ഇന്ത്യയിൽ ആദ്യ വാണിജ്യകേന്ദ്രം ഒരുക്കാൻ ഐ ഫോൺ നിർമ്മാതാക്കളായ ആപ്പിൾ കമ്പനി
ഇന്ത്യയിൽ ആദ്യ വാണിജ്യകേന്ദ്രം ഒരുക്കാൻ ഐ ഫോൺ നിർമ്മാതാക്കളായ ആപ്പിൾ കമ്പനി ഒരുങ്ങുന്നു. ഇന്ത്യയിൽ ഫോൺ നിർമ്മിക്കാനും , ഇടനിലക്കാരില്ലാതെ ഫോൺ വിൽക്കാനും തയ്യാറായാണ് കമ്പനി വരുന്നത് . മുംബൈയിലായിരിക്കും ഇന്ത്യയിലെ ആദ്യ ആപ്പിൾ സ്റ്റോർ ആരംഭിക്കുന്നത് . കേന്ദ്ര മന്ത്രിസഭ സിംഗിൾ ബ്രാൻഡ് റീട്ടെയ്ലർമാർക്ക് ഇന്ത്യയിൽ നിലനിന്നിരുന്ന നിയന്ത്രണങ്ങളിൽ പലതും എടുത്ത് കളഞ്ഞതിനു തൊട്ടടുത്ത ദിവസമാണ് കമ്പനിയുടെ നിർണ്ണായക പ്രഖ്യാപനം പുറത്ത് വരുന്നത് .
പ്രധാനമന്ത്രിയും , അദ്ദേഹത്തിന്റെ ടീമും തങ്ങൾക്ക് നൽകുന്ന പിന്തുണയ്ക്ക് നന്ദി പറഞ്ഞ ശേഷമായിരുന്നു കമ്പനി ഈ പ്രഖ്യാപനം അറിയിച്ചത് . ഇന്ത്യയിലെ ആപ്പിള് ഉപയോക്താക്കൾക്ക് ഓണ്ലൈനിലൂടെയും ആപ്പിള് സ്റ്റോറിലൂടെയും സേവനങ്ങൾ എത്തിച്ച് നൽകുന്നതിൽ അതീവ സന്തോഷമുണ്ടെന്നും കമ്പനി അറിയിക്കുകയുണ്ടായി . അടുത്ത കാലം വരെ ആപ്പിളിനെ പോലെയുള്ള കമ്പനികള് തങ്ങളുടെ ഫോണുകളും മറ്റും ഉണ്ടാക്കാനുള്ള സാമഗ്രികളില് 30 ശതമാനം ഇന്ത്യയില് നിന്നു തന്നെ കണ്ടെത്തണം എന്ന നയം ഇപ്പോള് വേണ്ടന്നു വച്ചതിന് പിന്നാലെയാണ് ആപ്പിൾ രംഗത്ത് വന്നിരിക്കുന്നത്. ഇന്ത്യയിൽ വ്യവസായ കേന്ദ്രം ആരംഭിക്കാനും ഒട്ടേറെ തൊഴിലവസരങ്ങൾ സൃഷ്ടിക്കാനും ആപ്പിളിന് കഴിയും .
https://www.facebook.com/Malayalivartha