അന്സിലിനെ കൊലപ്പെടുത്താന് അഥീന റെഡ്ബുള്ളില് കളനാശിനി കലര്ത്തി നല്കി
കോതമംഗലം മാതിരപ്പള്ളിയില് അന്സിലിന് കൊല്ലപ്പെട്ട കേസില് പെണ്സുഹൃത്ത് അഥീന റെഡ്ബുള്ളില് കളനാശിനി കലര്ത്തി നല്കിയെന്ന് പുതിയ കണ്ടെത്തല്. അഥീനയുടെ വീട്ടില്നിന്ന് എനര്ജി ഡ്രിങ്കിന്റെ കാലി കാനുകള് പൊലീസ് കണ്ടെടുത്തു.
കൃത്യം നടന്ന ദിവസം അന്സിലിനെ വീട്ടിലേക്ക് വരുത്താന് നിരന്തരം അഥീന ഫോണ് വിളിച്ചിരുന്നു എന്നതിനും പൊലീസിന് തെളിവുകള് ലഭിച്ചു. ടിപ്പര് ഡ്രൈവറായ അന്സിലും (38) അഥീന (30)യും തമ്മില് ഏറെ നാളായി അടുപ്പമുണ്ടായിരുന്നു.
വിവാഹിതനും രണ്ടു കുട്ടികളുടെ പിതാവുമാണ് അന്സില്. അഥീനയെ സംശയിച്ചു തുടങ്ങിയതോടെ അന്സില് ഉപദ്രവമാരംഭിച്ചു. ഇതിനിടെ അഥീന പൊലീസിനെ സമീപിക്കുകയും പരാതിയില് കേസാവുകയും ചെയ്തതോടെ പണം വാഗ്ദാനം ചെയ്ത് ഒതുക്കാനും അന്സില് ശ്രമിച്ചു. കോടതിയില് അഥീന മൊഴിമാറ്റിയതോടെ കേസ് റദ്ദായെങ്കിലും അന്സില് പണം നല്കിയില്ല. പലപ്പോഴായി മൂന്നുലക്ഷം രൂപ അഥീനയില്നിന്നു കൈപ്പറ്റുകയും ചെയ്തു. ഉപദ്രവം വര്ധിച്ചതോടെ ബന്ധത്തില്നിന്നു പിന്മാറാന് അഥീന ശ്രമിച്ചെങ്കിലും അന്സില് തയാറായില്ല. ഇതോടെയാണ് അന്സിലിനെ കൊലപ്പെടുത്താന് അഥീന തീരുമാനമെടുത്തതെന്നാണ് പൊലീസ് പറയുന്നത്.
കോതമംഗലത്തുനിന്നു ഗൂഗിള് പേ വഴി പണം നല്കിയാണ് കളനാശിനി അഥീന വാങ്ങിയത്. ജൂലൈ 29ന് അഥീന പലതവണ അന്സിലിനെ വിളിച്ചിരുന്നു. ഫോണ് എടുക്കാന് തയാറാകാതിരുന്ന അന്സില്, അഥീനയുടെ നമ്പര് ബ്ലോക് ചെയ്തു. തുടര്ന്ന് അഥീന ഒരു സുഹൃത്തിനെ വിളിച്ച് കോണ്ഫറന്സ് കോള് വഴി അന്സിലിനോട് സംസാരിക്കുകയും വീട്ടിലേക്ക് വിളിക്കുകയും ചെയ്തു. അന്സില് മദ്യപിക്കില്ല. എന്നാല് മറ്റെന്തോ ലഹരി ഉപയോഗിച്ചാണ് അന്സില് എത്തിയതെന്നാണ് അഥീന നല്കിയിക്കുന്ന മൊഴി. ജൂലൈ 30ന് പുലര്ച്ചെ നാലിന് വീട്ടിലെത്തിയ അന്സിലിന് അഥീന എനര്ജി ഡ്രിങ്കില് കളനാശിനി കലക്കി നല്കി.
അരമണിക്കൂറിനകം കുഴഞ്ഞുവീണ അന്സില് പൊലീസിനെ ഫോണില് വിളിച്ചു. ഇതുകണ്ട അഥീന ഫോണ് വാങ്ങി തൊട്ടടുത്ത പൊന്തക്കാട്ടിലേക്ക് എറിഞ്ഞു. പിന്നീട് പൊലീസിനെയും അന്സിലിന്റെ ബന്ധുക്കളെയും അഥീന തന്നെ വിളിച്ചു. ബന്ധുക്കളെത്തിയാണ് അന്സിലിനെ ആശുപത്രിയിലേക്ക് മാറ്റിയത്. ആശുപത്രിയിലേക്ക് പോകുംവഴി 'അവള് എന്നെ ചതിച്ചു' എന്ന് അന്സില് പറഞ്ഞതാണ് മരണമൊഴി.
അന്സിലിന്റെ മരണശേഷം പൊലീസ് നടത്തിയ പരിശോധനയില് വീടിനുസമീപത്തുനിന്ന് എനര്ജി ഡ്രിങ്കിന്റെ കാനും ഫോണും കണ്ടെടുത്തിരുന്നു. ഏറെനാളത്തെ ആസൂത്രത്തിനൊടുവിലാണ് കൊലപാതകമെങ്കിലും മറ്റാരുടെയും സഹായം അഥീനയ്ക്ക് ലഭിച്ചിട്ടില്ലെന്നാണ് പൊലീസിന്റെ കണ്ടെത്തല്. കളനാശിനി വാങ്ങിയ കടയിലും വീട്ടിലും എത്തിച്ചുള്ള തെളിവെടുപ്പ് പൂര്ത്തിയായതോടെ അദീനയെ ഇന്നു വീണ്ടും റിമാന്ഡ് ചെയ്തു.
https://www.facebook.com/Malayalivartha
