കെ.കെ. രമയ്ക്കെതിരെ എളമരം കരീം.... പ്രസ്ഥാനത്തെ ഒറ്റുകൊടുത്തതിന് കിട്ടിയ പാരിതോഷികമാണ് കെ.കെ. രമയുടെ എംഎല്എ സ്ഥാനം
ആര്എംപി നേതാവും വടകര എംഎല്എയുമായ കെ.കെ. രമയ്ക്കെതിരെ സിപിഎം കേന്ദ്രകമ്മറ്റിയംഗം എളമരം കരീം. പ്രസ്ഥാനത്തെ ഒറ്റുകൊടുത്തതിന് കിട്ടിയ പാരിതോഷികമാണ് കെ.കെ. രമയുടെ എംഎല്എ സ്ഥാനം. ഇക്കാരണംകൊണ്ട് അഹങ്കരിക്കേണ്ട. വര്ഗശത്രുക്കളുമായി ചേര്ന്ന് കമ്മ്യൂണിസ്റ്റ് പാര്ട്ടിയെ വെല്ലുവിളിക്കുകയാണ് കെകെ രമയെന്നും എളമരം കരീം വടകര ഒഞ്ചിയത്ത് പറഞ്ഞു.
രാജ്യസഭയിലേക്ക് നാമനിര്ദ്ദേശം ചെയ്യപ്പെട്ട കായിക താരം പി ടി ഉഷയ്ക്കെതിരെ വിമര്ശനമുന്നയിച്ചതിനു പിന്നാലെയാണ് കെകെ രമ എംഎല്എയ്ക്കെതിരെ അധിക്ഷേപവുമായി എളമരം കരീം എംപി രംഗത്തെത്തിയത്. ചൊവ്വാഴ്ച ഒഞ്ചിയത്ത് നടന്ന സിഎച്ച് അശോകന് അനുസ്മരണ ചടങ്ങിലായിരുന്നു കരീമിന്റെ പരാമര്ശം. അതേസമയം എളമരം കരീമിന്റെ പ്രസ്താവനയ്ക്കെതിരെ കെകെ രമയും രംഗത്തെത്തി. നിയമസഭയില് സര്ക്കാരിനെതിരെ താന് എടുക്കുന്ന നിലപാടാണ് സിപിഎം നേതാക്കളെ പ്രകോപിപ്പിക്കുന്നതെന്നായിരുന്നു കെ.കെ. രമയുടെ പറഞ്ഞത്.
രാജ്യസഭയിലേക്ക് നാമനിര്ദേശം ചെയ്യപ്പെട്ട അത്ലറ്റ് പി.ടി ഉഷയെ പരിഹസിച്ച് സിപിഎം കേന്ദ്ര കമ്മിറ്റിയംഗം എളമരം കരീം. പത്രത്തിന്റെ പേര് പറയാതെയായിരുന്നു പി ടി ഉഷയുടെ രാജ്യസഭാംഗത്വതിനെതിരെ എളമരം കരീം രംഗത്തെത്തിയത്. സംഘപരിവാറിന് ഹിതകരമായി പെരുമാറുന്നവര്ക്ക് പാരിതോഷികങ്ങള് ലഭിക്കുന്ന സാഹചര്യത്തെക്കുറിച്ച് പ്രസംഗത്തിനിടയില് വിശദീകരിക്കവേയായിരുന്നു എളമരം കരീമിന്റെ പ്രസ്താവന.
ഇപ്പോള് കേരളത്തില് നിന്ന് ഒരാളെ രാജ്യസഭയിലേക്കു നാമനിര്ദേശം ചെയ്തിട്ടുണ്ടല്ലോ. അതിന് തനിക്ക് യോഗ്യതയുണ്ടെന്ന് കുറച്ചുകാലമായി അവര് തെളിയിച്ചുകൊണ്ടിരിക്കുകയായിരുന്നു പി ടി ഉഷയുടെ പേരുപറയാതെ എളമരം കരീം വ്യക്തമാക്കി. ഏഷ്യാഡ് യോഗ്യതയ്ക്ക് പുറമേയുള്ള യോഗ്യതയാണ് തെളിയിച്ചതെന്നും അദ്ദേഹം കൂട്ടിച്ചേര്ത്തു.
മനുഷ്യാവകാശപ്രവര്ത്തക തീസ്ത സെതല്വാദിനെയും മുന് ഡിജിപി ആര്.ബി ശ്രീകുമാറിനെയും വിട്ടയക്കണം എന്നാവശ്യപ്പെട്ട് ഭരണഘടനാ സംരക്ഷണസമിതി കോഴിക്കോട് ടൗണ്ഹാളില് നടത്തിയ പ്രതിഷേധ സദസ് ഉദ്ഘാടനം ചെയ്ത് സംസാരിക്കവെയായിരുന്നു കരീമിന്റെ പരാമാര്ശം.
അയോദ്ധ്യ കേസില് വിധി പറഞ്ഞ സുപ്രീംകോടതി ചീഫ് ജസ്റ്റിസ് രഞ്ജന് ഗൊഗോയിയെ വിരമിച്ചതിന് പിന്നാലെയാണ് അവര് രാജ്യസഭാംഗമായി നാമനിര്ദേശം ചെയ്യപ്പെട്ടതെന്നും അദ്ദേഹം പറഞ്ഞു. അത്ലറ്റ് പിടി ഉഷയും സംഗീത സംവിധായകന് ഇളയരാജയുമടക്കം നാലുപേരെയാണ് രാജ്യസഭയിലേക്ക് നാമനിര്ദ്ദേശം ചെയ്തിരിക്കുന്നത്. കര്ണാടകയിലെ ധര്മ്മസ്ഥല ക്ഷേത്രം പരമ്പരാഗത ധര്മ്മാധികാരി വീരേന്ദ്ര ഹെഡ്ഡേ, സംവിധായകനും തിരക്കഥാകൃത്തുമായ വിജയേന്ദ്ര പ്രസാദ് എന്നിവരാണ് നാമനിര്ദ്ദേശം ചെയ്യപ്പെട്ട മറ്റ് രണ്ടുപേര്.
https://www.facebook.com/Malayalivartha
