ക്രിസ്തുമസ് പുതുവത്സരാഘോഷത്തില് പുതിയ നടപടികളുമായി എക്സൈസ്
ക്രിസ്തുമസ് പുതുവത്സരാഘോഷങ്ങളോടനുബന്ധിച്ച് ജില്ലയില് ലഹരിക്കടത്തും ഉപയോഗവും തടയുന്നതിനായി പരിശോധന ശക്തമാക്കും. എക്സൈസ് സ്പെഷ്യല് എന്ഫോഴ്സ്മെന്റ് ഡ്രൈവിന്റെ ഭാഗമായി കളക്ടറേറ്റില് ചേര്ന്ന ജില്ലാതല ജനകീയ സമിതി അവലോകന യോഗത്തിലായിരുന്നു തീരുമാനം.
ഉത്സവകാലത്തെ മദ്യം, മയക്കുമരുന്ന് കുറ്റകൃത്യങ്ങള് നേരിടുന്നതിനായി ജനുവരി അഞ്ചുവരെയാണ് സ്പെഷ്യല് ഡ്രൈവ് നടത്തുന്നത്. അതിര്ത്തി ചെക്ക് പോസ്റ്റുകള്ക്ക് പുറമെ വിനോദസഞ്ചാര മേഖലയിലും സ്കൂള് പരിസരങ്ങളിലും വ്യാപാര സ്ഥാപനങ്ങളിലും പരിശോധന ശക്തമാക്കാനും യോഗം തീരുമാനിച്ചു. 04712473149 നമ്പറില് 24 മണിക്കൂറും പ്രവര്ത്തിക്കുന്ന കണ്ട്രോള് റൂമിലേക്ക് പൊതുജനങ്ങള്ക്ക് ലഹരി സംബന്ധമായ വിവരങ്ങള് അറിയിക്കാം.
വിവിധ വകുപ്പുകളുടെ നേതൃത്വത്തിലാണ് പരിശോധന നടത്തുക. പൊലീസിന് പുറമെ ഡ്രഗ്സ് കണ്ട്രോള് വിഭാഗവുമായി ചേര്ന്ന് മെഡിക്കല് സ്റ്റോറുകളിലും റെയില്വേ പൊലീസിന്റെ സഹകരണത്തോടെ സ്റ്റേഷന് പരിസരങ്ങളിലും പരിശോധന നടത്തും. വനാതിര്ത്തികളില് വനം വകുപ്പും തീരപ്രദേശങ്ങളില് കോസ്റ്റ് ഗാര്ഡും പരിശോധന വ്യാപിപ്പിക്കും. അന്യ സംസ്ഥാനത്ത് നിന്നുള്ള ലഹരി കടത്ത് തടയുന്നതിനായി ബസുകളിലെ പരിശോധനയും ലേബര് ക്യാമ്പുകളിലെ പരിശോധനയും കര്ശനമാക്കും. ജാമ്യത്തില് കഴിയുന്ന പ്രതികളെ പ്രത്യേകം നിരീക്ഷിക്കും. ഡെപ്യൂട്ടി കളക്ടര് ജി ശ്രീകുമാര് അധ്യക്ഷത വഹിച്ച യോഗത്തില് ഡെപ്യൂട്ടി എക്സൈസ് കമ്മീഷണര് ഷിബു, മറ്റു വകുപ്പ് പ്രതിനിധികള് തുടങ്ങിയവര് പങ്കെടുത്തു.
https://www.facebook.com/Malayalivartha
