അഗസ്ത വെസ്റ്റ്‌ലാന്‍ഡ് ഹെലികോപ്റ്റര്‍ അഴിമതിയുടെ ഇടനിലക്കാരന്‍ ക്രിസ്റ്റ്യന്‍ മിഷേലിനെ ഇന്ത്യക്ക് കൈമാറണമെന്ന് ദുബൈ കോടതി. കഴിഞ്ഞ വര്‍ഷമാണ് യു.എ.ഇയില്‍ മിഷേല്‍ അറസ്റ്റിലാകുന്നത്. കുറ്റവാളിയെ ഇന്ത്യക്ക് കൈമാറാനുള്ള നടപടികള്‍ നടന്നു കൊണ്ടിരിക്കുകയായിരുന്നു. ഹെലികോപ്റ്റര്‍ കരാര്‍ അഴിമതിക്ക് കൈക്കൂലി നല്‍കുന്നതിന് ഇടനിലക്കാരനായി നിന്നത് ക്രിസ്റ്റിയന്‍ മിഷേലാണ്. രാഷ്ട്രപതി, പ്രധാനമന്ത്രി, മുന്‍ പ്രധാനമന്ത്രിമാര്‍ തുടങ്ങി വി.വി.ഐ.പികള്‍ക്ക് സഞ്ചരിക്കുന്നതിനായി 12 ആഢംഭര ഹെലികോപ്റ്ററുകള്‍ വാങ്ങാനുള്ള കരാറില്‍ അഴിമതി കാണിച്ചുവെന്നതാണ് കേസ്. 2007ലാണ് സംഭവം നടന്നത്. 3600 കോടി രൂപയുടെ കരാറില്‍ 450 കോടിയുടെ അഴിമതി നടന്നുവെന്നാണ് ആരോപണം.

അഗസ്തയുടെ മാതൃകമ്പനിയായ ഫിന്‍മെക്കാനിക്ക എന്ന ഇറ്റാലിയന്‍ കമ്പനി അധികൃതര്‍ ഹെലികോപ്റ്റര്‍ കരാര്‍ ലഭിക്കാന്‍ ഇന്ത്യയിലെ കോണ്‍ഗ്രസ് നേതാക്കള്‍ക്കും വ്യോമസേനാ ഉദ്യോഗസ്ഥര്‍ക്കും കൈക്കൂലി നല്‍കിയെന്നും ഇതിന് ഇടനില നിന്നത് മിഷേലാണെന്നുമാണ് കേസ്. ആരോപണത്തെ തുടര്‍ന്ന് 2013ല്‍ കേന്ദ്രം ഹെലികോപ്റ്റര്‍ കരാര്‍ റദ്ദു ചെയ്തിരുന്നു. കൈക്കൂലി വാങ്ങിയതിനെ തുടര്‍ന്ന് മുന്‍ വ്യോമസേനാ മേധാവി എസ്.പി ത്യാഗി 2016ല്‍ അറസ്റ്റിലായിരുന്നു.