കൊച്ചി ഷിപ്യാര്ഡില് കപ്പലിന്റെ അറ്റകുറ്റപ്പണിക്കിടെ മുങ്ങല് വിദഗ്ദ്ധന് മുങ്ങിമരിച്ചു
കൊച്ചി ഷിപ്യാര്ഡില് നാവികസേനാ കപ്പലിന്റെ അറ്റകുറ്റപ്പണിക്കിടെ കരാര് തൊഴിലാളിയായ ഡൈവര് മുങ്ങിമരിച്ചു. മലപ്പുറം സ്വദേശിയായ അന്വര് സാദത്ത് (25) ആണ് മരിച്ചത്. ഇന്നലെ ഉച്ചയ്ക്ക് ശേഷമാണ് അപകടം ഉണ്ടായത്. എറണാകുളം ജില്ലയിലെ ചുള്ളിക്കല് ആസ്ഥാനമായ ഡൈവിംഗ് അക്കാദമിയിലെ മുങ്ങല് വിദഗ്ദ്ധനായിരുന്നു അന്വര് സാദത്ത്. കപ്പലിന്റെ അറ്റകുറ്റപ്പണിക്കായി കമ്പനിയില് നിന്നും മുങ്ങല് വിദഗ്ദ്ധരെ കരാര് അടിസ്ഥാനത്തില് നല്കാറുണ്ട്. ഇന്നലെ രാവിലെ മുതല് കപ്പലിന്റെ അറ്റകുറ്റപ്പണികള് ആരംഭിച്ചിരുന്നു.
ഉച്ച കഴിഞ്ഞ് കപ്പലിന്റെ അടിത്തട്ടിലേക്ക് മുങ്ങിയ അന്വറുമായുള്ള ആശയവിനിമയം അല്പസമയം കഴിഞ്ഞപ്പോള് തടസപ്പെട്ടതോടെയാണ് അപകടം സംഭവിച്ചതായി ഒപ്പമുള്ളവര് മനസിലാക്കിയത്. ഒരു വര്ഷമായി ഈ മേഖലയില് പ്രവര്ത്തിക്കുന്ന ഡൈവറാണ് കപ്പലിന് മുകളില് നിന്ന് സുരക്ഷാ കാര്യങ്ങള് നോക്കിയിരുന്നത്. മേഖലയില് അഞ്ചു വര്ഷത്തെ പ്രവൃത്തി പരിചയം ഉള്ള മുങ്ങല് വിദഗ്ദ്ധനാണ് മരിച്ച അന്വര് സാദത്ത്.
വൈകിട്ട് നാലുമണിയോടെയാണ് അപകടത്തെക്കുറിച്ചുള്ള അറിയിപ്പ് ലഭിച്ചതെന്ന് എറണാകുളം സൗത്ത് പൊലീസ് പറയുന്നു. ആശുപത്രിയില് എത്തിക്കുമ്പോള് ജീവന് ഉണ്ടായിരുന്നെങ്കിലും അഞ്ച് മണിയോടെ മരണം സംഭവിക്കുകയായിരുന്നു. ഇന്ക്വസ്റ്റ് നടപടികള് പൂര്ത്തിയാക്കി വരികയാണെന്നും പോസ്റ്റ്മോര്ട്ടം പൂര്ത്തിയായി കഴിഞ്ഞാല് മൃതദേഹം ഇന്നുതന്നെ നാട്ടിലേക്ക് അയക്കുമെന്നും പൊലീസ് വ്യക്തമാക്കി. സംഭവത്തില് കൂടുതല് അന്വേഷണം നടത്തുമെന്ന് പൊലീസ് കൂട്ടിച്ചേര്ത്തു.
https://www.facebook.com/Malayalivartha
