സത്യം തന്നെ ജയിക്കും,പാലക്കാട് എംഎല്‍എ രാഹുല്‍ മാങ്കൂട്ടത്തിലിന്റെ മുന്‍കൂര്‍ ജാമ്യാപേക്ഷ തള്ളിയ സംഭവത്തില്‍ പ്രതികരിച്ച് നടി റിനി ആന്‍ ജോര്‍ജ്. അതിജീവിതകള്‍ നേരിട്ടിട്ടുള്ളത് ക്രൂര പീഡനമാണ്. അവര്‍ക്ക് കിട്ടുന്ന നീതിയുടെ തുടക്കം മാത്രമാണിതെന്നും റിനി പറഞ്ഞു.

'സത്യം തന്നെ ജയിക്കും. ഒരുപാട് സൈബര്‍ അറ്റാക്ക് നേരിടേണ്ടി വന്നിട്ടുണ്ട്. കെട്ടിച്ചമച്ച കഥകളാണെന്നായിരുന്നു ആരോപണം. ഇപ്പോള്‍ കോടതി തന്നെ ആരോപണങ്ങളൊന്നും കെട്ടിച്ചമച്ചതല്ലെന്ന സൂചനകള്‍ നല്‍കിയിരിക്കുകയാണ്. അത്രയും വിഷമത്തോടുകൂടി പറഞ്ഞുപോയ കാര്യങ്ങള്‍ക്ക് ഒരുപാട് അനുഭവിക്കേണ്ടി വന്നു. എന്നാല്‍, എന്റെ സഹോദരിമാര്‍ക്ക് നീതി ലഭിക്കുന്നതിന് ഒരു നിമിത്തമായി എന്നതില്‍ അത്യന്തം ചാരിതാര്‍ത്ഥ്യമുണ്ട്.

ഇനിയും അതിജീവിതകളുണ്ടെന്നാണ് മനസിലാക്കുന്നത്. അവരും കേസിന്റെ ഭാഗമാകണം. നീതി കണ്ടെത്തണം. പലര്‍ക്കും പല പ്രശ്‌നങ്ങളും ഉണ്ടായിട്ടുണ്ട്. പലരും പറയാന്‍ മടിക്കുന്ന കാര്യങ്ങളാണ് ഞാന്‍ പറയുന്നത്. അതിജീവിതകള്‍ തങ്ങളുടെ ട്രോമയുമായി വീട്ടിലിരിക്കരുത്. സ്ത്രീപക്ഷ നടപടി സ്വീകരിച്ചതിന് കോണ്‍ഗ്രസ് നേതൃത്വത്തിന് എല്ലാ അതിജീവിതമാരുടെ പേരിലും നന്ദി പറയുന്നു' റിനി പറഞ്ഞു.

"