നടന്‍ ദിലീപിനെതിരെ സംസാരിച്ചാല്‍ മുഖത്ത് ആഡിഡൊഴിക്കുമെന്ന് ചിലര്‍ ഭീഷണിപ്പെടുത്തിയതായി സിനിമാ ഡബ്ബിംഗ് ആര്‍ട്ടിസ്റ്റായ ഭാഗ്യലക്ഷ്മി. ഫോണിലൂടെയാണ് സന്ദേശം എത്തിയതെന്നാണ് ഭാഗ്യലക്ഷ്മി പറയുന്നത്. നടി ആക്രമിക്കപ്പെട്ടകേസിലെ വിധി വന്നശേഷമുള്ള ശക്തമായ നിലപാടുകളുടെ പേരിലാണ് ഭീഷണി.

ഇനിയും ദിലീപിനെതിരെ സംസാരിച്ചാല്‍ മുഖത്ത് ആസിഡൊഴിക്കുമെന്ന് ഭീഷണിപ്പെടുത്തിയതിനൊപ്പം കേട്ടാല്‍ അറയ്ക്കുന്ന രീതിയില്‍ അസഭ്യം വിളിച്ചെന്നും ഭാഗ്യലക്ഷ്മി ഒരു സ്വകാര്യ ചാനലിനോട് പറഞ്ഞു. ഭീഷണിവിളിയെത്തിയ ഫോണ്‍നമ്പര്‍ സഹിതം ഉടന്‍ പൊലീസില്‍ പരാതി നല്‍കുമെന്നും അവര്‍ പറഞ്ഞു. നേരത്തേയും ഇത്തരം പരാതികള്‍ നല്‍കിയിട്ടുണ്ടെങ്കിലും അതില്‍ യാതൊരു നടപടിയും ഉണ്ടായിട്ടില്ലെന്നും ഭാഗ്യലക്ഷ്മി പറഞ്ഞു.

കേസിലെ വിധി വന്നശേഷം നടിക്ക് അനുകൂലമായി ശക്തമായ നിലപാടെടുത്ത വ്യക്തിയാണ് ഭാഗ്യലക്ഷ്മി. വിധി നീതിപൂര്‍ണമായില്ലെന്ന രീതിയില്‍ അവര്‍ പ്രതികരിക്കുകയും ചെയ്തു. ഇത്തരം പ്രതികരണങ്ങളാണ് പ്രകോപനത്തിന് കാരണമെന്നാണ് കരുതുന്നത്. കുറ്റാരോപിതന്റെ വില്ലനിസം തീര്‍ന്നിട്ടില്ലെന്നും ഇനിയും താന്‍ ഇതുതന്നെ ചെയ്യും എന്നുള്ള ധൈര്യം അദ്ദേഹത്തിന് കിട്ടിയത് ഈ വിധിയില്‍ കൂടിയാണെന്നും ഭാഗ്യലക്ഷ്മി തുറന്നുപറഞ്ഞിരുന്നു.

'വിധി പുറത്തുവന്നപ്പോള്‍ മറ്റൊരു നടിയുടെ പേരാണ് അയാള്‍ പറഞ്ഞത് . അങ്ങനെപറഞ്ഞത് അയാള്‍ തെറ്റുചെയ്തതുകൊണ്ടാണ്. ഈ വില്ലനിസം അയാള്‍ നിറുത്തില്ല. അതിജീവിത പരാതികൊടുത്തില്ലായിരുന്നെങ്കില്‍ അടുത്ത ഇര മഞ്ജു ആയേനെ. അതിജീവിത കേസുകൊടുത്തതുകൊണ്ടാണ് പല പെണ്‍കുട്ടികളും രക്ഷപ്പെട്ടത്'എന്നാണ് ഐഎഫ്എഫ്‌കെയിലെ ഓപ്പണ്‍ഫോറത്തില്‍ ഭാഗ്യലക്ഷ്മി പറഞ്ഞത്.