ജമ്മു കശ്മീരിന് പ്രത്യേക അപദവി നൽകുന്ന ആർട്ടിക്കിൾ 370 റദ്ദാക്കി മൂന്നാഴ്ചയ്ക്ക് ശേഷം ശ്രീനഗറിലെ സിവിൽ സെക്രട്ടേറിയറ്റിൽ നിന്ന് ജമ്മു കശ്മീർ സംസ്ഥാന പതാക നീക്കം ചെയ്തു. പകരം ദേശീയ പതാക ഉയര്‍ത്തി. ഞായറാഴ്ച ത്രിവർണ പതാക മാത്രമാണ് സെക്രട്ടറിയേറ്റിൽ ഉയർന്നത്.

ജമ്മു കശ്മീർ സർക്കാർ ഞായറാഴ്ച പത്രസമ്മേളനം ഒഴിവാക്കിയതിനാൽ സിവിൽ സെക്രട്ടേറിയറ്റിൽ നിന്ന് സംസ്ഥാന പതാക നീക്കം ചെയ്യുന്നതിനെ കുറിച്ച് ഔദ്യോഗിക പ്രസ്താവനകളൊന്നും ഉണ്ടായിരുന്നില്ല.

ജമ്മു കശ്മീരിന് പ്രത്യേക പദവി നല്‍കിയിരുന്ന 370-ാം അനുച്ഛേദം നീക്കം ചെയ്തതിന് പിന്നാലെ സര്‍ക്കാര്‍ ഓഫീസുകളില്‍ നിന്നും വാഹനങ്ങളില്‍ നിന്നും സംസ്ഥാന പതാക നീക്കംചെയ്ത് തുടങ്ങിയിരുന്നു. എന്നാല്‍, സിവില്‍ സെക്രട്ടറിയേറ്റില്‍നിന്ന് സംസ്ഥാന പതാക നീക്കം ചെയ്തിരുന്നില്ല. ഇനി ഇവിടെയുള്ള എല്ലാ സര്‍ക്കാര്‍ ഓഫീസുകളിലും ദേശീയ പതാക മാത്രമേ കാണാനാകൂ എന്ന് സര്‍ക്കാര്‍ വൃത്തങ്ങള്‍ അറിയിച്ചു. ജമ്മു കശ്മീരിന്റെ ഭരണ സിരകേന്ദ്രമായ സിവില്‍ സെക്രട്ടറിയേറ്റ് ശ്രീനഗറിലാണ് സ്ഥിതി ചെയ്യുന്നത്.

ജമ്മു കശ്മീരിന് സ്വന്തമായുള്ള പതാകയായിരുന്നു നേരത്തെ സര്‍ക്കാര്‍ ഓഫീസുകളിലും മറ്റും ഉണ്ടായിരുന്നത്. സംസ്ഥാനത്തിന്റെ പ്രത്യേക പദവി എടുത്ത് കളഞ്ഞതോടെ ഈ പതാക ഔദ്യോഗികമല്ലാതായി.

ജമ്മു കശ്മീർ സംസ്ഥാനത്തിന്റെ മൂന്ന് ചിഹ്നങ്ങളിൽ ഒന്നായിരുന്നു പ്രത്യേക സംസ്ഥാന പതാക. പ്രത്യേക ഭരണഘടനയും ക്രിമിനൽ നടപടിക്രമ കോഡുമായിരുന്നു മറ്റ് രണ്ടെണ്ണം. ഓഗസ്റ്റ് അഞ്ചിന്, ജമ്മു കശ്മീരിന് പ്രത്യേക പദവി നൽകുന്ന ആർട്ടിക്കിൾ 370 കേന്ദ്രം റദ്ദാക്കുകയും, സംസ്ഥാനത്തെ രണ്ട് കേന്ദ്രഭരണ പ്രദേശങ്ങളായി വിഭജിക്കുകയും ചെയ്തു. ജമ്മു കശ്മീർ നിയമസഭയുള്ള ഒരു കേന്ദ്രഭരണ പ്രദേശവും നിയമസഭയില്ലാത്ത ലഡാക്ക് കേന്ദ്രഭരണ പ്രദേശവുമായാണ് തിരിച്ചിരിക്കുന്നത്.