പശ്ചിമ ബംഗാളില് തൃണമൂല് കോണ്ഗ്രസില് പ്രതിസന്ധി രൂക്ഷമാകുന്നു
പശ്ചിമ ബംഗാളില് തൃണമൂല് കോണ്ഗ്രസില് 60 വിമത എം.എല്.എമാര്ക്ക് പിന്നാലെ കൂടുതല് എം.എല്.എമാരും എം.പിമാരും മറുകണ്ടം ചാടാന് തയ്യാറാകുന്നു എന്ന റിപ്പോര്ട്ടുകളാണ് പുറത്തുവരുന്നത്. മമത ബാനര്ജി ഇന്ന് വിളിച്ചു ചേര്ത്ത യോഗത്തില് എട്ട് എം.എല്.എമാരും ആറ് എം.പിമാരും മാത്രമാണ് എത്തിയത്. ആറ് എം.പിമാരില് രാജ്യസഭയിലെയും ലോക്സഭയിലെയും അംഗങ്ങളുണ്ട്.
ലോക്സഭയില് മാത്രം തൃണമൂലിന് 29 എം.പിമാരുണ്ട്. ഇതില് നാല് പേര് മാത്രമാണ് പങ്കെടുത്തത്. 13 രാജ്യസഭാ എം.പിമാരില് 11 പേര് യോഗത്തില് നിന്ന് വിട്ടുനിന്നു. മമതയുടെ അനന്തരവന് അഭിഷേക് ബാനര്ജിയാണ് യോഗത്തില് പങ്കെടുത്ത എം.പിമാരില് ഒരാള്. മദന് മിത്ര, ബീന മൊണ്ടല്, അഷിമ പത്ര, ഫിര്ഹാദ് ഹക്കിം, കുനാല് ഘോഷ്, സോവന്ദേബ് ചട്ടോപാധ്യായ, ബിമന് ബാനര്ജി, അശോക് ദേബ് എന്നിവരാണ് പങ്കെടുത്ത എംഎല്എമാര്.
തൃണമൂല് കോണ്ഗ്രസ് അദ്ധ്യക്ഷ മമത ബാനര്ജിയുമായി ഇടഞ്ഞ് ഋതബ്രത ബാനര്ജിയുടെ നേതൃത്വത്തില് അറുപതോളം എംഎല്എമാര് ചേര്ന്നാണ് വിമത വിഭാഗം രൂപീകരിച്ചത്. ഇന്നലെ ഋതബ്രത നടത്തിയ യോഗത്തിന് ശേഷമാണ് ഈ ഭിന്നത പരസ്യമായത്. അഭിപ്രായ വ്യത്യാസങ്ങളുണ്ടെങ്കിലും തൃണമൂലിന്റെ നേതാവായി മമത തന്നെ തുടരണമെന്നാണ് ഒരുകൂട്ടം എംഎല്എമാര് വാദിക്കുന്നത്. ബുധനാഴ്ച പ്രതിപക്ഷ നേതാവായി ഋതബ്രത അധികാരമേറ്റ ശേഷം, തൃണമൂല് വിഭജിക്കാന് തനിക്ക് ഉദ്ദേശമില്ലെന്ന് ഋതബ്രത മാദ്ധ്യമങ്ങളോട് പറഞ്ഞിരുന്നു.
https://www.facebook.com/Malayalivartha
