മുൻ നിശ്ചയിക്കപ്പെട്ടിട്ടുള്ളത് പ്രകാരം നടത്തപ്പെടുന്ന ദേശീയ കടുവാ കണക്കെടുപ്പിന്റെ ആദ്യ ഘട്ടം കേരളത്തിൽ നടക്കുന്നത് ഡിസംബർ 1 മുതൽ 8 വരെയാണ്. ഡിസംബർ 8-ന് രാവിലെ 2 കി.മീ നീളത്തിലുള്ള ലൈൻ ട്രാൻസെക്ടിലെ വിവരശേഖരണ ജോലികൾ രാവിലെ 6.30 മണിക്ക് തുടങ്ങി രാവിലെതന്നെ 9.30 മണിയോടെ പൂർത്തിയാക്കുന്ന വിധത്തിലാണ് ക്രമീകരിച്ചിട്ടുള്ളത്.

അന്നേ ദിവസം രാവിലെ 9.30-ന്പ്രസ്തുത ജോലി പൂർത്തീകരിച്ച്, അപ്പോൾ തന്നെ ഈ ജോലിയിൽ ഏർപ്പെട്ടിട്ടുള്ള ഉദ്യോഗസ്ഥർക്ക് മടങ്ങിവരാവുന്നതാണ്.

കടുവാ കണക്കെടുപ്പ് ജോലിക്ക് നിയോഗിക്കപ്പെട്ടിട്ടുള്ള വനം വകുപ്പ് ഉദ്യോഗസ്ഥർക്ക് 09.12.2025-ന് നടക്കുന്ന തദ്ദേശ സ്വയം ഭരണ സ്ഥാപനങ്ങളിലേക്കുള്ള തെരഞ്ഞെടുപ്പിൽ സ്വന്തം നാടുകളിലെത്തി വോട്ട് രേഖപ്പെടുത്തുന്നതിനുള്ള എല്ലാ സൗകര്യങ്ങളും ഉറപ്പ് വരുത്തണമെന്ന നിർദ്ദേശം എല്ലാ മേഖലാതല മേധാവികൾക്കും നൽകിയിട്ടുണ്ട്.

ഏതെങ്കിലും കാരണവശാൽ വിദൂര വനമേഖലകളിൽ ഡ്യൂട്ടിക്ക് നിയോഗിക്കപ്പെട്ടിട്ടുള്ള ഉദ്യോഗസ്ഥർക്ക് യഥാസമയം സ്വന്തം നാടുകളിൽ എത്തി വോട്ട് ചെയ്യാൻ സാധിക്കാത്ത അവസ്ഥാവിശേഷമുണ്ടാകാനിടയുണ്ടെങ്കിൽ ആ വിവരം മുൻകൂട്ടി കണ്ട് അപ്രകാരമുള്ള ഉദ്യോഗസ്ഥർക്ക്, 09.12.2025-ന് വോട്ട് രേഖപ്പെടുത്തുന്നതിനുള്ള സൗകര്യം ഉറപ്പ് വരുത്തിക്കൊണ്ടുള്ള ക്രമീകരണങ്ങൾ നടത്തേണ്ടതാണെന്നും ബന്ധപ്പെട്ട എല്ലാവർക്കും നിർദ്ദേശം നൽകിയിട്ടുണ്ട്.