മകന്റെ വിയോഗം അറിയാതെ അച്ഛനും യാത്രയായി.... ജീവനൊടുക്കിയ കഫേ കോഫി ഡേ സ്ഥാപകന്‍ വി.ജി. സിദ്ധാര്‍ത്ഥയുടെ പിതാവ് അന്തരിച്ചു, വാര്‍ധക്യസഹജമായ അസുഖങ്ങളെ തുടര്‍ന്ന് ഒരു മാസത്തോളമായി ആശുപത്രിയില്‍ ചികിത്സയിലായിരുന്നു
മകന്റെ വിയോഗം അറിയാതെ അച്ഛനും യാത്രയായി. ജീവനൊടുക്കിയ കഫേ കോഫി ഡേ (സിസിഡി) സ്ഥാപകന്‍ വി.ജി. സിദ്ധാര്‍ത്ഥയുടെ പിതാവ് ഗംഗയ്യ ഹെഗ്‌ഡേ (96) നിര്യാതനായി. മൈസൂരുവിലെ ശാന്തവേരി ഗോപാലഗൗഡ ആശുപത്രിയിലായിരുന്നു അന്ത്യം. വാര്‍ധക്യസഹജമായ അസുഖങ്ങളെ തുടര്‍ന്ന് ഒരു മാസത്തോളമായി ആശുപത്രിയില്‍ ചികിത്സയിലായിരുന്നു. അബോധാവസ്ഥയിലായതിനാല്‍ മകന്റെ വിയോഗം ഗംഗയ്യ അറിഞ്ഞിരുന്നില്ല.
മരിക്കുന്നതിനു രണ്ടു ദിവസം മുമ്പ് സിദ്ധാര്‍ത്ഥ ഗംഗയ്യയെ കാണാന്‍ എത്തിയിരുന്നു. ഇതിനു പിന്നാലെയാണ് ഗംഗയ്യ മയക്കത്തിലേക്കു വഴുതിവീണത്. അതിനുശേഷം മകനു സംഭവിച്ചതൊന്നും അച്ഛന്‍ അറിഞ്ഞിട്ടില്ല. ചിക്കമഗളൂരുവിലെ കാപ്പി കര്‍ഷകരുടെ തലതൊട്ടപ്പനെന്നു വിശേഷിപ്പിക്കാവുന്നവിധം സന്പത്തും സ്വാധീനശേഷിയുമുള്ള ഗംഗയ്യ ഹെഗ്‌ഡേക്കും ഭാര്യ വാസന്തിക്കും ഏറെക്കാലത്തെ പ്രാര്‍ഥനകള്‍ക്കും വഴിപാടുകള്‍ക്കുമൊടുവില്‍ കിട്ടിയ ഏക മകനാണു സിദ്ധാര്‍ഥ.
അച്ഛന്റെ സ്വപ്നങ്ങളും പ്രതീക്ഷകളുമെല്ലാം സങ്കല്പിക്കാവുന്നതിനേക്കാള്‍ ഉയരത്തില്‍ സഫലമാക്കിയാണു മകന്‍ വളര്‍ന്നത്. ആഗോളതലത്തില്‍ അറിയപ്പെടുന്ന ബിസിനസുകാരനായും സംസ്ഥാന മുഖ്യമന്ത്രിയുടെ മരുമകനായും മകന്‍ അറിയപ്പെടുമ്പോഴും സ്വന്തം ഗ്രാമത്തിലും എസ്‌റ്റേറ്റിലും ഒതുങ്ങി ജീവിക്കുകയായിരുന്നു ഈ വൃദ്ധദന്പതികള്‍. മൈസൂരുവിലെ ആശുപത്രിയില്‍ സൂക്ഷിച്ചിരിക്കുന്ന മൃതദേഹം സ്വദേശമായ ചിക്കമംഗളൂരുവിലേക്ക് കൊണ്ടുപോകും.
വി.ജെ. സിദ്ധാര്‍ഥയെ സംസ്‌കരിച്ച ചേതനഹള്ളി എസ്‌റ്റേറ്റിലായിരിക്കും ഗംഗയ്യ ഹെഗ്‌ഡെയ്ക്കും അന്ത്യവിശ്രമം ഒരുക്കുക. കഴിഞ്ഞ ജൂലായ് 29 നാണ് സിദ്ധാര്‍ത്ഥയെ നേത്രാവതി പുഴയില്‍ കാണാതായത്. ജൂലായ് 31 നാണ് സിദ്ധാര്‍ത്ഥയുടെ മൃതദേഹം കണ്ടെത്തിയത്.
https://www.facebook.com/Malayalivartha
