ഇന്ത്യയ്ക്ക് വേണ്ടി ഒരു സുന്ദരി സംസാരിക്കുന്നത് കണ്ട് പാകിസ്ഥാന്‍ ഇത്രയൊന്നും പ്രതീക്ഷിച്ചില്ല. അവസാനം പാക്കിസ്ഥാനെയും ഇമ്രാനെയും വിറപ്പിച്ച് യുഎന്നിലെ ഇന്ത്യയുടെ ഫസ്റ്റ് സെക്രട്ടറി സ്‌നേഹ ദുബെ.

ഭീകരതയെ പ്രോത്സാഹിപ്പിക്കുന്ന പാക്കിസ്ഥാന്‍ നയത്തിനെതിരെ ഐക്യരാഷ്ട്ര സംഘടനയില്‍ സ്‌നേഹ ദുബെ കടുത്ത രീതിയില്‍ പ്രതികരിച്ചതു വലിയ ചര്‍ച്ചയായി. ഭീകരരെ പാക്കിസ്ഥാന്‍ പിന്തുണയ്ക്കുന്നതും ആയുധം നല്‍കുന്നതും ലോകം മുഴുവന്‍ അറിയാമെന്നും യുഎന്‍ രക്ഷാകൗണ്‍സില്‍ പട്ടികയിലെ ഭീകരരില്‍ ഏറെപ്പേരുടെയും താവളം പാക്കിസ്ഥാനാണെന്നും സ്‌നേഹ ദുബെ പറഞ്ഞു.

പാക്കിസ്ഥാന് കൃത്യമായ മറുപടി നല്‍കിയ സ്‌നേഹ ദുബെ ആരാണെന്ന തിരച്ചിലിലായിരുന്നു ഇന്ത്യക്കാര്‍. സമൂഹമാധ്യമങ്ങളില്‍ നിരവധി പേരാണ് യുഎന്നിലെ സ്‌നേഹയുടെ ദൃശ്യങ്ങള്‍ പങ്കുവയ്ക്കുന്നത്. 2012 ബാച്ചിലെ ഇന്ത്യന്‍ ഫോറിന്‍ സര്‍വീസ് (ഐഎഫ്എസ്) ഉദ്യോഗസ്ഥയാണ് സ്‌നേഹ. സ്‌കൂള്‍ പഠനം പൂര്‍ത്തിയാക്കിയതു ഗോവയില്‍. പുണെ ഫെര്‍ഗൂസന്‍ കോളജില്‍നിന്ന് ഉന്നത വിദ്യാഭ്യാസം. ജെഎന്‍യുവില്‍നിന്ന് എംഫില്‍ നേടി.

12ാം വയസ്സുമുതല്‍ ഐഎഫ്എസിന്റെ ഭാഗമാകണമെന്നായിരുന്നു സ്‌നേഹയുടെ ആഗ്രഹം. 2011ല്‍ ആദ്യ ശ്രമത്തില്‍ സിവില്‍ സര്‍വീസിലേക്കു തിരഞ്ഞെടുക്കപ്പെട്ടു. രാജ്യാന്തര വിഷയങ്ങളിലുള്ള പഠനമാണ് ഐഎഫ്എസില്‍ ചേരാന്‍ പ്രേരണയായതെന്നു സ്‌നേഹ പറയുന്നു. ഐഎഫ്എസില്‍ ചേരുന്നതോടെ രാജ്യത്തെ പ്രതിനിധീകരിക്കാനുള്ള മികച്ച അവസരമാണു ലഭിക്കുകയെന്നും വിശ്വസിച്ചു.

കുടുംബത്തിലെ ആദ്യ സര്‍ക്കാര്‍ ഉദ്യോഗസ്ഥ കൂടിയാണ് സ്‌നേഹ. പിതാവ് ബഹുരാഷ്ട്ര കമ്പനിയിലെ ജീവനക്കാരനാണ്. അമ്മ അധ്യാപിക. ഐഎഫ്എസിലേക്കു തിരഞ്ഞെടുക്കപ്പെട്ട ശേഷം വിദേശകാര്യ മന്ത്രാലയത്തിലായിരുന്നു ആദ്യ നിയമനം. 2014 ഓഗസ്റ്റില്‍ മഡ്രിഡിലെ ഇന്ത്യന്‍ എംബസിയിലെത്തി. നിലവില്‍ യുഎന്നിലെ ഇന്ത്യയുടെ ഫസ്റ്റ് സെക്രട്ടറിയാണു സ്‌നേഹ.

കശ്മീരിന്റെ പ്രത്യേക പദവി റദ്ദാക്കിയതുമായി ബന്ധപ്പെട്ട് പാക്കിസ്ഥാന്‍ പ്രധാനമന്ത്രി ഇമ്രാന്‍ ഖാന്‍ നടത്തിയ പരാമര്‍ശങ്ങള്‍ക്ക് ശക്തമായ മറുപടിയാണ് സ്‌നേഹ യുഎന്നില്‍ നല്‍കിയത്. ഭീകരര്‍ സ്വതന്ത്രമായി നടക്കുന്ന രാജ്യമാണ് പാക്കിസ്ഥാന്‍. പാക്ക് നേതാക്കള്‍ ഇന്ത്യയെപ്പറ്റി കള്ളപ്രചാരണം നടത്തി ലോകത്തെ കബളിപ്പിക്കുന്നത് ഇതാദ്യമല്ല. ഇന്ത്യയുടെ ആഭ്യന്തര കാര്യങ്ങളില്‍ ഇടപെടേണ്ട കാര്യം പാക്കിസ്ഥാനില്ല.

ഭീകരവാദത്തെ പരസ്യമായി പിന്തുണയ്ക്കുകയും ഭീകരരെ പരിശീലിപ്പിക്കുകയും അതിനായി പണമൊഴുക്കുകയും ചെയ്യുന്ന രാജ്യമാണ് പാക്കിസ്ഥാന്‍. അവര്‍ ഭീകരവാദത്തിന്റെ ഇരകളാണ് എന്നാണ് കേട്ടുകൊണ്ടിരിക്കുന്നത്. തീ കെടുത്തുന്നവനെന്ന് വിശേഷിപ്പിച്ച് പുരയ്ക്ക് തീയിടുന്ന പോലെയാണിത്. അയല്‍രാജ്യങ്ങളെ മാത്രമേ നശിപ്പിക്കൂ എന്നു കരുതിയാണ് പാക്കിസ്ഥാന്‍ ഭീകരരെ വളര്‍ത്തുന്നത്. എന്നാല്‍ അവരുടെ നയങ്ങള്‍ കാരണം ലോകം ബുദ്ധിമുട്ടുകയാണെന്നും സ്‌നേഹ പറഞ്ഞു.

ഐക്യരാഷ്ട്ര സംഘടനയില്‍ കശ്മീര്‍ വിഷയം ചര്‍ച്ചയാക്കാനുള്ള പാക്കിസ്ഥാന്റെ നീക്കത്തിനെതിരെ ഇന്ത്യ ശക്തമായ വാക്കുകളില്‍ തിരിച്ചടിച്ചു. ഉസാമ ബിന്‍ ലാദന്‍ അടക്കം കൊടും ഭീകരര്‍ക്കു താവളമൊരുക്കിയ പാക്കിസ്ഥാന്‍, അഗ്‌നിശമന സേനാനിയുടെ വേഷംകെട്ടിയ കൊള്ളിവയ്പുകാരനാണെന്ന് സ്‌നേഹ ദുബെ കുറ്റപ്പെടുത്തി. പൊതുസഭയില്‍ നടത്തിയ വിഡിയോ പ്രസംഗത്തിലാണു പാക്ക് പ്രധാനമന്ത്രി ഇമ്രാന്‍ ഖാന്‍ കശ്മീര്‍ വിഷയം കുത്തിപ്പൊക്കി ഇന്ത്യയെ കടന്നാക്രമിച്ചത്.

കശ്മീര്‍ ഇന്ത്യയുടെ ആഭ്യന്തര വിഷയമാണ്. പൂര്‍ണമായും എന്നും ഇന്ത്യയുടെ അവിഭാജ്യഘടകമാണ് കശ്മീര്‍. പാക്കിസ്ഥാന്‍ അധിനിവേശം നടത്തിയ പ്രദേശങ്ങളില്‍നിന്ന് ഒഴിഞ്ഞുപോകണം. അസത്യം പ്രചരിപ്പിച്ച് ഇന്ത്യയുടെ പ്രതിഛായ കളങ്കപ്പെടുത്താനുള്ള പാക്ക് ശ്രമം അപലപനീയമാണ് എന്നും സ്‌നേഹ പറഞ്ഞു.