ബസ്​ യാത്രാനിരക്ക്​​ വര്‍ധിപ്പിക്കാന്‍ ഇടതുമുന്നണി സര്‍ക്കാറിനോട്​ ശിപാര്‍ശ ചെയ്​തു. മിനിമം നിരക്കില്‍ നിന്നും ഒരു രൂപ വര്‍ധിപ്പിക്കാനാണ്​ ധാരണയായിരിക്കുന്നത്​. ഇതോടെ മിനിമം ചാര്‍ജ്​ എട്ടു രൂപയാകും. ജനങ്ങള്‍ക്ക്​ അമിതഭാരം വരാത്ത രീതിയില്‍ ചാര്‍ജ്​ വര്‍ധിപ്പിക്കണമെന്ന നിര്‍ദേശമാണ്​ ഇടതുമുന്നണി യോഗം സര്‍ക്കാറിനോട്​ നിര്‍ദേശിച്ചിരിക്കുന്നത്​.

വര്‍ധനവ്​ നിലവില്‍ വന്നാല്‍ ഫാസ്​റ്റ്​ പാസഞ്ചറില്‍ മിനിമം ചാര്‍ജ്​ 11 രൂപയാകും. വോള്‍വോ ബസുകളില്‍ മിനിമം 40 രൂപയെന്നത്​ 45 ആകും. സൂപ്പര്‍ ഡീലക്​സ്​- സെമി സ്ലീപ്പര്‍ നിരക്ക്​ 20 ല്‍ നിന്ന്​ 22 ആയി ഉയരും. എക്​സിക്യൂട്ടീവ്​ സൂപ്പര്‍ എക്​സ്​പ്രസിലും രണ്ടു രൂപ വര്‍ധിക്കും. വിദ്യാര്‍ഥികളുടെ കണ്‍സഷന്‍ നിരക്കിലും ആനുപാതികമായ മാറ്റങ്ങള്‍ വരുത്താമെന്നും ശിപാര്‍ശയുണ്ട്​.

അതേസമയം, ബസ്​ ചാര്‍ജ്​ കൂട്ടണമെന്ന തീരുമാനം എല്‍.ഡി.എഫ്​ എടുത്തിട്ടില്ലെന്ന്​ ഗതാഗതമന്ത്രി എ.കെ ശശീന്ദ്രന്‍ മാധ്യമങ്ങളോട് പറഞ്ഞു. യാത്രാ നിരക്ക്​ സംബന്ധിച്ച്‌​ നിലവിലുള്ള സാഹചര്യം പരിശോധിച്ച്‌​ ശരിയായ തീരുമാനമെടുക്കണമെന്ന്​ സര്‍ക്കാറിനോട്​ നിര്‍ദേശിക്കുകയാണ്​ മുന്നണി ചെയ്​തത്​. സര്‍ക്കാര്‍ ഇക്കാര്യം ആലോചിച്ച്‌​ ഉചിതമായ തീരുമാനമെടുക്കുമെന്ന്​ എ.കെ ശശീന്ദ്രന്‍ ​ പറഞ്ഞു.നാളെ നടക്കുന്ന മന്ത്രിസഭാ യോഗത്തില്‍ ഇക്കാര്യം ചര്‍ച്ച ചെയ്യുമെന്നാണ്​ സൂചന. ചാര്‍ജ്​ വര്‍ധിപ്പിച്ചില്ലെങ്കില്‍ അനിശ്ചിതകാല സമരം തുടങ്ങുമെന്ന്​ ബസ്​ ഉടമകളുടെ സംഘടനകള്‍ അറിയിച്ചിരുന്നു.