കഴിഞ്ഞ രണ്ടു ദിവസമായി പാകിസ്ഥാന്‍ മന്ത്രിമാര്‍ ഇന്ത്യക്കെതിരെ പ്രകോപനപരമായ പ്രസ്താവനകള്‍ ഇറക്കുകയാണ്. ഒക്ടോബറിലോ നവംബറിലോ ഇന്ത്യയും പാകിസ്ഥാനും തമ്മില്‍ യുദ്ധമുണ്ടാകുമെന്ന് പാക് മന്ത്രി പറഞ്ഞിരുന്നു. ഇതിനു മറുപടിയെന്നോണം പ്രതികരിച്ചിരിക്കുകയാണ് ഉപരാഷ്ട്രപതി വെങ്കയ്യ നായിഡു. ഇന്ത്യയെ ആരെങ്കിലും ആക്രമിക്കാന്‍ വന്നാല്‍ അവരുടെ ജീവിതത്തിലൊരിക്കലും മറക്കാത്ത മറുപടി നല്‍കുമെന്ന് വെങ്കയ്യ പറഞ്ഞു. 

നമ്മള്‍ ആരേയും ആക്രമിച്ചിട്ടില്ല, ആരേയും ആക്രമിക്കില്ല എന്ന് ഉറപ്പു കൊടുക്കാനുമാകും. എല്ലാവരും നമ്മളെ ആക്രമിക്കാനാണ് വന്നത്.എന്നാല്‍ ആരെങ്കിലും ഇങ്ങോട്ട് ആക്രമിക്കാന്‍ ശ്രമിച്ചാല്‍, അവരുടെ ജീവിതകാലത്ത് ഒരിക്കലും മറത്താനാവാത്ത മറുപടി നല്‍കിയിരിക്കും. നമ്മള്‍ യുദ്ധക്കൊതിയന്മാരല്ല, സ്വാതന്ത്ര്യം ഇഷ്ടപ്പെടുന്ന പൗരന്മാരാണ് വിശാഖപട്ടണത്ത് നടന്ന ചടങ്ങില്‍ വെങ്കയ്യ നായിഡു പറഞ്ഞു.
പാകിസ്ഥാന് മുകളിലൂടെ ഇന്ത്യയിലേക്കുള്ളവ്യോമപാതയും അഫ്ഗാനിസ്താനിലേക്കുള്ള റോഡ് മാര്‍ഗവും അടക്കുന്ന കാര്യം പരിഗണനയിലാണെന്ന് ചൊവ്വാഴ്ച പാകിസ്ഥാന്‍ മന്ത്രി പ്രസ്താവന ഇറക്കിയിരുന്നു. അതിന് പിന്നാലെയാണ് വരുന്ന മാസങ്ങളില്‍ യുദ്ധമുണ്ടാകുമെന്ന പ്രസ്താവനയും വന്നത്.
നമ്മള്‍ മറ്റ് രാജ്യങ്ങളുടെ ആഭ്യന്തര കാര്യങ്ങളില്‍ ഇടപെടാന്‍ ആഗ്രഹിക്കുന്നില്ല, അതുപോലെ മറ്റു രാജ്യങ്ങള്‍ ഇന്ത്യയുടെ ആഭ്യന്തര കാര്യങ്ങളില്‍ ഇടപെടണമെന്നും ആഗ്രഹിക്കുന്നില്ല. കശ്മീര്‍ വിഷയത്തില്‍ പാകിസ്ഥാന്‍ നടത്തുന്ന പ്രതികരണങ്ങളെ സൂചിപ്പിച്ച് വെങ്കയ്യ പറഞ്ഞു. കശ്മീര്‍ ഇന്ത്യയുടെ അവിഭാജ്യ ഘടകമാണ്, അവിടെ പിന്നെ ചര്‍ച്ചയുടെ ആവശ്യകതയെന്താണ് അദ്ദേഹം ചോദിച്ചു.
നമ്മുടെഅയല്‍ക്കാര്‍ തീവ്രവാദികള്‍ക്ക് പണവും പരിശീലനവും നല്‍കിഇന്ത്യയെ തകര്‍ക്കാന്‍ ശ്രമിക്കുകയാണ്. ഇത് മനുഷ്യത്വരഹിതമാണ്. ഇത്അവര്‍ക്ക് തന്നെ ദോഷമായി തീരുമെന്ന കാര്യം അവര്‍ തിരിച്ചറിയാതെ പോകുകയാണ്. നായിഡു പറഞ്ഞു.