സ്‌ഫോടനക്കേസില്‍ നിലവില്‍ ജാമ്യത്തില്‍ കഴിയുന്ന പിഡിപി നേതാവ് അബ്ദുള്‍ നാസര്‍ മദനിയുടെ ആരോഗ്യനിസ തൃപ്തികരമല്ലെന്ന് റിപ്പോര്‍ട്ട്. ദിവസംതോറും ആരോഗ്യനില വഷളായിക്കൊണ്ടിരിക്കുകയാണ്. മെച്ചപ്പെട്ട ചികിത്സ ഉറപ്പാക്കാന്‍ കേരളത്തിലേക്ക് കൊണ്ടുവരണമെന്നാവശ്യം മുറുകുന്നു.

മദനിയുടെ രണ്ടു കൈകളും മരവിച്ച അവസ്ഥയിലാണുള്ളത്. കൈകളിലേക്കുള്ള രക്തയോട്ടം കുറഞ്ഞതിനുപുറമെ പ്രമേഹ പ്രശ്‌നങ്ങളും ഉണ്ട്. ബെംഗളൂരു വിട്ടുപോകരുതെന്ന ജാമ്യവ്യവസ്ഥയുണ്ട്. അതുകൊണ്ടുതന്നെ ബെംഗളൂരു വീട്ടിലാണ് താമസം. വന്‍ പോലീസ് സന്നാഹം കാവലായി ഉണ്ട്.

ആശുപത്രിയിലേക്ക് പ്രവേശിപ്പിക്കാമെന്ന് വിചാരിച്ചാലും വന്‍ പോലീസ് സംഘം ആശുപത്രിയിലെത്തി സുരക്ഷാ പരിശോധന നടത്തുന്നത് ആശുപത്രി അധികൃതര്‍ക്കും രോഗികള്‍ക്കും ബുദ്ധിമുട്ടാണ്. അതുകൊണ്ടുതന്നെ പല ആശുപത്രികളും മടികാണിക്കുന്നുവെന്ന് പിഡിപി പ്രവര്‍ത്തകര്‍ പറയുന്നു.

മദനിയുടെ കാലിലെയും കൈകളിലെയും ഞരമ്പുകളുടെ അവസ്ഥ അതീവഗുരുതരമാണെന്ന് ഞരമ്പു വിദഗ്ദന്‍ റിപ്പോര്‍ട്ട് നല്‍കിയിട്ടുണ്ട്. അദ്ദേഹത്തിന്റെ ജവന്‍ രക്ഷിക്കാന്‍ കേരളം ഇടപെടണമെന്ന് വിവിധ മുസ്ലീം സംഘടനകള്‍ ആവശ്യപ്പെടുന്നു. അദ്ദേഹത്തെ കേരളത്തിലേക്ക് കൊണ്ടുപോകാന്‍ സര്‍വകക്ഷി സംഘത്തെ അയക്കണമെന്നും പ്രവര്‍ത്തകര്‍ ആവശ്യപ്പെട്ടു.