിരുന്ന നിയന്ത്രണങ്ങളില്‍ മാറ്റം വരുത്താന്‍ ഇന്ന് ചേര്‍ന്ന കോവിഡ് അവലോകന യോഗത്തില്‍ തീരുമാനം. സംസ്ഥാനത്തെ വാക്‌സിനേഷന്‍ നിരക്ക് 90 ശതമാനത്തിലെത്തിയ സാഹചര്യത്തിലാണ് നിയന്ത്രണങ്ങളില്‍ ഭാഗിക ഇളവുകള്‍ നല്‍കുന്നത്. ഒരു വാക്‌സിനെങ്കിലും എടുത്തവരോ, ആര്‍ടിപിസിആര്‍ നെഗറ്റീവ് സര്‍ട്ടിഫിക്കറ്റുള്ളവരോ കോവിഡ് ബാധിതരായി രണ്ടാഴ്ച കഴിഞ്ഞവരോ മാത്രമേ പുറത്തിറങ്ങാവൂ എന്ന നിയന്ത്രണം സര്‍ക്കാര്‍ പ്രഖ്യാപിച്ചിരുന്നു. ഈ നിയന്ത്രണം ഒഴിവാക്കാന്‍ ഇന്ന് ചേര്‍ന്ന കോവിഡ് അവലോകന യോഗത്തില്‍ തീരുമാനിച്ചതായി മുഖ്യമന്ത്രി പറഞ്ഞു. ഹോട്ടലുകളിലും റെസ്‌റ്റോറന്റുകളിലും ഇരുന്ന് ഭക്ഷണം കഴിക്കുന്നതിനുള്ള നിയന്ത്രണത്തില്‍ മാറ്റം വരുത്താനും കോവിഡ് അവലോകന യോഗം തീരുമാനിച്ചു. രണ്ട് ഡോസ് വാക്‌സിന്‍ സ്വീകരിച്ചവര്‍ക്ക് ഹോട്ടലുകളിലും റെസ്‌റ്റോറന്റുകളിലും ബാറുകളിലും അകത്തിരുന്ന് ഭക്ഷണം കഴിക്കാന്‍ അനുമതി നല്‍കി. രണ്ട് ഡോസ് വക്‌സിന്‍ സ്വീകരിച്ച തൊഴിലാളികളെ ഉള്‍പ്പെടുത്തിയാവണം ഈ സ്ഥാപനങ്ങള്‍ പ്രവര്‍ത്തിക്കേണ്ടതെന്നും മുഖ്യമന്ത്രി വ്യക്കമാക്കി. ഭക്ഷണം കഴിക്കാനെത്തുന്നവരില്‍ 18 വയസ്സിന് താഴെയുള്ളവര്‍ക്ക് രണ്ട് ഡോസ് വാക്‌സിന്‍ നിബന്ധന ബാധകമല്ല. സിറ്റിങ് കപ്പാസിറ്റിയുടെ 50 ശതമാനം മാത്രമേ ആളുകളെ അനുവദിക്കൂ. അകലം പാലിച്ച് ഇരിപ്പിടം ഒരുക്കണം. എസി സംവിധാനങ്ങള്‍ ഉപയോഗിക്കാതിരിക്കണം. ജനലുകളും വാതിലുകളും പരമാവധി തുറന്നിടാന്‍ സൗകര്യമൊരുക്കണം. ഇന്‍ഡോര്‍ സ്‌റ്റേഡിയങ്ങള്‍, നീന്തല്‍ കുളങ്ങള്‍ എന്നിവയുടെ പ്രവര്‍ത്തനങ്ങള്‍ക്കും ഉപാധികളോടെ അനുമതി നല്‍കി. ജീവനക്കാര്‍ അടക്കമുള്ളവര്‍ക്ക് രണ്ട് ഡോസ് വാക്‌സിന്‍ സ്വീകരിച്ചാല്‍ മാത്രമേ ഇവിടങ്ങളില്‍ പ്രവേശനം നല്‍കൂ. എന്നാല്‍ 18 വയസ്സിന് താഴെയുള്ളവര്‍ക്ക് ഈ നിബന്ധന ബാധകമല്ലെന്നും മുഖ്യമന്ത്രി പറഞ്ഞു.
https://www.facebook.com/Malayalivartha
