ദലിത് വയോധികന്റെ മൃതദേഹം ശ്മശാനത്തില് എത്തിച്ചത് പാലത്തില്നിന്നും കയറിലൂടെ കെട്ടിയിറക്കി!
തമിഴ്നാട്ടിലെ വെല്ലൂര് നാരായണപുരത്ത് അപകടത്തില് മരിച്ച കുപ്പന് (65) എന്ന ദലിത് വയോധികന്റെ മൃതദേഹം ശ്മശാനത്തില് എത്തിച്ചതു പാലത്തില്നിന്നും കയറിലൂടെ കെട്ടിയിറക്കിയാണ്. ഉന്നതജാതിക്കാര് പറമ്പില് പ്രവേശിക്കാന് സമ്മതിക്കാത്തതാണ് ഈ സാഹചര്യത്തിന് ഇടയാക്കിയത്. വിഡിയോ സമൂഹമാധ്യമങ്ങളില് വൈറലായി.
വാണിയമ്പാടി പ്രദേശത്ത് അമ്പതോളം ദലിത് കുടുംബങ്ങളുണ്ടെന്നും ആരു മരിച്ചാലും ഇതേ അവസ്ഥ ആയതിനാലാണു വിഡിയോ എടുത്തതെന്നും നാട്ടുകാരനായ യുവാവ് പറഞ്ഞു. 'പത്തു വര്ഷം മുമ്പുവരെ പ്രസ്തുത പറമ്പിലൂടെ കടന്നായിരുന്നു മൃതദേഹങ്ങള് പുഴക്കരയിലുള്ള പൊതുശ്മശാനത്തിലെത്തിച്ചിരുന്നത്. എന്നാല് ഏതാനും വര്ഷം മുമ്പ് ഈ സ്ഥലം ഉന്നത ജാതിക്കാര് സ്വന്തമാക്കി വേലി കെട്ടി തിരിച്ചതിനാല് ദലിത് കുടുംബങ്ങളിലെ ആരു മരിച്ചാലും ഇതേ അവസ്ഥ ആയതിനാല് തങ്ങള്ക്കൊരു റോഡോ ശ്മശാനമോ വേണമെന്ന് കുപ്പന്റെ അനന്തരവന് വിജയ് ആവശ്യപ്പെട്ടു.
വെള്ളാള ഗൗണ്ടര്മാരാണ് മൃതദേഹം തടഞ്ഞതെന്ന് പൊലീസ് പറഞ്ഞു. ഓഗസ്റ്റ് 17-ന് നടന്ന സംഭവത്തിന്റെ വിഡിയോ ബുധനാഴ്ചയോടെയാണ് വൈറലായത്. 16-ന് ആണ് കുപ്പന് മരിച്ചത്. കാലങ്ങളായി ശ്മശാനമായി ഉപയോഗിക്കുന്ന പ്രദേശം ഉന്നത ജാതിക്കാര് സ്വന്തമാക്കിയതോടെ മൃതദേഹവുമായി വരുന്നതു തടയാന് തുടങ്ങി.
15 വര്ഷം മുമ്പ് പാലം ഇല്ലാതിരുന്നപ്പോള് മൃതദേഹം വെള്ളത്തില് ഒഴുക്കിവിടുകയാണു ചെയ്തിരുന്നത്. പാലം വന്നപ്പോഴാണ് അതിലൂടെ കയറുകെട്ടിയിറക്കി മൃതദേഹം സംസ്കരിക്കാനുള്ള സാഹചര്യം ഉണ്ടായതെന്നും വിജയ് പറഞ്ഞു. അന്വേഷണം ആരംഭിച്ചതായി എസ്ഐ ബി.പ്രിയങ്ക അറിയിച്ചു.
https://www.facebook.com/Malayalivartha