പുതിയ സിനിമയുടെ പോസ്റ്റർ പങ്കുവെച്ച ശ്രീകാന്ത് വെട്ടിയാറിനെതിരെ ട്രോളുമായി സാമൂഹ്യ മാധ്യമങ്ങള്‍ രംഗത്ത്. മീ ടൂ വിവാദത്തില്‍ ഉള്‍പ്പെട്ട ശ്രീകാന്ത് അടുത്തിടെയാണ് കേസില്‍ ജാമ്യം നേടി പുറത്ത് വന്നത്. എപ്പോഴും സോഷ്യല്‍ മീഡിയയില്‍ ആക്റ്റീവ് ആയിരുന്ന ശ്രീകാന്ത് വെട്ടിയാര്‍ പ്രമുഖ യൂട്യൂബ് വ്ലോഗറായിരുന്നു. ധാരാളം ഫോളോവേര്‍സും ആരാധകരുമുള്ള ഇയാള്‍ക്കെതിരെ സുഹൃത്തായിരുന്ന യുവതി പാരാതിയുമായി രംഗത്ത് എത്തിയിരുന്നു.

പിറന്നാള്‍ ആഘോഷിക്കാന്‍ ആളില്ലാത്ത ഫ്ലാറ്റില്‍ കൊണ്ട് ചെന്ന് യുവതിയെ ഇയാള്‍ പീഡിപ്പിച്ചെന്നും, ഭീഷണിപ്പെടുത്തിയെന്നുമായിരുന്നു കേസ്. ഇതോടെ ആരാധകരും മറ്റും തന്നെ ഇയാളെ ബഹിഷ്കരിച്ചുകൊണ്ട് രംഗത്തെത്തിയിരുന്നു. രൂക്ഷമായ വിമര്‍ശനങ്ങളാണ് അന്ന് സൈബര്‍ ഇടങ്ങളില്‍ നിന്ന് ഇയാള്‍ക്ക് നേരിടേണ്ടി വന്നത്.

അതേസമയം, സമാനമായ രീതിയിലാണ് ഇയാള്‍ പങ്കുവച്ച സിനിമാ പോസ്റ്ററിനും പ്രതികരണം ലഭിക്കുന്നത്. ഹോട്ടല്‍ മുറിയില്‍ ഒരു കേക്ക് മുറി, എപ്പൊ റിലീസാകും സേട്ടാ എന്ന് സോഷ്യല്‍ മീഡിയ ശ്രീകാന്ത് വെട്ടിയാറിനോട് ചോദിക്കുന്നു. താങ്കളെ കുറിച്ചു വന്ന ആരോപണത്തിന് മറുപടി പറയാന്‍ താങ്കള്‍ ബാധ്യസ്ഥനാണ്, അതിനു ശേഷം പോരെ പ്രൊമോഷനെന്നും സോഷ്യല്‍ മീഡിയ പ്രതികരിക്കുന്നു.