കാശ്‌മീര്‍ റിക്രൂട്ട്‌മെന്റ്‌ കേസില്‍ എല്ലാ പ്രതികള്‍ക്കും ജീവപര്യന്തം; നാല്‌ പ്രതികള്‍ക്ക്‌ ഇരട്ട ജീവപര്യന്തം
കാശ്‌മീര്‍ റിക്രൂട്ട്‌മെന്റ്‌ കേസില്‍ തടിയന്റവിട നസീര്‍ അടക്കം നാല്‌ പ്രതികള്‍ക്ക്‌ ഇരട്ടജീവപര്യന്തം ശിക്ഷ വിധിച്ചു. ബാക്കി ഒന്‍പതു പേര്‍ക്ക്‌ ജീവപര്യന്തമാണ്‌ ശിക്ഷ. കൊച്ചിയിലെ പ്രത്യേക എന്‍.ഐ.എ കോടതി ജഡ്‌ജി എസ്‌. വിജയകുമാര്‍ ആണ്‌ ശിക്ഷ വിധിച്ചത്‌. എല്ലാവരും 50,000 രൂപ പിഴയും അടയ്‌ക്കണം.
മലപ്പുറം കാവഞ്ചേരി മുറ്റനൂര്‍ തായാട്ടില്‍ വീട്ടില്‍ അബ്ദുല്‍ ജബ്ബാര്‍, എറണാകുളം പള്ളിക്കര കണിയാട്ട്‌ കുടിയില്‍ വീട്ടില്‍ സര്‍ഫറാസ്‌ നവാസ്‌, പെരുമ്പാവൂര്‍ പാറപ്പുറം മുണ്ടകടവ്‌ വീട്ടില്‍ സാബിര്‍ പി. ബുഖാരി എന്നിവര്‍ക്കാണ്‌ തടിയന്റവിട നസീറിനൊപ്പം ഇരട്ട ജീവപര്യന്തം ശിക്ഷ ലഭിച്ചത്‌.
വിധി പ്രസ്‌താവത്തിനു മുന്നോടിയായി രാവിലെ കേസ്‌ പരിഗണിക്കവേ ജയില്‍ശിക്ഷ ബാംഗ്ലൂരില്‍ വേണമെന്ന്‌ ചില പ്രതികള്‍ ആവശ്യപ്പെട്ടിരുന്നു. അപൂര്‍വങ്ങളില്‍ അപൂര്‍വമായ കേസായി പരിഗണിക്കരുതെന്നും കടുത്ത ശിക്ഷ നല്‍കരുതെന്നും അബ്ദുള് ജബ്ബാര്‍ ഉള്‍പ്പെടെയുള്ള പ്രതികള്‍ ആവശ്യപ്പെട്ടു. എന്നാല്‍ പ്രതികളോട്‌ കരുണ കാട്ടരുതെന്നും ഇവര്‍ രാജ്യത്തിനെതിരേ യുദ്ധം ചെയ്‌തവരാണെന്നുമായിരുന്നു പ്രോസിക്യൂഷന്റെ വാദം.
കനത്ത സുരക്ഷയിലാണ്‌ 13 പ്രതികളെയും കോടതിയില്‍ ഹാജരാക്കിയത്‌. മാധ്യമപ്രവര്‍ത്തകരെ ഉള്‍പ്പെടെ കര്‍ശന പരിശോധനകള്‍ക്ക്‌ ശേഷമാണ്‌ കോടതി പരിസരത്തേക്ക്‌ കടത്തിവിട്ടത്‌. വിധി പ്രസ്‌താവിച്ച ശേഷം ഉടന്‍തന്നെ നടപടിക്രമങ്ങള്‍ പൂര്‍ത്തിയാക്കി പ്രതികളെ കോടതി പരിസരത്തുനിന്നും മാറ്റുകയും ചെയ്‌തു.
2006-2008 കാലത്ത്‌ കേരളത്തില്‍ നിന്നുള്ള യുവാക്കളെ ലഷ്‌കര്‍ ഇ തൊയ്‌ബയുടെ പരിശീലന ക്യാമ്പില്‍ പങ്കെടുക്കാന്‍ റിക്രൂട്ട്‌ ചെയ്‌തു എന്നാണ്‌ കേസ്‌. കേസിലെ നാലുപ്രതികള്‍ കാശ്‌മീരില്‍ സൈന്യവുമായി നടന്ന ഏറ്റുമുട്ടലില്‍ കൊല്ലപ്പെട്ടിരുന്നു. രക്ഷപ്പെട്ട അബ്ദുള് ജബ്ബാറിനെ നാട്ടില്‍ നിന്നാണ്‌ പോലീസ് അറസ്‌റ്റ്‌ ചെയ്‌തത്‌.
രാജ്യദ്രോഹം, തീവ്രവാദികളുമായി ചേര്‍ന്ന്‌ രാജ്യത്തിനെതിരെ യുദ്ധം ചെയ്യല്‍, അനധികൃതമായി ആയുധം കൈയ്യില്‍ വെക്കല്‍ തുടങ്ങിയ കുറ്റങ്ങളാണ്‌ പ്രതികള്‍ക്കുമേല്‍ ചുമത്തിയിരിക്കുന്നത്‌.
https://www.facebook.com/Malayalivartha
