പയ്യന്നൂരിലെ അന്നൂര്‍ ശാന്തിഗ്രാമില്‍ ലാപ്‌ടോപ്പ് പൊട്ടിത്തെറിച്ച് വീടിനു തീപിടിച്ചു. വീട്ടുപകരണങ്ങള്‍ കത്തിനശിച്ചുവെങ്കിലും കുടുംബാംഗങ്ങള്‍ പുറത്തായിരുന്നതിനാല്‍ ആളപായമില്ല. അന്നൂര്‍ ശാന്തിഗ്രാം – കിസാന്‍ കൊവ്വല്‍ റോഡിലെ വി.പി പ്രസന്നകുമാറിന്റെ വീടിനാണ് തീ പിടിച്ചത്. ചാര്‍ജ് ചെയ്യാനായി വെച്ചിരുന്ന ലാപ്‌ടോപ്പ് പൊട്ടിത്തെറിച്ചാണ് അപകടം. വീടിനുള്ളിലെ സോഫാ സെറ്റ് പൂര്‍ണമായും കത്തിനശിച്ചു.

ഇന്നലെ ഉച്ചക്ക് 12 ഓടെയായിരുന്നു സംഭവം. ഹാളിലെ സോഫയില്‍ ലാപ്‌ടോപ്പ് ചാര്‍ജ് ചെയ്യാന്‍ വച്ച ശേഷം പ്രസന്നകുമാറും ഭാര്യയും വീട് പൂട്ടി പുറത്തേക്ക് പോയതായിരുന്നു. അപകടസമയത്ത് വീട്ടില്‍ ആരുമുണ്ടായിരുന്നില്ല. അരമണിക്കൂറിന് ശേഷം ഇവര്‍ തിരിച്ചെത്തിയപ്പോഴാണ് വീട്ടിനുള്ളില്‍ നിന്നും തീയും പുകയും ഉയരുന്നത് കണ്ടത്. ഉടന്‍തന്നെ അയല്‍വാസികളെ വിവരമറിയിക്കുകയും തുടര്‍ന്ന് സ്ഥലത്തെത്തിയ അഗ്‌നിരക്ഷാ സംഘമാണ് തീ പൂര്‍ണമായും അണച്ചത്.