ടി.ആര്‍.പി റേറ്റിംഗ് കേസില്‍ പ്രതിയായ മാധ്യമപ്രവര്‍ത്തകന്‍ അര്‍ണബ് ഗോസ്വാമിയുടെ പേരില്‍ പ്രചരിക്കുന്ന വാട്‌സാപ് ചാറ്റുകള്‍ ബോളിവുഡിനെ നാറ്റിക്കുന്നു. ബോളിവുഡ് ് താരങ്ങളായ കങ്കണ റനൗട്ടും ഋതിക് റോഷനും തമ്മിലുള്ള ബന്ധത്തെക്കുറിച്ച് പരാമര്‍ശം ഏറെ ചര്‍ച്ചചെയ്യപ്പെടുകയാണ്. കങ്കണക്ക് 'ഇറോട്ടോമാനിയ' ആണെന്നാണ് അര്‍ണബ് ചാറ്റില്‍ പറയുന്നത്. കങ്കണയ്ക്കു ഋതിക്കിനോടു ലൈംഗികാസക്തിയാണെന്നും നടി പരിധി കടന്നെന്നും പറയുന്നു. ഇപ്പോള്‍ കങ്കണയെ ആളുകള്‍ക്കു പേടിയാണ്. ഉടന്‍ തന്നെ നടിയുടെ കാര്യത്തില്‍ ഒരു തീരുമാനമുണ്ടാകുമെന്നും ടെലിവിഷന്‍ റേറ്റിങ്ങ് കമ്പനിയായ ബാര്‍കിന്റെ മുന്‍ സിഇഒ പാര്‍ഥോ ദാസ്ഗുപ്തയുമായി നടത്തിയ ചാറ്റില്‍ അര്‍ണാബ് പറയുന്നു.

അര്‍ണബ് ഗോസ്വാമിയും പാര്‍ഥോ ദാസ്ഗുപ്തയും തമ്മിലുള്ള വാട്‌സാപ് ചാറ്റ് എന്ന പേരില്‍ പ്രചരിക്കുന്നത് ഞെട്ടിക്കുന്ന വിവരങ്ങളായിരുന്നു. ബാലാക്കോട്ട് ആക്രമണം അര്‍ണബ് മുന്‍കൂട്ടി അറിഞ്ഞിരുന്നുവെന്ന് ചാറ്റുകള്‍ സൂചിപ്പിക്കുന്നുവെന്ന് ദേശീയമാധ്യമം റിപ്പോര്‍ട്ട് ചെയ്യുന്നു. 'നമ്മള്‍ ഇത്തവണ ജയിക്കും' എന്നായിരുന്നു പുല്‍വാമ ആക്രമണം അറിഞ്ഞതിനു ശേഷം അര്‍ണബിന്റെ പ്രതികരണം. 2019 ഫെബ്രുവരി 23ന് നടന്ന ചാറ്റുകളാണ് പുറത്തുവന്നത്.

2019 ഫബ്രുവരി 14 ന് നടന്ന പുല്‍വാമ ആക്രമണത്തില്‍ 40 ഇന്ത്യന്‍ സൈനികരാണ് വീരമൃത്യു വരിച്ചതെന്നും ചാറ്റില്‍ പറയുന്നതായ വാര്‍ത്ത നേരത്തെ വന്നിരുന്നു. പാക്കിസ്ഥാനുള്ള തിരിച്ചടിയായി ഇന്ത്യ നടത്തിയ ബാലാക്കോട്ട് ആക്രമണം 3 ദിവസം മുന്‍പേ അര്‍ണബ് അറിഞ്ഞിരുന്നുവെന്നും ചാറ്റുകള്‍ സൂചിപ്പിക്കുന്നു. 'വലിയ എന്തെങ്കിലും സംഭവിക്കും' എന്നാണ് ആക്രമണത്തിന് മൂന്നു ദിവസം മുന്‍പ് അര്‍ണബ് പറയുന്നത്.

അതേസമയം, അര്‍ണബ് ഗോസ്വാമിയുമായുള്ള വാട്സാപ്പ് ചാറ്റ് പുറത്തുവന്നതിനു പിന്നാലെ ബാര്‍ക്ക് മുന്‍ സി.ഇ.ഒ പാര്‍ത്തോ ദാസ് ഗുപ്ത ആശുപത്രിയില്‍ ചികിത്സയിലാണ്. രക്തസമ്മര്‍ദ്ദം കൂടുകയും രക്തത്തിലെ പഞ്ചസാരയുടെ അളവ് കുറഞ്ഞതിനെത്തുടര്‍ന്നുമാണ് ആശുപത്രിയില്‍ പ്രവേശിപ്പിച്ചത്. മുംബൈയിലെ ജെ.ജെ ആശുപത്രിയില്‍ ചികിത്സയിലാണ് അദ്ദേഹം. ടി.ആര്‍.പി തട്ടിപ്പുമായി ബന്ധപ്പെട്ട് മുംബൈ തലോജ ജയില്‍ കഴിയുകയായിരുന്നു പാര്‍ത്തോ ദാസ്. ഡിസംബര്‍ 24-നാണ് പാര്‍ത്തോദാസിനെ പോലീസ് അറസ്റ്റ് ചെയ്തത്. ടി.ആര്‍.പി തട്ടിപ്പിന്റെ മുഖ്യ സൂത്രധാരന്‍ പാര്‍ത്തോ ദാസ് ആണെന്നാണ് മുംബൈ പോലീസിന്റെ കണ്ടെത്തല്‍.