ആദ്യ നീക്കം പാളിയിട്ടും പിൻമാറാതെ സംഘം... 25 ലക്ഷം രൂപയുടെ ക്വട്ടേഷൻ, ചാലയിലെ സ്വർണക്കവർച്ചയ്ക്ക് പിന്നിൽ വൻ ഗൂഢാലോചന; തലേദിവസം റിഹേഴ്സൽ നടത്തി

തിരുവനന്തപുരം ചാലയിലെ സ്വർണക്കവർച്ച കേവലം വഴിയാത്രക്കാരായ മോഷ്ടാക്കൾ നടത്തിയ പിടിച്ചുപറിയല്ല. ദിവസങ്ങൾ നീണ്ട ആസൂത്രണം, കൃത്യമായ നിരീക്ഷണം, ക്വട്ടേഷൻ സംഘം, ഒടുവിൽ 25 ലക്ഷം രൂപയുടെ ഇടപാട്. തലസ്ഥാനത്തെ ഞെട്ടിച്ച സ്വർണക്കവർച്ചയ്ക്ക് പിന്നിലെ ഗൂഢാലോചനയുടെ കൂടുതൽ വിവരങ്ങളാണ് ഇപ്പോൾ പുറത്തുവരുന്നത്. സ്വർണം തട്ടിയെടുക്കാൻ ക്വട്ടേഷൻ ഉറപ്പിച്ചത് 25 ലക്ഷം രൂപയ്ക്കാണെന്നാണ് പൊലീസിന്റെ കണ്ടെത്തൽ. അതേസമയം, കവർച്ചയുടെ ആദ്യശ്രമം പരാജയപ്പെട്ടിട്ടും പദ്ധതി ഉപേക്ഷിക്കാൻ പ്രതികൾ തയ്യാറായില്ലെന്ന വിവരവും അന്വേഷണത്തിൽ പുറത്തുവന്നിട്ടുണ്ട്.
വൈഷ്ണവി ജ്വല്ലറി ഉടമ നന്ദകുമാറിനെ ലക്ഷ്യമിട്ടായിരുന്നു കവർച്ചയുടെ ആസൂത്രണം. നന്ദകുമാറിന്റെ വ്യാപാര വളർച്ചയോടുള്ള വൈരാഗ്യമാണ് കവർച്ചയ്ക്ക് പിന്നിലെന്നാണ് അന്വേഷണസംഘത്തിന്റെ കണ്ടെത്തൽ. മാളവിക ജ്വല്ലറി ഉടമ ജയറാം, സ്വർണ ഏജന്റായ അമോൽ, കൂട്ടുപ്രതി ദിലീപ് എന്നിവർ ഒരുമിച്ചിരുന്നാണ് കവർച്ചയുടെ പദ്ധതി തയ്യാറാക്കിയതെന്നാണ് പൊലീസിന്റെ കണ്ടെത്തൽ. കവർച്ചയ്ക്ക് ക്വട്ടേഷൻ ഏറ്റെടുത്തത് അനൂപ് രാജാണെന്നും അന്വേഷണ വിവരങ്ങൾ വ്യക്തമാക്കുന്നു.
ക്വട്ടേഷൻ സംഘത്തിന് പണം കൈമാറിയതിലും പ്രത്യേക രീതിയുണ്ടായിരുന്നു. മുഖ്യപ്രതിയായ അമോൽ ആദ്യം നാല് ലക്ഷം രൂപ കൈമാറി. കവർച്ച വിജയകരമായി നടത്തിയതിനുശേഷം വീണ്ടും നാല് ലക്ഷം രൂപ നൽകിയെന്നാണ് പുറത്തുവരുന്ന വിവരം. ഈ പണം നേരിട്ട് അനൂപ് രാജിന്റെ കൈയിൽ എത്തിക്കുകയായിരുന്നില്ല. ദിലീപിന്റെ കൈവശമാണ് അമോൽ പണം നൽകിയത്. തുടർന്ന് ദിലീപ് ബാങ്ക് അക്കൗണ്ട് വഴി തമിഴ്നാട്ടിലായിരുന്ന അനൂപ് രാജിന് തുക കൈമാറിയെന്നാണ് പൊലീസിന്റെ കണ്ടെത്തൽ. എന്നാൽ, 25 ലക്ഷം രൂപയുടെ ക്വട്ടേഷനിൽ ഈ എട്ട് ലക്ഷം രൂപയ്ക്ക് പുറമേ ബാക്കിയുള്ള തുക എങ്ങനെ കൈമാറാനായിരുന്നു ധാരണയെന്ന കാര്യത്തിൽ കൂടുതൽ വ്യക്തത വരേണ്ടതുണ്ട്.
കവർച്ചയ്ക്ക് തലേദിവസം പ്രതികൾ സംഭവസ്ഥലത്തെത്തി റിഹേഴ്സൽ നടത്തിയിരുന്നു. നന്ദകുമാർ കടയിൽനിന്ന് വീട്ടിലേക്ക് ഇറങ്ങുന്ന സമയവും സാഹചര്യങ്ങളും മനസ്സിലാക്കുകയായിരുന്നു ലക്ഷ്യം. എന്നാൽ, പ്രതികൾ നിശ്ചയിച്ച സമയത്ത് നന്ദകുമാർ കടയിൽനിന്ന് ഇറങ്ങിയില്ല. ഇതോടെ ആദ്യ നീക്കം പാളി. പക്ഷേ, പദ്ധതി ഉപേക്ഷിക്കാൻ സംഘം തയ്യാറായില്ല. സാഹചര്യം വീണ്ടും വിലയിരുത്തി കവർച്ച നടപ്പാക്കുകയായിരുന്നു.
കവർച്ച നടന്ന ദിവസം രാവിലെയും ഗൂഢാലോചനയുടെ ഭാഗമായുള്ള മറ്റൊരു നീക്കം നടന്നതായാണ് പൊലീസ് കണ്ടെത്തൽ. അമോൽ 85 ഗ്രാം സ്വർണം നന്ദകുമാറിന്റെ വൈഷ്ണവി ജ്വല്ലറിയിൽ കൈമാറിയിരുന്നു. പിന്നീട് കവർച്ച ചെയ്ത സ്വർണത്തിൽനിന്ന് ഈ 85 ഗ്രാം തിരികെ നൽകണമെന്നും അമോൽ ആവശ്യപ്പെട്ടതായാണ് അന്വേഷണ വിവരം. കവർച്ചയ്ക്കു മുമ്പും ശേഷവുമുള്ള ഈ ഇടപാടുകൾ കേസിൽ നിർണായകമാകുമെന്നാണ് അന്വേഷണസംഘത്തിന്റെ വിലയിരുത്തൽ.
അതേസമയം, കവർച്ചയിൽ പങ്കുണ്ടെന്ന ആരോപണം മറ്റൊരു ജ്വല്ലറി ഉടമ ജയറാം നിഷേധിച്ചിരിക്കുകയാണ്. എന്നാൽ ജയറാമിനെതിരേ നിർണായക തെളിവുകൾ ലഭിച്ചിട്ടുണ്ടെന്നാണ് പൊലീസ് വ്യക്തമാക്കുന്നത്. അമോലിനെയും ദിലീപിനെയും പൊലീസ് കസ്റ്റഡിയിൽ വാങ്ങി ചോദ്യം ചെയ്തിരുന്നു. കേസിൽ കൂടുതൽ പേരുടെ പങ്കുണ്ടോയെന്നും അന്വേഷിക്കുന്നുണ്ട്.
ഇതിനിടെ കവർന്ന സ്വർണത്തിന്റെ അളവിനെക്കുറിച്ചും തർക്കമുണ്ട്. രണ്ട് കിലോ സ്വർണം നഷ്ടപ്പെട്ടെന്നാണ് പരാതിയുമായി ബന്ധപ്പെട്ട് പൊലീസ് രേഖപ്പെടുത്തിയിട്ടുള്ളത്. എന്നാൽ, ഇത്രയും സ്വർണം കവർന്നിട്ടില്ലെന്നാണ് പിടിയിലായ പ്രതികൾ ചോദ്യം ചെയ്യലിൽ പറയുന്നതായുള്ള റിപ്പോർട്ടുകൾ. കണ്ടെടുത്ത സ്വർണം മാത്രമാണ് തങ്ങൾ കവർന്നതെന്നാണ് പ്രതികളുടെ മൊഴി. അതുകൊണ്ടുതന്നെ ബാക്കി സ്വർണം എവിടെയെന്ന ചോദ്യത്തിനും അന്വേഷണസംഘത്തിന് ഉത്തരം കണ്ടെത്തേണ്ടതുണ്ട്.
ഒരു കവർച്ചയ്ക്കായി 25 ലക്ഷം രൂപയുടെ ക്വട്ടേഷൻ, മുൻകൂട്ടിയുള്ള റിഹേഴ്സൽ, ആദ്യശ്രമം പരാജയപ്പെട്ടിട്ടും തുടർന്നുള്ള നീക്കം... ചാലയിലെ സ്വർണക്കവർച്ചയ്ക്ക് പിന്നിലെ ആസൂത്രണത്തിന്റെ വ്യാപ്തി വ്യക്തമാക്കുന്നതാണ് പുറത്തുവരുന്ന വിവരങ്ങൾ. എന്നാൽ കവർന്ന സ്വർണത്തിന്റെ കൃത്യമായ അളവും ബാക്കി സ്വർണത്തിന്റെ വിവരങ്ങളും ഗൂഢാലോചനയിൽ ഉൾപ്പെട്ട എല്ലാവരുടെയും പങ്കും അന്വേഷണത്തിലൂടെ ഇനിയും വ്യക്തമാകേണ്ടതുണ്ട്.
https://www.facebook.com/Malayalivartha

























