ഡാറ്റാ സെന്റര് കേസില് സിബിഐ അന്വേഷണം വേണമെന്ന് മാറ്റിപ്പറഞ്ഞ സര്ക്കാരിന് സുപ്രീംകോടതിയുടെ രൂക്ഷ വിമര്ശനം, കോടതിയെ കളിയാക്കുകയാണോ?
ഡാറ്റ സെന്റര് കേസ് അഡ്വ.ജനറല് സുപ്രീംകോടതിയില് സത്യവാങ് മൂലം സമര്പ്പിക്കുമെന്ന് സംസ്ഥാന സര്ക്കാര് കോടതിയെ അറിയിച്ചു. നേരത്തെ കേസിന്റെ വാദം കേള്ക്കുന്നതിനെ കേരള സര്ക്കാരിനെ സുപ്രീംകോടതി രൂക്ഷമായി വിമര്ശിച്ചിരുന്നു. ഡാറ്റാ സെന്റര് കൈമാറ്റത്തെ കുറിച്ച് സിബിഐ അന്വേഷണം അനിവാര്യമെന്ന കേരള സര്ക്കാരിന്റെ സത്യവാങ് മൂലം തൃപ്തികരമല്ലെന്ന് സുപ്രീംകോടതി പറഞ്ഞിരുന്നു. സര്ക്കാര് കോടതിയെ കളിയാക്കുകയാണോ എന്നും കോടതി ആരാഞ്ഞു. കേസില് മുമ്പ് ഹാജരായ അറ്റോണി ജനറല് എന്തുകൊണ്ട് ഇന്ന് ഹാജരായില്ല എന്നും ജസ്റ്റിസ് എച്ച്.എല് ദത്തു ചോദിച്ചു.
കേസ് ഈ മാസം 21ന് വീണ്ടും പരിഗണിക്കും. കേസന്വേഷണവുമായി മുന്നോട്ട് പോവേണ്ടെന്ന് അറ്റോര്ണി ജനറല് ഗുലാം. ഇ വഹന്വതിയുടെ ഉപദേശം തള്ളിയാണ് സര്ക്കാര് സത്യവാങ്മൂലം നല്കിയിരുന്നത്. അതുകൊണ്ട് തന്നെ സര്ക്കാരിന് വേണ്ടി അറ്റോണി ജനറല് തിങ്കളാഴ്ച്ച കോടതിയില് ഹാജരായിരുന്നില്ല. പകരം മുതിര്ന്ന അഭിഭാഷകനായ വി.ഗിരിയാണ് ഹാജരായത്.
കഴിഞ്ഞ തവണ കേസ് പരിഗണിച്ചപ്പോള് സി.ബി.ഐ അന്വേഷണം വേണ്ടെന്ന സര്ക്കാര് നിലപാടായിരുന്നു അറ്റോര്ണി ജനറല് കോടതിയില് അറിയിച്ചിത്. സി.ബി.ഐ. അന്വേഷണവുമായി മുന്നോട്ടുപോകേണ്ടതില്ലെന്ന് താന് മുഖ്യമന്ത്രിയെ അറിയിച്ചെന്നും അദ്ദേഹമത് അംഗീകരിച്ചുവെന്നുമാണ് അറ്റോര്ണി ജനറല് കഴിഞ്ഞ തവണ കേസ് പരിഗണിച്ചപ്പോള് പറഞ്ഞത്.
പിന്നീട് സര്ക്കാര് നിലപാട് മാറ്റിയ സാഹചര്യത്തിലാണ് സര്ക്കാരിന് കോടതിയുടെ വിമര്ശനം. ഒരാഴ്ച്ച മുമ്പ് കോടതിയില് അറിയിച്ച നിലപാട് മാറ്റി പറഞ്ഞതാണ് കോടതിയെ ചൊടിപ്പിച്ചത്. സി.ബി.ഐ അന്വേഷണം ചോദ്യം ചെയ്ത് ടി.ജി നന്ദകുമാര് ഫയല് ചെയ്ത ഹര്ജിയാണ് സുപ്രീം കോടതി പരിഗണിക്കുന്നത്.
https://www.facebook.com/Malayalivartha