ജീവപര്യന്തം തടവു കിട്ടാവുന്ന ബലാത്സംഗക്കുറ്റമുൾപ്പെടെ ചുമത്തി രാഹുൽ മാങ്കൂട്ടത്തിൽ എം.എൽ.എയ്ക്കെതിരെ കേസ്. പിന്നാലെ, ഉഭയസമ്മതപ്രകാരമുള്ള ശാരീരിക ബന്ധമെന്നും രാഷ്ട്രീയഗൂഢാലോചനയെന്നും രാഹുലിന്റെ മുൻകൂർ ജാമ്യാപേക്ഷ. നിർണായകം കോടതി നിലപാട്.

രാഹുൽ ഒളിവിൽ തുടരുകയാണ്. സംസ്ഥാനം വിട്ടെന്ന് പൊലീസ്. റൂറൽ എസ്.പി കെ.എസ്.സുദർശനന്റെ നേതൃത്വത്തിൽ അഞ്ചരമണിക്കൂർ യുവതിയുടെ മൊഴിയെടുത്തതിന് പിന്നാലെ ഭാരതീയന്യായസംഹിതയിലെ ഏഴും ഐ.ടിആക്ടിലെ ഒന്നും വകുപ്പുചുമത്തിയാണ് വലിയമല പൊലീസ് ജാമ്യമില്ലാ കേസെടുത്തത്. ഗർഭച്ഛിദ്രത്തിന് മരുന്നെത്തിച്ച സുഹൃത്ത് ജോബി ജോസഫ് രണ്ടാം പ്രതിയാണ്. ബലാത്സംഗം നടന്നത് നേമം സ്റ്റേഷൻ പരിധിയിലായതിനാൽ എഫ്.ഐ.ആറും 20പേജുള്ള മൊഴിയുമടക്കം അവിടേക്ക് കൈമാറി.

സിറ്റി പൊലീസ് ഡെപ്യൂട്ടി കമ്മിഷണർ ദീപക് ധൻകറിന്റെ മേൽനോട്ടത്തിൽ ഡി.സി.ആർ.ബി അസി.കമ്മിഷണർ ദിൻരാജിന്റെ നേതൃത്വത്തിലുള്ള പ്രത്യേകസംഘമാണ് അന്വേഷിക്കുന്നത്.നെയ്യാറ്റിൻകര മജിസ്ട്രേറ്റ്കോടതി രഹസ്യമൊഴി രേഖപ്പെടുത്തി. രാഹുൽ രാജ്യംവിടാതിരിക്കാൻ ഇമിഗ്രേഷൻ ബ്യൂറോയ്ക്ക് വിവരം കൈമാറി.