കരുവന്നൂര്‍ ബാങ്ക് തട്ടിപ്പ് കേസുമായി ബന്ധപ്പെട്ട് 57.75 കോടിയുടെ സ്വത്തു കൂടി എന്‍ഫോഴ്സ്മെന്റ് ഡയറക്ടറേറ്റ് കണ്ടുകെട്ടി. കരുവന്നൂര്‍ ബാങ്ക് തട്ടിപ്പിലെ കള്ളപ്പണം വെളുപ്പിക്കല്‍ കേസില്‍ പങ്കാളികളായ വ്യക്തികളുടെ ബാങ്ക് നിക്ഷേപങ്ങളും മറ്റ് സ്വത്തുക്കളുമാണ് കണ്ടുകെട്ടിയത്.

കേസ് അന്വേഷണത്തിനിടെ ഇതുവരെ 87.75 കോടിയുടെ സ്വത്താണ് കണ്ടുകെട്ടിയതെന്നും അന്വേഷണം പുരോഗമിക്കുകയാണെന്നും ഇ,?ഡി അറിയിച്ചു. കണ്ടുകെട്ടിയ സ്വത്തുക്കളില്‍ 11 വാഹനങ്ങള്‍, 92 ബാങ്ക് നിക്ഷേപങ്ങള്‍ എന്നിവയും ഉള്‍പ്പെടും. കേരളത്തിലും കര്‍ണാടകയിലുമായി 117 ഇടങ്ങളിലെ സ്വത്തുക്കളാണ് കണ്ടുകെട്ടിയത്.

കരുവന്നൂര്‍ തട്ടിപ്പുകേസില്‍ അറസ്റ്റിലായ പി. സതീഷ്‌കുമാര്‍, മുന്‍ അക്കൗണ്ടന്റ് സി.കെ. ജില്‍സ്, കമ്മിഷന്‍ ഏജന്റ് പി.പി. കിരണ്‍, വ്യാജപ്പേരിലും വ്യാജരേഖകള്‍ ഉപയോഗിച്ചും വായ്പയെടുത്തവര്‍ തുടങ്ങിയവരുടെ സ്വത്തുക്കളാണ് കണ്ടുകെട്ടിയത്.

രാഷ്ട്രീയ നേതാക്കളുടെ ഉള്‍പ്പെടെ നേരത്തെ ഇ.ഡി മരവിപ്പിച്ച നിക്ഷേപങ്ങളും കണ്ടുകെട്ടിയതായി സൂചനയുണ്ടെങ്കിലും ഇ.ഡി അധികൃതര്‍ സ്ഥിരീകരിച്ചിട്ടില്ല. കരുവന്നൂര്‍ സഹകരണബാങ്കില്‍ നടത്തിയ റെയ്ഡില്‍ തട്ടിപ്പിലൂടെ വായ്പകള്‍ നേടുകയും തിരിച്ചടയ്ക്കാതെ ബാങ്കിന് നഷ്ടംവരുത്തുകയുംചെയ്ത നിരവധിപ്പേരുടെ വിവരങ്ങളും ഈടുവച്ച സ്വത്തുക്കളുടെ രേഖകളും പിടിച്ചെടുത്തിരുന്നു. ഇവരുടെ ഭൂസ്വത്തുക്കളും തൃശ്ശൂര്‍ സഹകരണബാങ്ക് ഉള്‍പ്പെടെ ഒമ്പത് സ്ഥലങ്ങളില്‍ നടത്തിയ റെയ്ഡില്‍ ലഭിച്ച രേഖകളും പ്രകാരമാണ് കണ്ടുകെട്ടിയത്.

കരുവന്നൂര്‍ ബാങ്കില്‍നടന്ന 500കോടി രൂപയുടെ തട്ടിപ്പ് സംബന്ധിച്ച നിര്‍ണ്ണായക വിവരങ്ങള്‍ റെയ്ഡുകളില്‍ ലഭിച്ചതായി ഇ.ഡി അറിയിച്ചിരുന്നു. തൃശ്ശൂര്‍ സഹകരണബാങ്ക്, ജില്ലാ സഹകരണബാങ്ക്, അയ്യന്തോള്‍ സഹകരണബാങ്ക്, ആധാരം എഴുത്തുകാരായ മൂന്നുപേരുടെ ഓഫീസുകള്‍, ഒരു സ്വര്‍ണ്ണവ്യാപാരി, ബിനാമികളുടെ വീടുകള്‍, കൊച്ചിയില്‍ ബിസിനസുകാരന്റെ ഓഫീസ് എന്നിവിടങ്ങളില്‍ നടത്തിയ റെയ്ഡുകളില്‍ തട്ടിപ്പുകാരുടെ ബിനാമി ഭൂസ്വത്തുക്കളുടെ ഉള്‍പ്പെടെ രേഖകള്‍ പിടിച്ചെടുത്തിരുന്നു. ഇവയും കണ്ടുകെട്ടിയവയില്‍ ഉള്‍പ്പെടുന്നതായാണ് ഇ.ഡി വൃത്തങ്ങള്‍ നല്‍കുന്ന വിവരം.