കണക്കുകളിൽ വ്യാജീകരണം നടത്തി 21,88,579/-രൂപയുടെ അപഹരണം നടത്തിയെന്ന കേസിൽ ഖാദി ബോർഡ് കാഷ്യറെ 7 കേസുകളിലായി 56 വർഷം തടവിനും 2,80,000 രൂപ പിഴക്കും ശിക്ഷിച്ചു. കേരള ഖാദി ഗ്രാമ വ്യവസായ ബോർഡിൽ ക്യാഷ്യർ ആയിരുന്ന ശിവരാജൻ ചെട്ടിയാരെയാണ് ശിക്ഷിച്ചത്. തിരുവനന്തപുരം വിജിലൻസ് പ്രത്യേക കോടതി ജഡ്ജി എ. മനോജ്‌ ആണ് ശിക്ഷ വിധിച്ചത്.

ശിക്ഷ ഒരുമിച്ചനുഭവിച്ചാൽ മതിയെന്ന് വിധിന്യായത്തിൽ പറയുന്നതിനാൽ 8 വർഷം തടവനുഭവിക്കുകയും 2,80,000 രൂപ പിഴ ഒടുക്കുകയും ചെയ്യണം.
കേരള ഖാദി ഗ്രാമ വ്യവസായ ബോർഡിൽ ക്യാഷ്യർ എന്ന തന്റെ ഔദ്യോഗിക പദവിയിൽ ഔദ്യോഗിക ചുമതല നേരുകേടായി നിർവ്വഹിച്ച്, സ്വാർത്ഥലാഭത്തിനായി ഔദ്യോഗിക രേഖകളിൽ കൃത്രിമം കാണിച്ച്, വ്യാജരേഖപ്പെടുത്തലുകൾ ഔദ്യോഗിക രേഖകളിൽ ഉൾപ്പെടുത്തി, രേഖകൾ നിജമാണെന്ന് വരുത്തിതീർത്ത്, രേഖകളുടെ സഹായത്തോടെ ബോർഡിന്റെ കണക്കുകളിൽ കൃത്രിമം കാണിച്ച് അക്കൗണ്ടുകളിൽ തിരിമറി നടത്തി 2023-24 കാലയളവിൽ ആകെ 21,88,579/-രൂപ അപഹരണം നടത്തി തന്നിൽ അർപ്പിതമായ ഔദ്യോഗിക പദവി കുറ്റകരമായ ദുരുപയോഗം നടത്തി ബോർഡിനും, സർക്കാരിനും വൻ സാമ്പത്തിക നഷ്ടം വരുത്തി എന്നാണ് കേസ്. പ്രോസിക്യൂഷന് വേണ്ടി വിജിലൻസ് പബ്ലിക് പ്രോസിക്യൂട്ടർ വീണാസതീശൻ ഹാജരായി.