ശബരിമലയിലേക്ക് മിൽമയിൽ നിന്നു വീണ്ടും നെയ്യ് വാങ്ങാൻ സാദ്ധ്യത തേടി തിരുവിതാംകൂർ ദേവസ്വം ബോർഡ് . നിയമോപദേശവും സംസ്ഥാന വിജിലൻസിന്റെ ക്ലിയറൻസുമാണ് തേടുന്നത്. കഴിഞ്ഞ വർഷം നടന്ന നെയ്യ് ക്രമക്കേടിൽ അന്വേഷണം നടക്കുന്നതിനിടെയാണിത്.

10,​000 ലിറ്റർ നെയ്യ് വാങ്ങാനാണ് ദേവസ്വം ബോർഡിന്റെ ശ്രമമുള്ളത്. കഴിഞ്ഞ വർഷം നടന്ന നെയ്യ് ക്രമക്കേടിൽ മിൽമയ്ക്ക് പങ്കില്ലെന്നാണ് അന്വേഷണ സംഘത്തിന്റെ വിലയിരുത്തലുകളുള്ളത് . മിൽമയിൽ നിന്നു വാങ്ങിയ നെയ്യ് ശബരിമലയിൽ എത്തിച്ചതിലാണ് ക്രമക്കേട് നടന്നത്.

മിൽമയിലെ ജീവനക്കാരാരും കേസിൽ പ്രതിയല്ല. ദേവസ്വം ബോർഡ് ആവശ്യപ്പെട്ടാൽ നെയ്യ് നൽകുമെന്ന് മിൽമ വ്യക്തമാക്കിയിരുന്നു. ഈ സാഹചര്യവും ദേവസ്വം ബോർഡ് പരിഗണിച്ചു. ക്രമക്കേടിൽ അന്വേഷണം നടക്കുന്നതിനാലാണ് വിജിലൻസിന്റെ ക്ലിയറൻസും നിയമോപദേശവും തേടാൻ തീരുമാനിച്ചത്.

ഈ വർഷം മിൽമ ടെൻഡറിൽ പങ്കെടുത്തിരുന്നില്ല. ടെൻഡറിൽ ഏറ്റവും കുറഞ്ഞ തുക രേഖപ്പെടുത്തിയ സ്വകാര്യസ്ഥാപനത്തിന് കഴിഞ്ഞ വർഷത്തെ ക്രമക്കേടിൽ പങ്കുണ്ടെന്ന് കണ്ടെത്തി ടെൻഡർ റദ്ദാക്കുകയായിരുന്നു. വീണ്ടും ടെൻഡർ വിളിച്ചെങ്കിലും ഒറ്റ ടെൻഡർ മാത്രമാണ് ലഭിച്ചത്. ഇതിൽ രേഖപ്പെടുത്തിയ നിരക്കാകട്ടെ വളരെ ഉയർന്നതും. ഇതാണ് മിൽമയിൽ നിന്നു നേരിട്ട് നെയ്യ് വാങ്ങാൻ ദേവസ്വം ബോർഡിനെ പ്രേരിപ്പിക്കുന്നത്.

അയ്യപ്പഭക്തർ കൊണ്ടുവരുന്ന നെയ്യ് അപ്പം,അരവണ നിർമ്മാണത്തിന് ഉപയോഗിക്കാനാണ് തീരുമാനം. തീർത്ഥാടനത്തിന്റെ ആദ്യ ദിവസങ്ങളിൽ ഉദ്ദേശിക്കുന്ന അളവിൽ നെയ്യ് ലഭിച്ചില്ലെങ്കിൽ ബദൽ ക്രമീകരണം എന്ന നിലയിലാണ് നെയ്യ് വാങ്ങുന്നത്.