വിദ്യാര്‍ത്ഥികള്‍ ഉള്‍പ്പെടെ നിരവധി ഉപഭോക്താക്കളെ ലക്ഷ്യമിട്ട് 25 ഗ്രാം എംഡിഎംഎ യും കഞ്ചാവും കടത്തിയ കേസില്‍ തലസ്ഥാന നഗരത്തിലേക്ക് എംഡിഎംഎ എത്തിക്കുന്ന റാക്കറ്റിന്റെ കണ്ണിയായ അനൂപടക്കം 3 പ്രതികള്‍ ഹാജരാകാന്‍ കോടതി ഉത്തരവ്. തിരുവനന്തപുരം അഞ്ചാം അഡീ. ജില്ലാ സെഷന്‍സ് കോടതിയുടേതാണുത്തരവ്. കുറ്റം ചുമത്തലിന് 17 നാണ് പ്രതികള്‍ ഹാജരാകേണ്ടത്. ഒന്നു മുതല്‍ മൂന്നു വരെ പ്രതികളായ മേലാംകോട് സ്വദേശി കിരണ്‍കുമാര്‍ (24), കരുമം സ്വദേശി ആനന്ദരാജ് (23), അനൂപ് എന്നിവരാണ് ഹാജരാകേണ്ടത്.

2022 ഫെബ്രുവരി 26 നാണ് കേസിനാസ്പദമായ സംഭവം നടന്നത്. കിരണ്‍കുമാറും ആനന്ദ് രാജും തങ്ങളുടെ ഓട്ടോറിക്ഷയില്‍ സഞ്ചരിച്ച് ഉപഭോക്താക്കള്‍ക്ക് മയക്കുമരുന്ന് വില്‍ക്കുന്നവരാണെന്നാണ് പ്രോസിക്യൂഷന്‍ കേസ്. 2022 ഫെബ്രുവരി 26 നാണ് കേസിനാസ്പദമായ സംഭവം നടന്നത്. പൂജപ്പുര പോലീസാണ് ഇവരെ പിടികൂടിയത്. വാഹനം തടയാന്‍ ശ്രമിച്ചപ്പോള്‍ പ്രതികള്‍ പോലീസിനെ ആക്രമിക്കുകയായിരുന്നു.
എന്നാല്‍ ചെറിയ സംഘര്‍ഷത്തെ തുടര്‍ന്ന്
രണ്ടുപേരെയും പോലീസ് അറസ്റ്റുചെയ്തു. ഇവരില്‍ നിന്ന് 25 ഗ്രാം സൈക്കോട്രോപിക് സിന്തറ്റിക് മയക്കുമരുന്നായ എംഡിഎംഎ യും കഞ്ചാവും പിടിച്ചെടുത്തു. കിരണ്‍കുമാറും ആനന്ദരാജും ആണ് ആദ്യം അറസ്റ്റിലായത്. ഇവരെ ചോദ്യം ചെയ്തതില്‍ നിന്ന് ലഭിച്ച വിവരത്തിന്റെ അടിസ്ഥാനത്തില്‍ മയക്കുമരുന്ന് ഇവര്‍ക്ക് എത്തിച്ചു നല്‍കുന്ന അനൂപിനെ തിരിച്ചറിഞ്ഞ് അറസ്റ്റ് ചെയ്തുവെന്നാണ് കേസ്.
വിഴിഞ്ഞം, തിരുവല്ലം പോലീസ് സ്റ്റേഷനുകളില്‍ നാര്‍ക്കോട്ടിക് ഡ്രഗ്സ് ആന്‍ഡ് സൈക്കോട്രോപിക് സബ്സ്റ്റന്‍സ് ആക്ട് (എന്‍ഡിപിഎസ്) പ്രകാരം ആനന്ദ രാജിനെതിരെ സമാനമായ കേസുകള്‍ രജിസ്റ്റര്‍ ചെയ്തിട്ടുണ്ടെന്ന് പോലീസ് കുറ്റപത്രത്തില്‍ പറയുന്നു.

എംഡി എം എ ഒരു പാര്‍ട്ടി ലഹരി മരുന്നായിട്ടാണ് ലഹരി ഉപയോക്താക്കള്‍ക്കിടയില്‍ കണക്കാക്കപ്പെടുന്നത്. അതിന്റെ ഗുണനിലവാരം അനുസരിച്ച് അതിന്റെ വില 3,000 മുതല്‍ 20,000 രൂപ വരെ വ്യത്യാസപ്പെടാം.
പിടികൂടിയ എംഡിഎംഎയുടെ ഒരു ഗ്രാമിന് തിരുവനന്തപുരം നഗരത്തില്‍ ശരാശരി 5,000 രൂപ ലഭിക്കുമെന്നാണ് പോലീസ് ഭാഷ്യം.

1985 ലെ നര്‍ക്കോട്ടിക് ഡ്രഗ്‌സ് ആന്റ് സൈക്കോട്രോപ്പിക് സബ്സ്റ്റന്‍സ് നിയമപ്രകാരം എംഡിഎംഎ 0. 5 ഗ്രാം ചെറിയ അളവും 10 ഗ്രാം മുതല്‍ വാണിജ്യ അളവുമാണ്.
അളവിനനുസരിച്ചാണ് ശിക്ഷയുടെ തോത് നിയമത്തില്‍ പറയുന്നത്.

0.5 ഗ്രാം അളവ് കൈവശം വച്ചാല്‍ ചെറിയ അളവെന്ന നിലയ്ക്ക് 22 (എ) പ്രകാരം 6 മാസം കഠിന തടവും പതിനായിരം രൂപ പിഴയും ശിക്ഷ

0.5 ഗ്രാമിനും 10 ഗ്രാമിനും ഇടക്കുള്ള ഇന്റര്‍മീഡിയറി ക്വാണ്ടിറ്റി അളവ് കൈവശം വച്ചാല്‍ 22 (ബി) പ്രകാരം10 വര്‍ഷം കഠിന തടവും ഒരു ലക്ഷം രൂപ പിഴയും ശിക്ഷ

10 ഗ്രാമിന് മേല്‍ എംഡിഎം.എ (50 ഗ്രാമിന് മേല്‍ മെറ്റാംഫെറ്റാമിന്‍) കൈവശം വച്ചാല്‍ വാണിജ്യ അളവെന്ന നിലക്ക് 22 (സി) പ്രകാരം 20 വര്‍ഷം കഠിന തടവും 2 ലക്ഷം രൂപ പിഴയുമാണ് ശിക്ഷ.