ഏറ്റവും വലിയ വിനിമയ മാർഗ്ഗമായ വാട്ട്സ്ആപ്പിനെ അധികം താമസിയാതെ കേന്ദ്രം പൂട്ടും. കേന്ദ്ര സർക്കാർ ഏജൻസിയായ ലോക് നീതിയുടെ സി എസ് ഡി എസ് - മൂഡ് ഓഫ് ദ നാഷൻസ് നടത്തിയ സർവേയിൽ വ്യാജ പ്രചരണങ്ങൾ പ്രചരിപ്പിച്ച് രാജ്യത്തിന്റെ സമാധാനന്തരീക്ഷം തകർക്കാൻ വാട്ട്സ്ആപ്പ് വഴി ജനങ്ങൾ ശ്രമിക്കുന്നു എന്ന കണ്ടെത്തലിനെ തുടർന്നായിരിക്കും നടപടി.

രാജ്യത്ത് വാട്ട്സ്ആപ്പിന്റെ സ്വാധീനം വളരെയധികം വർധിച്ചതായി സർവേ വ്യക്തമാക്കുന്നു. വലിയൊരു വിഭാഗം ജനങ്ങൾ വാട്ട്സ്ആപ്പ് സന്ദേശങ്ങൾ കണ്ണുമടച്ച് വിശ്വസിക്കുന്നവരാണ്. അടുത്ത കാലത്തുണ്ടായ പല ആക്രമണങ്ങളിലും കൊലപാതകങ്ങളിലും ഇരകളെ കുറിച്ച് വ്യാജ പ്രചരണം നടക്കുന്നുണ്ട്. സർവേ റിപ്പോർട്ട് അനുസരിച്ച് ദിവസേന വാട്ട്സ്ആപ്പ് ഉപയോഗിക്കുന്നവരുടെ എണ്ണം 2014ൽ 17 ശതമാനമായിരുന്ന. ഇത് ഒരു വർഷത്തിനുള്ളിൽ 24 ശതമാനമായി വർധിച്ചു.

ഗ്രാമപ്രദേശങ്ങളിലും വാട്ട്സ്ആപ്പ് ഉപയോഗം വ്യാപകമാണ്. കഴിഞ്ഞ ഒരു വർഷത്തിനള്ളിൽ വാട്ട്സ് ആപ്പ് ഉപയോഗിക്കുന്നവരുടെ എണ്ണത്തിൽ ഗ്രാമ പ്രദേശങ്ങളിൽ വർധിച്ചത് 24 ശതമാണ്. 2017ൽ ഇത് 6 ശതമാനം മാത്രമായിരുന്നു.

18 നും 25നുമിടയിൽ പ്രായമുള്ളവർക്കിടയിലാണ് വാട്ട്സ്ആപ്പ് ഉപയോഗം വർധിക്കുന്നത്. തീരെ പക്വതയില്ലാത്തവർ വാട്ട്സ്ആപ് ഉപയോഗിക്കുക വഴി തെറ്റായ കാര്യങ്ങൾ പ്രചരിപ്പിക്കുന്നുണ്ട്. ഇവരുടെ തെറ്റായ പ്രചരണങ്ങൾ സമൂഹത്തിൽ ചലനമുണ്ടാക്കുന്നതായും റിപ്പോർട്ടിൽ പറയുന്നു.

ഇന്റർനെറ്റിന്റെ ചെലവ് കുറഞ്ഞതാണ് വാട്ട്സ്ആപ്പ് ഉപയോഗിക്കുന്നവരുടെ എണ്ണം വർധിക്കാനുള്ള കാരണം. രാജ്യത്ത് സ്മാർട്ട് ഫോൺ ഉപയോഗിക്കുന്നവരുടെ എണ്ണവും വർധിച്ചിട്ടുണ്ട്. സ്മാർട്ട് ഫോണുകളുടെ വില കുറഞ്ഞതും ഒരു കാരണമാണ്.നഗരപ്രദേശങ്ങളിലാണ് ഇൻറർനെറ്റ് ഉപയോഗിക്കുന്നവരുടെ എണ്ണത്തിൽ വൻ വർധന ഉണ്ടായത്.

ദേശവിരുദ്ധ താത്പര്യങ്ങൾ പ്രചരിപ്പിക്കാൻ വാട്ട്സ്ആപ്പ് ഉപയോഗിക്കുന്നു എന്ന ആരോപണം ശക്തമായി ഉന്നയിക്കുന്ന പാർട്ടിയാണ് ബി ജെ പി. അതിന്റെ ഭാഗമാണ് സർവേ. കേന്ദ്ര സർക്കാർ ഇതിനെതിരെ വിവിധ നടപടികൾ ആലോചിക്കുന്നുണ്ട്. ചില പ്രത്യേക മതങ്ങളുടെ പ്രചരണം വാട്ട്സ്ആപ്പ് വഴി നടക്കുന്നു എന്ന പരാതി കേന്ദ്ര സർക്കാർ വിവിധ തലങ്ങളിൽ ഉന്നയിച്ചിട്ടുണ്ട്. കേന്ദ്ര സർക്കാർ തങ്ങളുടെ നിലപാട് ശക്തമാക്കിയാൽ വാട്ട്സ്ആപ് വിനോദങ്ങൾ അവസാനിക്കും. വാട്ട്സ്ആപ്പ് വഴി ഹർത്താൽ പ്രഖ്യാപിച്ച സംസ്ഥാനമാണ് കേരളം.

ഇന്റർനെറ്റിന്റെ ഉപയോഗം കേന്ദ്ര സർക്കാരിന് ഒരിക്കലും നിയന്ത്രിക്കാനാവില്ല. ഭാവിയിൽ ഇന്റർനെറ്റിന്റെ ഉപയോഗം വർധിക്കും. ഇന്റർനെറ്റിന്റെ ചെലവ് കുറയുകയും ചെയ്യും.
അതു കൊണ്ടു തന്നെ വാട്ട്സ്ആപ്പ് നിയന്ത്രിക്കുന്നത് അസംഭവ്യമാണ്.