ബൈക്കുകള്‍ കൂട്ടിയിടിച്ച് രണ്ട് യുവാക്കള്‍ മരിച്ചു.... ബൈക്കുകളുടെ ഹാന്‍ഡില്‍ കൂട്ടിയിടിച്ച് നിയന്ത്രണം വിട്ട് രണ്ടുഭാഗങ്ങളിലേക്ക് തെറിച്ചു, അപകടം നടന്നയുടനെ അവരെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.

ഒരേദിശയിലേക്ക് പോകുകയായിരുന്നു ബൈക്കുകളാണ് കൂട്ടിയിടിച്ചത്. കുണ്ടുകാടിനടുത്ത് പനമ്പിള്ളി കാഞ്ഞിരത്തിങ്കല്‍ പരേതനായ ബാബുവിന്റെ മകന്‍ ദിലീപ് (25), ചേലക്കര സ്വദേശി കൊട്ടയാട്ടില്‍ മുഹമദ്കുട്ടിയുടെ മകന്‍ അഷ്‌കര്‍ (21) എന്നിവരാണ് മരിച്ചത്.

കരുവാന്‍കാട് സ്വദേശികളായ പുതുശ്ശേരി യാക്കോബ് മകന്‍ ജിസ്‌മോന്‍, എടതുരുത്തി ബിജു മകന്‍ വിജീഷ് എന്നിവര്‍ക്ക് പരിക്കേറ്റു. വില്ലടം പുതിയ പാലത്തിന് സമീപം ഇന്നലെ രാത്രി ഒമ്പതോടെയാണ് അപകടം നടന്നത്. അമിതവേഗതയാണ് അപകടകാരണമെന്ന് കരുതുന്നു.

സുഹൃത്തുക്കളായ നാലുപേരും രണ്ടു ബൈക്കുകളിലായി കുണ്ടുകാട് ഭാഗത്തേക്ക് പോകുമ്പോഴാണ് അപകടം നടന്നത്. ബൈക്കുകളുടെ ഹാന്‍ഡില്‍ കൂട്ടിയിടിച്ച് നിയന്ത്രണംവിട്ട് രണ്ടുഭാഗങ്ങളിലേക്ക് തെറിച്ചു. ഒരുബൈക്ക് വൈദ്യുതി പോസ്റ്റിലിടിച്ചശേഷം സമീപത്തെ വീട്ടുമതില്‍ തകര്‍ത്തു. ഈ ബൈക്കിലുണ്ടായിരുന്നവരാണ് മരിച്ചത്. പരിക്കേറ്റവരില്‍ ഒരാളുടെ നില ഗുരുതരമാണ്.

അപകടം നടന്നയുടന്‍ നാട്ടുകാര്‍ പരിക്കേറ്റവരെ ആംബുലന്‍സിലും ഓട്ടോയിലുമായി ആശുപത്രിയില്‍ എത്തിച്ചെങ്കിലും ഇരുവരും മരിച്ചിരുന്നു.