കാലടി സംസ്കൃത സർവകലാശാലയിലെ വിദ്യാർഥി സസ്പെൻഷൻ വിവാദത്തിൽ ഒടുവിൽ ആശ്വാസത്തിന്റെ വെളിച്ചം. ദിവസങ്ങളായി നീളുന്ന പ്രതിഷേധത്തിനും നിയമപോരാട്ടത്തിനും പിന്നാലെ വിദ്യാർഥികൾക്ക് പ്രതീക്ഷ നൽകുന്ന നിർണായക ഇടപെടലുമായി സുപ്രീംകോടതി. പരീക്ഷ എഴുതാൻ കഴിയാതെ പ്രതിസന്ധിയിലായ വിദ്യാർഥികളുടെ ഹർജിയിൽ ഹൈക്കോടതി അടിയന്തരമായി വാദം കേട്ട് തീർപ്പാക്കണമെന്നാണ് സുപ്രീംകോടതിയുടെ നിർദേശം. മാത്രമല്ല, കേസിൽ വിദ്യാർഥികൾക്ക് അനുകൂലമായ തീരുമാനമുണ്ടായാൽ അവർക്ക് നഷ്ടമായ പരീക്ഷകൾക്കായി പ്രത്യേക പരീക്ഷ നടത്താൻ തയ്യാറാണെന്ന് സർവകലാശാലയും സുപ്രീംകോടതിയിൽ ഉറപ്പുനൽകി. ഈ ഉറപ്പ് രേഖപ്പെടുത്തിയ ശേഷമാണ് കോടതി വിദ്യാർഥികളുടെ ഹർജി തീർപ്പാക്കിയത്. ഇതോടെ കാലടിയിലെ വിദ്യാർഥി സമരത്തിൽ പുതിയ വഴിത്തിരിവായിരിക്കുകയാണ്.

എന്താണ് കാലടി സർവകലാശാലയിൽ സംഭവിച്ചത്? ഓഗസ്റ്റ് 13ന് സർവകലാശാലാ ക്യാംപസിൽ നടന്ന വിദ്യാർഥി പ്രതിഷേധമാണ് വിവാദങ്ങളുടെ തുടക്കം. അടിസ്ഥാന സൗകര്യങ്ങളുടെ അപര്യാപ്തത, കുടിവെള്ളക്ഷാമം, ഹോസ്റ്റലിലെ നിയന്ത്രണങ്ങൾ, അധ്യാപക ഒഴിവുകൾ തുടങ്ങി നിരവധി പ്രശ്നങ്ങൾ ഉന്നയിച്ചായിരുന്നു വിദ്യാർഥികളുടെ പ്രതിഷേധം. ഇതിനിടെ വൈസ് ചാൻസലർ സിസ തോമസിന്റെ പ്രതീകാത്മക ശവസംസ്കാരം നടത്തിയെന്ന ആരോപണവും ഉയർന്നു. വൈസ് ചാൻസലറെ തടയുകയും കയ്യേറ്റം ചെയ്യുകയും ചെയ്തുവെന്നാണ് സർവകലാശാലയുടെ ആരോപണം. എന്നാൽ, പ്രതിഷേധത്തിന്റെ ഭാഗമായുള്ള തെരുവുനാടകമായിരുന്നു ഇതെന്നും വൈസ് ചാൻസലർക്കെതിരായ ശവസംസ്കാരമല്ലെന്നും വിദ്യാർഥികൾ വിശദീകരിച്ചു. സംഭവത്തിൽ രണ്ട് കേസുകളും രജിസ്റ്റർ ചെയ്യപ്പെട്ടു.

തുടർന്ന് സെപ്റ്റംബർ ഒന്നിന് 16 വിദ്യാർഥികളെ സർവകലാശാല സസ്പെൻഡ് ചെയ്തു. സസ്പെൻഷൻ പിൻവലിക്കണമെന്നും പഠനം തുടരാനും പരീക്ഷ എഴുതാനും അനുവദിക്കണമെന്നും ആവശ്യപ്പെട്ട് വിദ്യാർഥികൾ ഹൈക്കോടതിയെ സമീപിച്ചു. ഇതിനിടെ പരീക്ഷ അടുത്തെത്തിയിട്ടും സസ്പെൻഷൻ പിൻവലിക്കാത്തത് വിദ്യാർഥികളുടെ അക്കാദമിക ഭാവിയെ ബാധിക്കുമെന്ന ആശങ്ക ശക്തമായി. ഒക്ടോബർ 30ന് ഹൈക്കോടതി സിംഗിൾ ബെഞ്ച് വിദ്യാർഥികൾക്ക് പരീക്ഷയെഴുതാൻ താൽക്കാലിക അനുമതി നൽകി. എന്നാൽ സർവകലാശാല ഇതിനെതിരെ അപ്പീൽ നൽകി. നവംബർ മൂന്നിന് ഹൈക്കോടതി ഡിവിഷൻ ബെഞ്ച് സിംഗിൾ ബെഞ്ചിന്റെ ഉത്തരവ് റദ്ദാക്കി. ആവശ്യമായ ഹാജർ, ഇന്റേണൽ അസസ്മെന്റ്, പരീക്ഷാ രജിസ്ട്രേഷൻ തുടങ്ങിയ ചട്ടങ്ങൾ പാലിച്ചിട്ടില്ലെന്ന സർവകലാശാലയുടെ വാദങ്ങൾ ഡിവിഷൻ ബെഞ്ച് പരിഗണിച്ചു. ഇതോടെ നവംബർ നാലിന് ആരംഭിച്ച പരീക്ഷയിൽ വിദ്യാർഥികൾക്ക് പങ്കെടുക്കാനാകാത്ത സാഹചര്യമുണ്ടായി. പത്ത് വിദ്യാർഥികൾക്ക് ആദ്യ പരീക്ഷ തന്നെ നഷ്ടമായി.

ഈ സാഹചര്യത്തിലാണ് 16 വിദ്യാർഥികൾ സുപ്രീംകോടതിയെ സമീപിച്ചത്. പരീക്ഷാ സമയം നഷ്ടപ്പെടുന്നതിനാൽ അടിയന്തരമായി ഇടപെടണമെന്നായിരുന്നു ആവശ്യം. ഇപ്പോൾ ഹൈക്കോടതി സിംഗിൾ ബെഞ്ചിനോട് വിദ്യാർഥികളുടെ കേസ് അടിയന്തരമായി പരിഗണിച്ച് തീർപ്പാക്കാൻ സുപ്രീംകോടതി നിർദേശിച്ചിരിക്കുകയാണ്. അതേസമയം, കേസ് വിദ്യാർഥികൾക്ക് അനുകൂലമായാൽ പ്രത്യേക പരീക്ഷ നടത്താമെന്ന സർവകലാശാലയുടെ ഉറപ്പും നിർണായകമായി.

എന്നാൽ ഇതുകൊണ്ട് വിദ്യാർഥികളുടെ സസ്പെൻഷൻ സ്വമേധയാ റദ്ദാകുന്നില്ല. സസ്പെൻഷൻ നിയമപരമാണോ, വിദ്യാർഥികൾക്ക് പഠനം തുടരാൻ എന്തെല്ലാം അവകാശങ്ങളുണ്ട് തുടങ്ങിയ കാര്യങ്ങളിൽ ഇനി ഹൈക്കോടതിയുടെ തീരുമാനമാണ് നിർണായകം. സർവകലാശാലയും വിദ്യാർഥികളും തമ്മിലുള്ള തർക്കം കോടതിയുടെ പരിഗണനയിലിരിക്കെ ക്യാംപസിലെ സമരവും തുടരുകയാണ്. വിദ്യാർഥികളുടെ ഭാവി സംരക്ഷിക്കപ്പെടുമോ? നഷ്ടമായ പരീക്ഷകൾ എഴുതാൻ അവസരം ലഭിക്കുമോ? സസ്പെൻഷൻ പിൻവലിക്കപ്പെടുമോ? കാലടിയിൽ ഇനി ഉറ്റുനോക്കുന്നത് ഹൈക്കോടതിയുടെ നിർണായക തീരുമാനത്തിലേക്കാണ്. കലുഷിതമായിരുന്ന കാലടി ക്യാംപസ് ഒടുവിൽ കലങ്ങിത്തെളിയുമെന്ന പ്രതീക്ഷയിലാണ് വിദ്യാർഥികൾ.