എസ്.എഫ്‌.ഐ വനിതാ നേതാവിനെ ജയിപ്പിക്കാൻ വേണ്ടി നടന്ന കള്ളകളികൾ പുറത്ത് വരികയാണ്. സംസ്‌കൃത സർവകലാശാലയുടെ യുവജനോത്സവത്തിൽ പങ്കെടുക്കാത്ത എസ്.എഫ്‌.ഐ വനിതാ നേതാവിന് മലയാളം സ്‌കി​റ്റ് മത്സരത്തിൽ ഒന്നാം സ്ഥാനവും എ ഗ്രേഡും ലഭിച്ചതായി വൈസ്ചാൻസലർ ഒപ്പിട്ട് സർട്ടിഫിക്കറ്റ് നൽകി. ഗ്രേസ് മാർക്ക് ലഭിക്കാൻ വേണ്ടിയാണ് ഇത്തരത്തിലുള്ള കള്ളത്തരം ചെയ്തത്.

ഈ കാര്യം ചൂണ്ടിക്കാട്ടി ഗവർണർക്ക് പരാതി നൽകിയിരിക്കുകയാണ്. എസ്.എഫ്.ഐ നേതാവിനെ ജയിപ്പിക്കാൻ വ്യാജമായി ഗ്രേസ് മാർക്ക് നൽകിയത് റദ്ദാക്കണമെന്നും കുറ്റക്കാർക്കെതിരെ നടപടിയെടുക്കണമെന്നും പരാതിയിൽ ആവശ്യപ്പെട്ടു. ബി.എ ആറാം സെമസ്​റ്റർ പരീക്ഷയിൽ തോ​റ്റ നേതാവിനെ ജയിപ്പിക്കുക എന്ന ലക്ഷ്യത്തോടെയാണ് ഈ കള്ളത്തരം ചെയ്തത്.

സ്​റ്റുഡന്റസ് സർവീസ് ഡയറക്ടറുടെ ശുപാർശയുടെ അടിസ്ഥാനത്തിലാണ് വിസി സർട്ടിഫിക്ക​റ്റ് കൊടുത്തത്. തോറ്റ മാർക്ക് ലിസ്റ്റ് പിൻവലിച്ച് കഴിഞ്ഞിട്ടാണ് 10ഗ്രേസ് മാർക്ക് വ്യാജമായി നൽകിയത്. വിദ്യാർത്ഥിനിയെ ഭരതനാട്യം ഡി ഗ്രേഡിൽ ജയിപ്പിച്ചതായും സേവ് യൂണിവേഴ്സി​റ്റി കാമ്പയിൻ കമ്മി​റ്റി ഗവർണർക്ക് നൽകിയ പരാതിയിൽ വ്യക്തമാക്കിയിരിക്കുകയാണ്. മലയാളം സ്‌കി​റ്റിൽ ഒന്നാം സ്ഥാനവും എ ഗ്രേഡും നേടി ജയിച്ചവർ തങ്ങളുടെ ടീമിൽ വനിതാ നേതാവ് പങ്കെടുത്തില്ലെന്ന് പരാതിപ്പെട്ടു.

അപ്പോൾ മാത്രമാണ് തട്ടിപ്പ് പുറത്ത് വന്നത്. വിജയിച്ചവർ വി.സിക്ക് പരാതി നൽകി. എന്നാൽ വിസി ആ പരാതി അവഗണിക്കുകയായിരുന്നു. യുവജനോത്സവത്തിൽ പങ്കെടുത്തവരുടെ രജിസ്​റ്റർ ഉൾപ്പെടെയുള്ള രേഖകൾ കാണാതാകുകയും ചെയ്തതോടെ കാര്യങ്ങളുടെ പോക്ക് മനസിലായി. അങ്ങനെയാണ് പരാതി ഗവർണ്ണറുടെ അടുക്കലേക്ക് പോയിരിക്കുന്നത്.