രാമസേതു നിര്‍മ്മിച്ചത് ഇന്ത്യന്‍ എന്‍ജീനീയര്‍മാരാണെന്ന വാദവുമായി കേന്ദ്രമന്ത്രി രമേശ് പൊഖ്രിയാല്‍. ഖരഗ്പൂര്‍ ഐഐടിയില്‍ നടന്ന ബിരുദദാന ചടങ്ങിലാണ് കേന്ദ്ര മാനവ വിഭവശേഷി വികസന വകുപ്പ് മന്ത്രിയുടെ വിചിത്രമായ വാദം. ശ്രീലങ്കയിലെ മാന്നാര്‍ ദ്വീപിനും ഇന്ത്യയിലെ രാമേശ്വരത്തിനും ഇടക്ക് നാടയുടെ ആകൃതിയില്‍ ചുണ്ണാമ്പുകല്ലുകള്‍ കൊണ്ടുള്ള ഉയര്‍ന്ന പ്രദേശമാണ് രാമസേതു. ഇത് രൂപപെട്ട രീതി ചരിത്രതാളുകളില്‍ വിശദീകരിച്ചിരിക്കുന്നതിന് വിപരീതമായ പ്രസ്താവനയാണ് കേന്ദ്രമന്ത്രി നടത്തിയത്.

പുരാതന കാലത്ത് നമ്മുടെ രാജ്യത്ത് മികച്ച എന്‍ജിനീയര്‍മാരുണ്ടായിരുന്നു എന്നതില്‍ നിങ്ങള്‍ക്ക് എന്തെങ്കിലും സംശയമുണ്ടോ? ഉദാഹരണത്തിന് രാമസേതു നിര്‍മ്മിച്ചത് ആരാണ്? യുഎസിലേയും ബ്രിട്ടനിലേയും ജര്‍മ്മനിയിലേയും എന്‍ജിനീയര്‍മാരാണോ? അല്ല, നമ്മുടെ എന്‍ജിനീയര്‍മാരാണ്.. ഇതുകേട്ട് സദസ്സിലുണ്ടായിരുന്ന വിദ്യാര്‍ത്ഥികള്‍ നിശ്ശബ്ദരായി. എന്നാല്‍ സദസില്‍ നിന്ന് പ്രതികരണമൊന്നും ലഭിക്കാതായതോടെ മന്ത്രി വീണ്ടും വീണ്ടും ചോദ്യം ആവര്‍ത്തിച്ച് എന്തെങ്കിലും പറയൂ എന്ന് ആവശ്യപ്പെട്ടതോടെ സദസ്സ് കയ്യടിച്ചു. ഞാന്‍ പറഞ്ഞത് ശരിയല്ലേ, ശരിയല്ലേ? ദയവായി എന്തെങ്കിലും പറയൂ.. എന്തുകൊണ്ടാണ് നിങ്ങള്‍ നിശബ്ദരായി ഇരിക്കുന്നത്. ഇതോടെയാണ് സദസില്‍ നിന്ന് കൈയടി ഉയര്‍ന്നത്. പിന്നാലെ സംസ്‌കൃത ഭാഷയാണ് ലോകത്തിലെ ഏറ്റവും പുരാതന ഭാഷയെന്നും, സംസ്‌കൃതം ദൈവത്തിന്റെ ഭാഷയാണെന്നും മരന്തി പറഞ്ഞു. ഭാവിയില്‍ സംസാരിക്കുന്ന കമ്പ്യുൂട്ടറുകള്‍ നിര്‍മ്മിച്ചെടുക്കുമ്പോള്‍ ആ കമ്പ്യൂട്ടറുകള്‍ക്ക് ഏറ്റവും അനുയോജ്യമായതും ശാസ്ത്രീയമായതുമായ ഭാഷ സംസ്‌കൃതമായിരിക്കുമെന്നും അദേഹം കൂട്ടിച്ചേര്‍ത്തു.

ശ്രീലങ്കയിലെ മാന്നാര്‍ ദ്വീപിനും ഇന്ത്യയിലെ രാമേശ്വരത്തിനും ഇടക്ക് നാടയുടെ ആകൃതിയില്‍ ചുണ്ണാമ്പുകല്ലുകള്‍ കൊണ്ടുള്ള ഉയര്‍ന്ന പ്രദേശമാണ് രാമസേതു. ഇന്ത്യന്‍ ഉപഭൂഖണ്ഡത്തിനു പുറത്ത് ഈ പ്രദേശം ആഡംസ് ബ്രിഡ്ജ് അതായത് ആദാമിന്റെ പാലം എന്നാണ് എന്നറിയപ്പെടുന്നത്. കടലിലെ ജലപ്രവാഹം നിമിത്തം പവിഴപ്പുറ്റുകളില്‍ മണല്‍ നിക്ഷേപിക്കപ്പെട്ട് രൂപം കൊണ്ട തിട്ടാണിത്. 30 കി.മി നീളമുള്ള രാമ സേതു ഇന്ത്യക്കും ശ്രീലങ്കയ്ക്കും ഇടക്കുള്ള പാലമായി ഉപയോഗിച്ചിരുന്നു എന്ന് ചില ഗവേഷണങ്ങള്‍ പറയുന്നുണ്ട്. ഇതിന്റെ പല ഭാഗങ്ങളിലും ജല നിരപ്പില്‍ നിന്നുള്ള ആഴം വളരെ കുറവായതിനാല്‍ ഇതിന്റെ മുകളിലൂടെ സഞ്ചരിക്കാന്‍ കപ്പലുകള്‍ക്ക് ബുദ്ധിമുട്ട് ഉണ്ട്. 1480 യില്‍ ഉണ്ടായ കൊടുങ്കാറ്റില്‍ പെടുന്നത് വരെ ഇത് ജല പരപ്പിനു മുകളില്‍ കാണാമായിരുന്നു എന്ന് ചില പുരാതന രേഖകള്‍ പറയുന്നു. ഇന്ത്യന്‍ സര്‍ക്കാര്‍ 2007 ല്‍ പ്രഖ്യാപിച്ച സേതു സമുദ്രം പദ്ധതി ഈ പ്രദേശത്തിന് വീണ്ടും ജനശ്രദ്ധ നേടിക്കൊടുത്തിരുന്നു ഈ സാഹചര്യത്തിലാണ് മന്ത്രിയുടെ യമണ്ടന്‍ തള്ള്.

പ്രസംഗത്തിനൊടുവില്‍ രാമസേതുവിനെക്കുറിച്ചുള്ള തന്റെ പരാമര്‍ശം ശരിയാണോ അല്ലയോ എന്നും മന്ത്രി സദസ്സിനോട് ചോദിച്ചെങ്കിലും ആരും മിണ്ടിയിരുന്നില്ല. പ്രസംഗത്തിനുശേഷം നടന്ന പത്രസമ്മേളനത്തില്‍ ഈ പരാമര്‍ശത്തെക്കുറിച്ച് ചോദിച്ചപ്പോള്‍ 'താന്‍ ഉദ്ദേശിച്ചത് രാമസേതുവിനെക്കുറിച്ച് പുതിയ ഗവേഷണത്തിന് ആഹ്വാനം ചെയ്യുക എന്നതായിരുന്നുവെന്നാണെന്നും'' അദ്ദേഹം പറഞ്ഞു.