കേരളത്തിലും മീനാക്ഷിക്ക് ആരാധകർ... മധുരയിലെ കോടികളുടെ സ്വർണ കവർച്ച; മുഖ്യപ്രതി നിഷാന്തിനെ തേടി കേരളത്തിലേക്കും അന്വേഷണം, മൂന്നാറിലെ യാത്രാ വീഡിയോകൾ നിർണായക സൂചന; അറസ്റ്റിലായ ഇൻഫ്ളുവൻസർ മീനാക്ഷിയുടെ ഇൻസ്റ്റഗ്രാം ഫോളോവേഴ്സിന് വൻ വർധന

മധുരയിലെ തനിഷ്ക് ജ്വല്ലറിയിൽ കോടികൾ വിലമതിക്കുന്ന സ്വർണവും വജ്രാഭരണങ്ങളും കവർന്ന കേസിൽ മുഖ്യപ്രതി നിഷാന്തിനെ തേടി അന്വേഷണം കേരളത്തിലേക്കും വ്യാപിപ്പിച്ച് പൊലീസ്. മോഷണത്തിന് പിന്നാലെ ട്രെയിൻ മാർഗം കടന്നെന്നാണ് അന്വേഷണ സംഘത്തിന്റെ നിഗമനം. അതിനിടെ നിഷാന്തിന്റെ സമൂഹമാധ്യമ അക്കൗണ്ടുകളിൽ കണ്ടെത്തിയ മൂന്നാർ യാത്രയുടെ വീഡിയോകളും പൊലീസിന് നിർണായക സൂചനയായിരിക്കുകയാണ്. കേസിൽ അറസ്റ്റിലായ നിഷാന്തിന്റെ സുഹൃത്തും സോഷ്യൽ മീഡിയ ഇൻഫ്ലുവൻസറുമായ മീനാക്ഷിയുടെ ഇൻസ്റ്റഗ്രാം അക്കൗണ്ടിലും അപ്രതീക്ഷിതമായ മാറ്റം. അറസ്റ്റിനു പിന്നാലെ ഫോളോവേഴ്സിന്റെ എണ്ണം കുത്തനെ ഉയർന്നിരിക്കുകയാണ്.
മധുര ബൈപാസിലെ പുതുതായി പ്രവർത്തനം തുടങ്ങിയ തനിഷ്ക് ജ്വല്ലറിയിലാണ് വൻ കവർച്ച നടന്നത്. നവംബർ 12-ന് പുലർച്ചെയായിരുന്നു സംഭവം. ഷോറൂമിൽ കടന്ന മോഷ്ടാവ് കിലോക്കണക്കിന് സ്വർണവും വജ്രാഭരണങ്ങളുമായി കടന്നുകളയുകയായിരുന്നു. കവർച്ചയുടെ കൃത്യമായ അളവും മൂല്യവും പൊലീസ് ഔദ്യോഗികമായി പുറത്തുവിട്ടിട്ടില്ല. ഏറ്റവും പുതിയ റിപ്പോർട്ടുകൾ പ്രകാരം 10 കിലോ സ്വർണാഭരണങ്ങളും ഒരു കിലോ വജ്രാഭരണങ്ങളുമാണ് കവർന്നത്. തുടക്കത്തിൽ വലിയൊരു മോഷണസംഘത്തിന്റെ ആസൂത്രിത നീക്കമാണെന്നായിരുന്നു പൊലീസിന്റെ സംശയം. എന്നാൽ അന്വേഷണത്തിന്റെ ഭാഗമായി സിസിടിവി ദൃശ്യങ്ങളും മറ്റ് തെളിവുകളും പരിശോധിച്ചതോടെ അന്വേഷണം നിഷാന്തിലേക്ക് എത്തുകയായിരുന്നു.
ഇതിനകം കേസിൽ രണ്ടുപേർ അറസ്റ്റിലായിട്ടുണ്ട്. മുഖ്യപ്രതി നിഷാന്തിന്റെ പിതാവ് സുരേഷും സുഹൃത്തായ മീനാക്ഷി നാച്ചിയാറുമാണ് പിടിയിലായത്. ഇവരിൽനിന്ന് മോഷ്ടിച്ച ആഭരണങ്ങളുടെ ഒരു ഭാഗം പൊലീസ് കണ്ടെത്തിയതായും നേരത്തേ റിപ്പോർട്ടുകൾ പുറത്തുവന്നിരുന്നു. എന്നാൽ മുഖ്യപ്രതിയായ നിഷാന്ത് ഇപ്പോഴും ഒളിവിലാണ്.
നിഷാന്തിനെ കണ്ടെത്താനുള്ള ശ്രമത്തിലാണ് ഇപ്പോൾ പ്രത്യേക അന്വേഷണസംഘം. മോഷണത്തിനു ശേഷം ഇയാൾ ട്രെയിൻ മാർഗം കേരളത്തിലേക്ക് കടന്നിരിക്കാമെന്നാണ് പൊലീസിന്റെ സംശയം. സമൂഹമാധ്യമ അക്കൗണ്ടുകൾ പരിശോധിച്ചപ്പോഴാണ് നിഷാന്ത് മൂന്നാറിലും സമീപ പ്രദേശങ്ങളിലും വിനോദയാത്ര നടത്തിയതിന്റെ വീഡിയോകൾ അന്വേഷണ സംഘത്തിന്റെ ശ്രദ്ധയിൽപ്പെട്ടത്. ഈ സൂചനകളുടെ അടിസ്ഥാനത്തിലാണ് കേരളത്തിലും അന്വേഷണം വ്യാപിപ്പിച്ചിരിക്കുന്നത്. എന്നാൽ നിഷാന്ത് നിലവിൽ കേരളത്തിലുണ്ടെന്ന് സ്ഥിരീകരിച്ചിട്ടില്ല.
മറ്റൊരു ശ്രദ്ധേയമായ കാര്യം മീനാക്ഷിയുടെ ജീവിതവുമായി ബന്ധപ്പെട്ട വിവരങ്ങളാണ്. നിഷാന്തും മീനാക്ഷിയും തമ്മിൽ അടുത്ത സൗഹൃദമുണ്ടായിരുന്നുവെന്നാണ് അന്വേഷണത്തിൽ വ്യക്തമായത്. ഇരുവരും ചേർന്ന് യൂട്യൂബ് ചാനലും നടത്തിയിരുന്നു. യൂട്യൂബിൽനിന്ന് ലഭിച്ച വരുമാനം ഉപയോഗിച്ചാണ് വീട് നിർമിക്കുന്നതെന്ന് കഴിഞ്ഞ ഒക്ടോബറിൽ മീനാക്ഷി വെളിപ്പെടുത്തിയിരുന്നു. എന്നാൽ വീടുപണി പൂർത്തിയാക്കാൻ ആവശ്യമായ പണം തികയാതിരുന്നതാണോ കവർച്ചയ്ക്ക് പിന്നിലെന്നും പൊലീസ് പരിശോധിക്കുന്നുണ്ട്.
അതേസമയം, ആഡംബര ജീവിതത്തോടുള്ള താൽപര്യമാണ് നിഷാന്തിനെ മോഷണത്തിലേക്ക് നയിച്ചതെന്നാണ് പൊലീസിന്റെ വിലയിരുത്തൽ. കവർച്ച ആസൂത്രണം ചെയ്തതിൽ മീനാക്ഷിക്ക് പങ്കുണ്ടോയെന്നും അന്വേഷണസംഘം പരിശോധിക്കുന്നുണ്ട്. എന്നാൽ ചോദ്യം ചെയ്യലിൽ നിഷാന്തുമായുള്ള ബന്ധത്തെ മീനാക്ഷി തള്ളിപ്പറഞ്ഞതായാണ് റിപ്പോർട്ട്. ഇവർക്കെതിരായ ആരോപണങ്ങൾ കോടതിയിൽ തെളിയിക്കപ്പെട്ടിട്ടില്ലെന്നതും ശ്രദ്ധിക്കണം.
കേസിലെ മറ്റൊരു കൗതുകകരമായ സംഭവമാണ് മീനാക്ഷിയുടെ ഇൻസ്റ്റഗ്രാം അക്കൗണ്ടിന് ലഭിക്കുന്ന ശ്രദ്ധ. അറസ്റ്റിലായതിനു പിന്നാലെ മീനാക്ഷിയുടെ അക്കൗണ്ടിലെ ഫോളോവേഴ്സിന്റെ എണ്ണം കുത്തനെ വർധിച്ചു. ഒരു സ്വർണ കവർച്ചാക്കേസിലെ പ്രതിയുമായി ബന്ധമുണ്ടെന്ന് ആരോപിക്കപ്പെടുന്ന വ്യക്തിയുടെ സോഷ്യൽ മീഡിയ അക്കൗണ്ടിന് ഇത്രയധികം ശ്രദ്ധ ലഭിക്കുന്നത് സമൂഹമാധ്യമങ്ങളിലും ചർച്ചയാകുകയാണ്.
ജ്വല്ലറിയിൽ മോഷണം നടത്താൻ നിഷാന്ത് സ്വീകരിച്ച രീതിയും അന്വേഷണത്തിൽ പുറത്തുവന്നിട്ടുണ്ട്. നിർമ്മാണ ജോലികൾ പൂർണമായി പൂർത്തിയാകാത്ത ഷോറൂമിലെ സുരക്ഷാവീഴ്ചകൾ മുതലെടുത്തായിരുന്നു കവർച്ചയെന്നാണ് പൊലീസിന്റെ നിഗമനം. പ്രവർത്തനം ആരംഭിക്കാത്ത ലിഫ്റ്റിന്റെ ഭാഗത്തുകൂടി കെട്ടിടത്തിന്റെ ഭിത്തി തകർത്ത് അകത്തേക്ക് കടന്നതായാണ് അന്വേഷണ സംഘം കരുതുന്നത്. ദീപാവലി വിപണി ലക്ഷ്യമിട്ട് പണികൾ പൂർത്തിയാകുന്നതിനു മുമ്പുതന്നെ ഷോറൂം തുറന്നതും മോഷ്ടാവിന് സഹായകമായെന്നാണ് വിലയിരുത്തൽ.
ഇപ്പോൾ അന്വേഷണത്തിന്റെ പ്രധാന ലക്ഷ്യം ഒളിവിലുള്ള നിഷാന്തിനെ കണ്ടെത്തുക എന്നതാണ്. മോഷ്ടിച്ച ആഭരണങ്ങളുടെ ബാക്കി എവിടെയാണെന്നും ഇയാൾക്ക് മറ്റാരുടെയെങ്കിലും സഹായം ലഭിച്ചിട്ടുണ്ടോയെന്നും പൊലീസ് പരിശോധിക്കുന്നുണ്ട്. കേരളത്തിലേക്കും അന്വേഷണം വ്യാപിപ്പിച്ചതോടെ നിഷാന്തിനെ കണ്ടെത്താനാകുമെന്ന പ്രതീക്ഷയിലാണ് തമിഴ്നാട് പൊലീസ്.
മധുരയിലെ കോടികളുടെ സ്വർണ കവർച്ചയ്ക്ക് പിന്നിലെ മുഴുവൻ രഹസ്യങ്ങളും പുറത്തുവരാൻ ഇനി കാത്തിരിക്കണം.
https://www.facebook.com/Malayalivartha

























