ബി.ജെ.പി നേതാവ് എ.പി. അബ്ദുളളക്കുട്ടിയും അയിഷ സുല്‍ത്താനയും തമ്മിലുള്ള തര്‍ക്കം തുടങ്ങിയിട്ട് കുറേ നാളായി. ഇപ്പോള്‍ ആ തര്‍ക്കങ്ങള്‍ മറ്റൊരു തലത്തിലേക്കാണ് പോകുന്നത്. അബ്ദുളളക്കുട്ടിക്കെതിരെ രൂക്ഷവിമര്‍ശനവുമായി അയിഷ സുല്‍ത്താന രംഗത്തെത്തി.

ലക്ഷദ്വീപിലെ ഉണക്കമീന്‍ കച്ചവടവും അഴിമതിയുമായി ബന്ധപ്പെട്ട് ദ്വീപ് നിവാസികള്‍ക്കൊപ്പമുളള ഫോട്ടോ സഹിതം അബ്ദുളളക്കുട്ടി ഫേസ്ബുക്കില്‍ പങ്കുവച്ച പോസ്റ്റിനുതാഴെ കമന്റ് ബോക്‌സിലാണ് അയിഷ രൂക്ഷവിമര്‍ശനം ഉന്നയിച്ചിരിക്കുന്നത്. ഇതേകമന്റ് തന്റെ ഫേസ്ബുക്ക് പേജിലും അവര്‍ പങ്കുവച്ചിട്ടുണ്ട്.

ലക്ഷദ്വീപില്‍ ഗുണ്ടാ ആക്റ്റ് നടപ്പാക്കുന്നത് ലക്ഷദ്വീപില്‍ നിന്നും പിടിച്ച എ.കെ47നും മൂവായിരത്തോളമുള്ള മയക്കുമരുന്നും ഒക്കെ കൊണ്ടാണെന്ന് താങ്കള്‍ പറഞ്ഞിരുന്നല്ലോ, ഈ ഫോട്ടോയില്‍ കാണുന്നതാണോ താങ്കള്‍ പറഞ്ഞ എ.കെ47? കൂടാതെ ഞങ്ങളെ മൊത്തം തീവ്രവാദികളും, ഗാന്ധി പ്രതിമ വെക്കാത്ത ആളുകളും ആക്കി മാറ്റി. ഈ ഫോട്ടോയില്‍ ഉള്ളവരാണോ തീവ്രവാദികളെന്നും ഐഷ തന്റെ ഫേസ്ബുക്ക് പോസ്റ്റില്‍ ചോദിക്കുന്നു.

ഇതൊക്കെ പറഞ്ഞിട്ട് ദ്വീപില്‍ തെണ്ടാന്‍ ഇറങ്ങിയിരിക്കുന്നു, അവരുടെ കയ്യിന്നു വെള്ളം വാങ്ങി കുടിക്കുന്നു. കുറച്ചെങ്കിലും നാണമുണ്ടോ. ആ ജനത ദാഹിച്ചാല്‍ വെള്ളം തരും കാരണം അവര്‍ക്ക് പടച്ചോന്റെ മനസാണ്. ഹോസ്പിറ്റാലിറ്റിടെ കാര്യത്തില്‍ മുന്നിലുള്ള ജനതയാണ് ലക്ഷദ്വീപുകാര്‍. ആ അവരെയല്ലേ താങ്കളൊക്കെ തീവ്രവാദി ആക്കിയത്. ഇപ്പോള്‍ ദ്വീപില്‍ എത്തി അവിടെ മൊത്തം തെണ്ടിയ സ്ഥിതിക്ക് താങ്കള്‍ തന്നെ പറയൂ, ആ നാട്ടില്‍ ഗുണ്ടാആക്റ്റ് നിയമം നടപ്പാക്കണോ? ഗപ്പ് ഇപ്പൊ ഗുജറാത്ത് കൊണ്ട് പോയ സ്ഥിതിക്ക് അവര്‍ക്ക് അവകാശപ്പെട്ടതല്ലേ ആ ഗുണ്ടാ ആക്റ്റ് എന്നും അയിഷ തന്റെ പോസ്റ്റില്‍ പറയുന്നു.

ഐഷ സുല്‍ത്താനയുടെ ഫേസ്ബുക്ക് പോസ്റ്റ് ഇങ്ങനെയാണ്

മിസ്റ്റര്‍ അബ്ദുള്ള കുട്ടി... താങ്കള്‍ ഇന്ന് ഒരു നാണവുമില്ലാതെ ദ്വീപിലിറങ്ങി ചുറ്റി കറങ്ങുമ്പോള്‍ താങ്കളോട് ഒരു ചോദ്യം? ലക്ഷദ്വീപില്‍ ഗുണ്ടാ ആക്റ്റ് നടപ്പാക്കുന്നത് ലക്ഷദ്വീപില്‍ നിന്നും പിടിച്ച എകെ 47 ഉം മൂവായിരത്തോളമുള്ള മയക്കുമരുന്നും ഒക്കെ കൊണ്ടാണെന്ന് താങ്കള്‍ പറഞ്ഞിരുന്നല്ലോ, ഈ ഫോട്ടോയില്‍ കാണുന്നതാണോ താങ്കള്‍ പറഞ്ഞ എകെ 47? കൂടാതെ ഞങ്ങളെ മൊത്തം തീവ്രവാദികളും,ഗാന്ധി പ്രതിമ വെക്കാത്ത ആളുകളും ആക്കി മാറ്റി, ഈ ഫോട്ടോയില്‍ ഉള്ളവരാണോ തീവ്രവാദികള്‍...? ഇതൊക്കെ പറഞ്ഞിട്ട് ദ്ദേ ദ്വീപില്‍ തെണ്ടാന്‍ ഇറങ്ങിയിരിക്കുന്നു, അവരുടെ കയ്യിന്നു വെള്ളം വാങ്ങി കുടിക്കുന്നു, കുറച്ചെങ്കിലും നാണമുണ്ടോ...?

ആ ജനത ദാഹിച്ചാല്‍ വെള്ളം തരും കാരണം അവര്‍ക്ക് പടച്ചോന്റെ മനസ്സാണ്. ഹോസ്പിറ്റാലിറ്റിടെ കാര്യത്തില്‍ മുന്നിലുള്ള ജനതയാണ് ലക്ഷദ്വീപ്ക്കാര്‍. ആ അവരെയല്ലേ താങ്കളൊക്കെ ഇവടക്കിടന്നു തീവ്രവാദി ആക്കിയത്. അതൊക്കെ പോട്ടെ കഴിഞ്ഞത് കഴിഞ്ഞു... താങ്കള്‍ ഇപ്പോ ദ്വീപില്‍ എത്തി അവിടെ മൊത്തം തെണ്ടിയ സ്ഥിതിക്ക് താങ്കള്‍ തന്നെ പറയൂ ആ നാട്ടില്‍ ഗുണ്ടാആക്റ്റ് നിയമം നടപ്പാക്കണോ? ഗപ്പ് ഇപ്പൊ ഗുജ്‌റാത്ത് കൊണ്ട് പോയ സ്ഥിതിക്ക് അവര്‍ക്ക് അവകാശപ്പെട്ടതല്ലേ ആ ഗുണ്ടാ ആക്റ്റ്.

അതേസമയം അസമില്‍ നടന്ന പൊലീസ് വെടിവെപ്പിലും ഫോട്ടോഗ്രാഫര്‍ ഗ്രാമീണനെ ആക്രമിച്ച സംഭവത്തില്‍ അപലപിച്ച് അയിഷ സുല്‍ത്താന രംഗത്തെത്തി. 'എങ്ങനെ ഇവന്റെ മനസ്സിലേക്ക് ഈ മത ഭ്രാന്ത് കേറി പറ്റി നിന്റെ ഉള്ളിലെ മനുഷ്വത്തം മരവിച്ചു പോയോ'യെന്ന് അയിഷ സുല്‍ത്താന അക്രമിയായ ഫോട്ടോഗ്രാഫറോട് ചോദിക്കുന്നു. ഇതിനിടെ പോസ്റ്റില്‍ പ്രതികരിച്ചയാള്‍ക്ക് രൂക്ഷമായി മറുപടിയും അയിഷ നല്‍കി. 'അപ്പൊ ഞമ്മന്റെ ആളുകള്‍ക്ക് പണി കിട്ടിയപ്പോള്‍ നൊന്തു അല്ലേ' എന്നായിരുന്നു കമന്റ്. 'അതേടോ നോവും ഇതേപോലെ നിന്റെ അച്ഛന് സംഭവിച്ചാലും എനിക്ക് നോവും കാരണം മനുഷ്യത്വം മനുഷ്യരെ സ്‌നേഹിക്കാനാ ഞങ്ങള്‍ ദ്വീപുക്കാര്‍ പഠിച്ചത്.' എന്നാണ് കമന്റിന് അയിഷ സുല്‍ത്താന മറുപടി നല്‍കിയത്.