വാഹന ഗതാഗതവകുപ്പിനോട് കട്ട കലിപ്പിൽ മുഖ്യമന്ത്രി വി ഡി സതീശൻ. ഇലക്ഷൻ സമയത്ത് താൻ നൽകിയ വാഗ്ദാനം പാലിക്കാൻ കഴിയാത്തതിലാണ് മുഖ്യമന്ത്രിക്ക് സങ്കടം. വാഹനമോഡിഫിക്കേഷനാണ് മുഖ്യമന്ത്രിയെ പ്രതിസന്ധിയിലാക്കിയത്. മോഡിഫിക്കേഷന്റെ കാര്യത്തിൽ സാധ്യമായതെല്ലാം  ചെയ്യണമെന്ന് മുഖ്യമന്ത്രി നേരിട്ട് നൽകിയ നിർദ്ദേശം പാലിക്കാൻ ഗതാഗതവകുപ്പിന് കഴിഞ്ഞില്ല.പകരം പഴയ ഉത്തരവ് പുതുക്കി ഇറക്കി. ഇതാണ് മുഖ്യമന്ത്രിയെ ചൊടിപ്പിച്ചത്. എന്നാൽ മുഖ്യമന്ത്രിയുടെ ആവശ്യങ്ങൾ അംഗീകരിക്കാൻ നിയമമില്ലെന്നാണ് വകുപ്പ് പറയുന്നത്. 

വാഹന മോഡിഫിക്കേഷനിൽ പുതിയ വിസ്‌മയങ്ങൾക്ക്‌ കാത്തിരുന്ന വാഹനപ്രേമികളെ വി ഡി സതീശൻ സർക്കാർ നിരാശരാക്കി .  തെരെഞ്ഞെടുപ്പ്‌ പ്രചാരണത്തിനിടെ, എല്ലാവിധ മോഡിഫിക്കേഷനും അനുവദിക്കുമെന്ന്‌ പറഞ്ഞ്‌ മോഹിപ്പിച്ച മുഖ്യമന്ത്രി പച്ചക്കള്ളം പറഞ്ഞ്‌ പറ്റിച്ചതാണെന്ന്‌ വാഹന പ്രേമികൾ  പറയുന്നു. . വാഹന മോഡിഫിക്കേഷന്‌ അനുമതി നല്‍കിയെന്ന പേരിൽ ബുധനാഴ്‌ച ഇറങ്ങിയ സര്‍ക്കാര്‍ ഉത്തരവ്‌ വഞ്ചനയുടെ നേർചിത്രമായി. വാഹനങ്ങളില്‍ ഏഴ് തരം രൂപമാറ്റം അംഗീകരിക്കാമെന്നാണ് ഗതാഗത കമ്മീഷണറുടെ പേരിലുള്ള ഉത്തരവിലുള്ളത്‌. എന്നാൽ, ഇ‍ൗ ഏഴ്‌ മാറ്റങ്ങളും പൂർണമായും നിലവിലെ നിയമങ്ങൾ പ്രകാരം ചെയ്‌തു കൊണ്ടിരിക്കുന്നതു തന്നെയാണ്‌. കേന്ദ്ര മോട്ടോർ വാഹന നിയമം അനുശാസിക്കുന്നതിനപ്പുറം ഒരു മോഡിഫിക്കേഷനും പുതുതായി അനുവദിച്ചിട്ടില്ല. അക്കാര്യം ഉത്തരവിൽ തന്നെ വ്യക്തമാക്കുന്നുമുണ്ട്‌.