മുതുമല ടൈഗര്‍ റിസര്‍വ് (എംടിആര്‍) ബഫര്‍ സോണില്‍ ആദിവാസി സ്ത്രീയെ കൊലപ്പെടുത്തിയെന്ന് സംശയിക്കുന്ന കടുവയെ പിടികൂടാനുള്ള ശ്രമം തുടങ്ങി തമിഴ്നാട് വനംവകുപ്പ് ഉദ്യോഗസ്ഥര്‍.

എംടിആര്‍ടി 37 എന്ന ആണ്‍കടുവയെ പിടികൂടാനാണ് ശ്രമം. മസിനഗുഡിക്കടുത്തുള്ള മാവനള്ളയില്‍ വെച്ച് കഴിഞ്ഞ 24-ാം തീയതി നദിക്ക് സമീപം ആടുകളെ മേയ്ക്കുന്നതിനിടെയാണ് ബി. നാഗിയമ്മാള്‍ (60) എന്ന സ്ത്രീ കടുവയുടെ ആക്രമണത്തില്‍ കൊല്ലപ്പെട്ടത്.

മൃതദേഹത്തിന്റെ തല ഒരു സ്ഥലത്തും ശരീരം മറ്റൊരു സഥലത്തുമായാണ് കാണപ്പെട്ടിരുന്നത്. ആക്രമിച്ച കടുവയ്ക്ക് ഏകദേശം 12 വയസ്സ് പ്രായമുണ്ടെന്നാണ് വനംവകുപ്പ് ഉദ്യോഗസ്ഥരുടെ നിഗമനം.

കടുവയെ പിടികൂടുന്നതിനായി വനംവകുപ്പ് സമഗ്രമായ പദ്ധതിയാണ് നടപ്പാക്കുന്നത്. 25 സ്റ്റാഫ് അംഗങ്ങള്‍ അടങ്ങുന്ന ഒന്നിലധികം ഫീല്‍ഡ് ടീമുകള്‍ പ്രദേശത്ത് പട്രോളിങ് നടത്തുന്നുണ്ട്.