ജയില്‍ മാറ്റത്തിനായി പഠിച്ച പണി പതിനെട്ടും പയറ്റുകയാണ് കൊടി സുനി....പക്ഷേ എന്താണെന്ന് അറിയില്ല ഒന്നും അങ്ങോട്ട് ഏല്‍ക്കുന്നില്ല.

അവസാനം വിയ്യൂര്‍ ജയിലിനുള്ളില്‍ തനിക്ക് വധ ഭീഷണിയുണ്ടെന്ന് അങ്ങോട്ട് തട്ടിവിട്ടെങ്കിലും പരാതിയില്‍ ക്രൈംബ്രാഞ്ച് അന്വേഷണം പുരോഗമിക്കുന്നതല്ലാതെ ജയില്‍ മാറ്റത്തിനായുള്ള ഒരു വകയും ഉണ്ടായില്ല. എന്നുമാത്രമല്ല. ഈ നമ്പരൊക്കെ കൈയ്യില്‍ വച്ചാല്‍ മതിയെന്നും കൊടി സുനിയുടെ വാദം കണ്ണൂര്‍ സെന്‍ട്രല്‍ ജയിലിലേക്കു മാറ്റം ലഭിക്കാനുള്ള സമ്മര്‍ദ തന്ത്രമെന്ന് പോലീസ് തുറന്നടിച്ചു.

ഇതൊക്കെ ഇവന്‍മാരെങ്ങനെ മനസ്സിലാക്കി എന്ന് തലപുകഞ്ഞ് ആലോചിക്കുകയാണ് സുനി. വധ ഭീഷണിയുണ്ടെന്ന് പരാതി നല്‍കിയതും ആകെ മെനക്കേടായിരിക്കുകയാണ്. സുനിക്ക് ഒരുക്കിയിരിക്കുന്നത് കനത്ത സുരക്ഷയാണ്. സുനിയെ പാര്‍പ്പിച്ചിരിക്കുന്നത് 24 മണിക്കൂറും പൂട്ടിയിട്ട സെല്ലിലാണ്. മറ്റ് തടവുകാരുമായി ബന്ധപ്പെടാനുള്ള എല്ലാ സാഹചര്യവും ഒഴിവാക്കുന്നുണ്ടെന്നും ജയില്‍ അധികൃതര്‍. ഇത്രയും സുരക്ഷ കിട്ടിയിട്ടും എന്തൊ ഒരു വിഷമം അങ്ങനെ കറങ്ങി നടക്കുന്നില്ലേ....അതാണ് അതിനും കാരണമുണ്ട്.

അവനവന്‍ കുഴിച്ച കുഴില്‍ അവനവന്‍ തന്നെ വീണു അത്രേ ഉള്ളൂന്നേ....വിയ്യൂരില്‍ സുനിയുടെ കൈയില്‍ നിന്നു മൊബൈല്‍ ഫോണ്‍ പിടികൂടുകയും കോവിഡ് കാലത്ത് ഒട്ടുമിക്ക തടവുകാര്‍ക്കും ലഭിച്ച പ്രത്യേക പരോളില്‍ നിന്നു തഴയപ്പെടുകയും ചെയ്തതോടെയാണു കണ്ണൂരിലേക്കു മാറാന്‍ സുനി ശ്രമം തുടങ്ങിയതെന്നു ജയില്‍ വകുപ്പിനും സൂചന ലഭിച്ചിട്ടുണ്ട്.

ജയില്‍ മാറ്റത്തിനായുള്ള സുനിയുടെ ഈ കഷ്ടപ്പാട് ഒക്കെ കണ്ട് ദുഖത്തില്‍ ചില ആഭ്യന്തര വകുപ്പിലെ ഉന്നതരും കൂടെ കൂടിയിട്ടുണ്ടെന്നും കേട്ടിരുന്നു. വിയ്യൂര്‍ സെന്‍ട്രല്‍ ജയിലില്‍ നിന്നും കണ്ണൂരിലേക്ക് മാറാന്‍ കൊടി സുനി കുറെ നാളായി ശ്രമിക്കുകയാണ്. ഇതിന് വേണ്ടി അദ്ദേഹം സര്‍ക്കാര്‍ തലത്തില്‍ സമ്മര്‍ദം ചെലുത്തിയിരുന്നു. കണ്ണൂരിലെ ചില സി പി എം നേതാക്കളും കൊടി സുനിക്ക് വേണ്ടി ഉന്നതങ്ങളില്‍ ഇടപെട്ടിരുന്നു.

സ്വാധീനഫലമായി കണ്ണൂര്‍ സെന്‍ട്രല്‍ ജയിലിലെ മൊബൈല്‍ ഫോണ്‍ ഉപയോഗത്തെ കുറിച്ച് അന്വേഷിക്കാന്‍ സര്‍ക്കാര്‍ ഉത്തരവിട്ടിരുന്നു.തുടര്‍ന്നായിരുന്നു വധഭീഷണിയെ കുറിച്ച് അന്വേഷിക്കാനും ഉത്തരവും. അന്വേഷണം കൊടി സുനിക്ക് എതിരെയാണെന്ന് പ്രത്യക്ഷത്തില്‍ തോന്നുമെങ്കിലും അത് അങ്ങനെയല്ലെന്നതാണ് വാസ്തവം. ജനങ്ങളുടെ കണ്ണില്‍ മണ്ണിട്ട് കൊടി സുനിയെ കണ്ണൂരിലേക്ക് രക്ഷപ്പെടുത്താനുള്ള രഹസ്യ നീക്കം പരസ്യമാണെന്ന് ഏത് സാധാരണക്കാരനും മനസിലാകും.

കാര്യങ്ങള്‍ എന്തൊക്കെയാണെങ്കിലും ജയിലിലെ താരമാണ് കൊടി സുനി.വധ ഭീഷണി തടവുകാരെല്ലാം നിഷേധിച്ചു. സുനിയുടെ അടവാണെന്നു മൊഴി നല്‍കുകയും ചെയ്തതായാണ് വിവരം. ഇത് തന്നെയാണ് ജയില്‍ വകുപ്പിന്റെയും കണക്കുകൂട്ടല്‍. എന്നാല്‍ സുനിക്കെതിരെ ജയില്‍ അധികൃതര്‍ നീക്കുന്നതില്‍ സര്‍ക്കാരിന് അതൃപ്തിയുണ്ട്.

പക്ഷേ അത് അങ്ങനെ പരസ്യമായി പറയാന്‍ പറ്റില്ലല്ലോ. ടിപി വധക്കേസിലെ മറ്റു പ്രതികള്‍ക്കെല്ലാം കോവിഡ് കാലത്തു പ്രത്യേക പരോള്‍ ലഭിച്ചപ്പോള്‍ സുനി മാത്രം ജയിലില്‍ കഴിയേണ്ടി വന്നു. അനുയായികളായ തടവുകാരെയെല്ലാം പൂജപ്പുരയിലേക്കും കണ്ണൂരിലേക്കും മാറ്റുകയും ചെയ്തതോടെ സുനി വിയ്യൂരില്‍ ഒറ്റയ്ക്കായി. എല്ലാെം കൊണ്ടും നിരാശനായതോടെ ഒരു മാറ്റം ആഗ്രഹിച്ചതാണോ താന്‍ ചെയ്ത തെറ്റെന്ന് സുനി പറയാതെ പറയുകയാണ്..അയിനാണ് ഈ ജയില്‍ മാറ്റ അടവ് പുറത്തെടുത്തത്..ഒടുവില്‍ വിനയായതും.

 "