കുറച്ച് കാലം മുൻപ് വരെ നമ്മുടെ റോഡ് വക്കുകളിലെ ഒരു സാധാരണ കാഴ്ചയായിരുന്നു  ജെയ്സൺ വാട്ടർ ടാപ്പ്. പുതിയ തലമുറയ്ക്ക് ഇത് അന്യം ആയിരിക്കും .ഇരുപതാം നൂറ്റാണ്ടിൽ ലോകമെമ്പാടും പ്രചാരത്തിലുണ്ടായിരുന്ന ജെയ്സൺ വാട്ടർ ടാപ്പ് കണ്ടുപിടിച്ചത് തിരുവനന്തപുരം സ്വദേശിയായ സുബ്രഹ്മണ്യ അയ്യരാണ്. വെള്ളം പാഴാകുന്നത് തടയുക എന്ന ലക്ഷ്യത്തോടെ ഒരു ടാപ്പ് രൂപകൽപ്പന ചെയ്യുകയായിരുന്നു അയ്യർ. പിന്നീട് ഇത് ലോകമെമ്പാടും ഉപയോഗിക്കപ്പെട്ടു.

ജെയ്‌സൺ വാട്ടർ ടാപ്പ്  വേസ്റ്റ് നോട്ട് വാട്ടർ ടാപ്പ് എന്നും അറിയപ്പെടുന്നു . ദക്ഷിണേന്ത്യയിലെ റോഡുകളിൽ ഈ ടാപ്പുകൾ ഒരു സാധാരണ കാഴ്ചയായിരുന്നു. നമ്മിൽ പലരും ഈ ടാപ്പിൽ നിന്ന് വെള്ളം കുടിച്ചവരായിരിക്കുമെങ്കിലും അത് കണ്ടുപിടിച്ചത് ഒരു മലയാളിയാണെന്ന് അധികമാർക്കും അറിയില്ല.  

സമൂഹത്തിലെ സാമ്പത്തിക വികസനവും കുപ്പിവെള്ളത്തോടുള്ള ആസക്തിയും കാരണം റോഡുകളിലെ ഇത്തരം പൊതുജല ടാപ്പുകൾ ഇപ്പോൾ ഏതാണ്ട് ഇല്ലാതായി, എന്നിരുന്നാലും ഇന്ത്യൻ ഉപഭൂഖണ്ഡത്തിലുടനീളം വളരെ പ്രചാരത്തിലുണ്ടായിരുന്ന ഇവ ഇന്ത്യൻ റെയിൽ‌വേ നടത്തുന്ന മിക്ക പരമ്പരാഗത റെയിൽ‌വേ സ്റ്റേഷനുകളിലും ട്രെയിനുകളിലും ഇപ്പോഴും കാണപ്പെടുന്നു.  90-കൾ വരെയും നമ്മുടെ നാട്ടുവഴികളിലും നഗരങ്ങളിലുമെല്ലാം സാധാരണമായിരുന്നു ജയ്സൺ വാട്ടർ ടാപ്പുകൾ. 1984ൽ കേരള വാട്ടർ അതോരിറ്റി സ്ഥാപിതമായ ശേഷം സംസ്ഥാനത്തെമ്പാടും സ്ഥാപിച്ച ജലവിതരണ പൈപ്പുകളിൽ മിക്കതിലും ഉപയോഗിച്ചത് ജയ്സൺ വാട്ടർ ടാപ്പുകളായിരുന്നു. ഈ ടാപ്പിൽ നിന്ന് വെള്ളം മൊത്തിക്കുടിച്ചവർക്ക് അവധിയില്ലാത്ത നൊസ്റ്റാൾജിയ സമ്മാനിക്കും അതിന്റെ ചിത്രങ്ങൾ പോലും. കോടമ്പാക്കത്ത് പൈപ്പുവെള്ളം കുടിച്ച് ജീവിച്ചിട്ടുണ്ട് എന്നൊരു സിനിമാക്കാരൻ പറഞ്ഞാൽ, അയാൾ ജെയ്സൺ ടാപ്പിൽ നിന്ന് വെള്ളം കുടിച്ചിട്ടുണ്ട് എന്നാണർത്ഥം.

റോഡ് സൈഡ് വാട്ടർ ടാപ്പുകൾ ഉപയോഗശേഷം ആളുകൾ കൃത്യമായി അടക്കാത്തത് മൂലം ധാരാളം വെള്ളം പാഴായിപ്പോകുന്നത് അദ്ദേഹത്തിന്റെ ശ്രദ്ധയിൽപ്പെട്ടു. ഈ പ്രശ്നം എങ്ങനെ പരിഹരിക്കാമെന്ന് നിരന്തരം ചിന്തിച്ചു കൊണ്ടിരുന്ന അദ്ദേഹം ചില എഞ്ചിനീയർ സുഹൃത്തുക്കളുടെ സഹായത്തോടെ ഒരു ടാപ്പ് ഉണ്ടാക്കി. പിന്നീട് ടാപ്പുകളുടെ പ്രവർത്തനക്ഷമത കൂടുതൽ മെച്ചപ്പെടുത്തുകയും ഈ ടാപ്പ് ഡിസൈന് പേറ്റന്റ് നേടുകയും ചെയ്തു. ടാപ്പ് കണ്ടുപിടിച്ച ജെ പി സുബ്രഹ്മണ്യ അയ്യർ ഒരുപക്ഷെ കാലത്തിനു മുമ്പേ സഞ്ചരിച്ച ഒരു കണ്ടുപിടിത്തക്കാരനും സംരംഭകനുമെല്ലാമായിരുന്നു. തോമസ് ആൽവാ എഡിസനെ പോലെ കണ്ടുപിടിത്തത്തിന് പേറ്റന്റ് എടുക്കുകയും അതിന്റെ ബിസിനസ് സാധ്യതകൾ നന്നായി ഉപയോഗപ്പെടുത്തുകയും ചെയ്ത ഒരാൾ.  രാജാംഗം, എസ്എൽ നാരായണൻ എന്നീ സുഹൃത്തുക്കളാണ് അയ്യരെ സഹായിച്ചത്. ഇരുവരും ദക്ഷിണേന്ത്യൻ റെയിൽവേയിലെ വലിയ ഉദ്യോഗസ്ഥരായിരുന്നു.




തുടർന്ന് ജെയ്സൺ ടാപ്പുകൾ വാണിജ്യാടിസ്ഥാനത്തില‍ നിർമ്മിക്കുന്നതിനായി സുബ്രഹ്മണ്യ അയ്യർ കരമനയിൽ ഒരു ഫാക്ടറി സ്ഥാപിച്ചു. ട്രേഡ് യൂണിയൻ സമരങ്ങളുടെ പേരിലെന്ന് പറയപ്പെടുന്നു, അയ്യർ ഫാക്ടറി കോയമ്പത്തൂരിലേക്ക് മാറ്റി. ഇന്ത്യയിലും ശ്രീലങ്കയിലും ഒഴികെ ലോകമെമ്പാടും ഈ ടാപ്പ് ഉൽപ്പാദിപ്പിക്കുന്നതിനും വിൽക്കുന്നതിനുമുള്ള അവകാശം ഒരു ജർമ്മൻ കമ്പനിയായ 'ഹൈഡ്രോ പ്ലാൻ' വാങ്ങി. അങ്ങനെ യൂറോപ്പ്, ഇംഗ്ലണ്ട്, ജപ്പാൻ എന്നിവിടങ്ങളിലേക്ക് ഈ ടാപ്പ് വ്യാപിച്ചു.

എന്നാൽ, ജെയ്‌സൺ വാട്ടർ ടാപ്പുകൾ വരുന്നതിനുമുമ്പ് ഒരു ക്രൂഡ് സെൽഫ് ക്ലോസിംഗ് വാട്ടർ ടാപ്പ് ഉണ്ടായിരുന്നോ എന്ന് വ്യക്തമല്ല.എന്തുതന്നെ ആയാലും ലോകവ്യാപകമായി ഉപയോഗിച്ചിരുന്ന, വെള്ളം പാഴാക്കാതെ ഈ ടാപ്പുകൾ നമ്മുടെ നാട്ടിൽ നിന്ന് ഉണ്ടായതാണെന്നുള്ളത് നമുക്ക് അഭിമാനിക്കാവുന്ന കാര്യമല്ലേ !!!

ഇപ്പോൾ സെൻസർ ഉള്ള പല പല ഓട്ടോമാറ്റിക് വാട്ടർ സേവിങ് ന്യൂ ജനറേഷൻ ടാപ്പുകൾ അരങ്ങത്തു വരുമ്പോളും വളരെ നാളുകൾ നമ്മുടെ ദാഹമകറ്റിയിരുന്ന, പരമാവധി അമൂല്യ ജലം പിശുക്കി തന്നു കൊണ്ടിരുന്ന പൊതു ടാപ്പുകൾ പലർക്കും ഗൃഹാതുരത്വം ആയി ഓർമയിൽ തങ്ങി നിൽക്കുന്നുണ്ട്