ഈ കേസ് നിലനിൽക്കുമോ..? രാഹുൽ അകത്താകുമോ..? ഇതൊക്കെയാണ് ഇപ്പോഴത്തെ ചർച്ച വിഷയം. രാഹുൽ മാങ്കൂട്ടത്തിൽ ഭീഷണിപ്പെടുത്തിയും മറ്റും ഉപദ്രവിച്ചിട്ടുണ്ടെങ്കിൽ അത് യുവതിയുടെ ഭർത്താവ് അറിഞ്ഞിരുന്നുവോ? അല്ലെങ്കിൽ യുവതി ഭർത്താവിനോട് പറഞ്ഞിരുന്നുവോ എന്ന ചോദ്യവും ഇതിനകം തന്നെ ഉയർന്നുകഴിഞ്ഞിട്ടുണ്ട്. ഇക്കാര്യങ്ങൾ ചൂണ്ടിക്കാട്ടി യുവതിയുടെ ഭർത്താവാണ് യഥാർത്ഥ ഇര എന്ന വാദവും ചില കേന്ദ്രങ്ങൾ ഇപ്പോൾ ഉയർത്തി തുടങ്ങിയിട്ടുണ്ട്. പക്ഷെ ഇപ്പോഴിതാ എല്ലാം തകിടം മറിക്കുന്ന രീതിയിലുള്ള കൂടുതൽ വ്യക്തതയുള്ള മൊഴി പുറത്ത് വന്നിരിക്കുന്നു.

2024 ആഗസ്റ്റ് ഹിന്ദുമതാചാരപ്രകാരം ഒരു ക്ഷേത്രത്തിൽ വച്ച് യുവതിയുടെ വിവാഹം നടന്നെങ്കിലും ബന്ധം അധികനാൾ നീണ്ടുനിന്നില്ല. പാലക്കാട് നിന്നും പിന്നീട് തിരുവനന്തപുരത്തേക്ക് യുവതി താമസം മാറി. വിവാഹ ബന്ധം പിരിഞ്ഞ് അഞ്ച് മാസത്തിന് ശേഷമാണ് രാഹുൽ മാങ്കൂട്ടത്തിലുമായി സൗഹൃദത്തിലാകുന്നത്. 2025 മാർച്ച് മാസം മുതലാണ് രാഹുലുമായി തിരുവനന്തപുരത്തെ ഫ്ലാറ്റിൽ വച്ച് ശാരീരികബന്ധം നടന്നതെന്നും യുവതി പൊലീസിന് നൽകിയ മൊഴിയിൽ പറയുന്നു.

ആദ്യ വിവാഹത്തിന് ശേഷമാണ് രാഹുൽ മാങ്കൂട്ടത്തിലിനെ പരിചയപ്പെട്ടത്. ഒരു മാസം മാത്രം നീണ്ടുനിന്ന വിവാഹം രജിസ്റ്റർ ചെയ്‌തിട്ടില്ല എന്നാണ് യുവതിയുടെ ഭാഗത്ത് നിന്ന് വരുന്നത്. വ്യക്തിപരമായ കുടുംബപ്രശ്‌നത്തിൽ പ്രത്യേകിച്ച് ഭർത്താവുമായുള്ള പ്രശ്‌നത്തിൽ രാഹുൽ മാങ്കൂട്ടത്തിൽ ഇടപെട്ടിട്ടുണ്ട്. പിന്നീട് രാഹുൽ മാങ്കൂട്ടത്തിലുമായി സൗഹൃദത്തിലാവുകയും അത് പ്രണയത്തിൽ കലാശിക്കുകയുമായിരുന്നു.

2025 മാര്‍ച്ച് നാലിന് തൃക്കണ്ണാപുരത്തെ അതിജീവിതയുടെ ഫ്ലാറ്റില്‍ രാഹുല്‍ മാങ്കൂട്ടത്തില്‍ ദേഹോപദ്രവമേല്‍പ്പിച്ചുകൊണ്ട് ലൈംഗിക ബന്ധത്തിലേര്‍പ്പെട്ടു എന്നുള്‍പ്പെടെയാണ് എഫ്ഐആറിലെ പരാമര്‍ശങ്ങള്‍. മാര്‍ച്ച് 17 നു ഭീഷണിപ്പെടുത്തി അതിജീവിതയുടെ നഗ്നദൃശ്യങ്ങള്‍ പകര്‍ത്തി. ബന്ധം പുറത്തു പറഞ്ഞാല്‍ ജീവിതം നശിപ്പിക്കുമെന്ന് തുടര്‍ച്ചയായ ഭീഷണി. അതിജീവിത ഗര്‍ഭിണിയാണെന്ന് അറിഞ്ഞും നിരന്തര പീഡനം തുടര്‍ന്നുവെന്നും എഫ്ഐആറില്‍ പറയുന്നു.

ഗര്‍ഭിണിയാണെന്ന് അറിഞ്ഞിട്ടും ഏപ്രില്‍ 22 -ാം തീയതി തൃക്കണ്ണാപുരത്തെ ഫ്ലാറ്റില്‍ വെച്ചും, മെയ് അവസാനം പാലക്കാട്ടെ പ്രതിയുടെ വീട്ടില്‍ വെച്ചും പല തവണ പീഡിപ്പിച്ചുവെന്നും എഫ്‌ഐആറില്‍ പറയുന്നുണ്ട്. അതേസമയം, യുവതി വിവാഹിതയാണെന്ന കാര്യം തനിക്ക് അറിയാമായിരുന്നുവെന്ന് രാഹുല്‍ മുന്‍കൂര്‍ ജാമ്യാപേക്ഷയില്‍ പറഞ്ഞിട്ടുമുണ്ട്. ഭര്‍ത്താവിന്റെ ഉപദ്രവങ്ങള്‍ വിവരിച്ചാണ് തന്നോട് സംസാരിച്ചതെന്നും, ആ ബന്ധമാണ് വളര്‍ന്നതും പിന്നീട് ലൈംഗികബന്ധത്തില്‍ എത്തിയത് എന്നും രാഹുല്‍ മുന്‍കൂര്‍ ജാമ്യാപേക്ഷയില്‍ വ്യക്തമാക്കിയിട്ടുണ്ട്.