കുവൈറ്റിൽ വിദേശി ബാച്ചിലർമാർക്കായി പ്രത്യേക ആറ് പാർപ്പിട സിറ്റികൾ
കുവൈറ്റിൽ വിദേശി ബാച്ചിലർമാർക്കായി പ്രത്യേക ആറ് പാർപ്പിട സിറ്റികൾ. കുടുംബ പാര്‍പ്പിട മേഖലകളില്‍ നിന്നും വിദേശി ബാച്ചിലര്‍മാരെ ഒഴിപ്പിക്കുന്നതിന്റെ ഭാഗമായാണ് പാർപ്പിട സിറ്റികൾ നിർമ്മിക്കുന്നതിന് സര്‍ക്കാര്‍ തീരുമാനിച്ചതായി കുവൈത്ത് മുനിസിപ്പാലിറ്റി ഡയറക്ടര്‍ ജനറല്‍ അഹമ്മദ് അല്‍ മന്‍ഫൂഹി അറിയിച്ചു. രാജ്യത്തെ ആറ് ഗവെര്‍ണറേറ്റുകള്‍ കേന്ദ്രീകരിച്ചു നടപ്പിലാക്കാന്‍ ഉദ്ദേശിക്കുന്ന സര്‍ക്കാര്‍ പദ്ധതി സംബന്ധിച്ചു മുനിസിപ്പാലിറ്റി അംഗം അഹമ്മദ് ഹദിയന്‍ അല്‍ ഇനാസിയുടെ ചോദ്യങ്ങള്‍ക്കു മറുപടി നല്‍കുകയായിരുന്നു മന്‍ഫൂഹി
പ്രോജെക്ടസ് അതോറിറ്റിയുമായുള്ള പാര്‍ട്ടിനര്‍ഷിപ്പില്‍ സിറ്റികള്‍ നിര്‍മ്മിക്കുന്നതിനുള്ള പദ്ധതികള്‍ക്കാണ് സര്‍ക്കാര്‍ ആലോചിക്കുന്നത്. കുടുംബമില്ലാതെ രാജ്യത്ത് വസിക്കുന്ന കുറഞ്ഞ വരുമാനക്കാരായ ബാച്ചിലര്‍മാരെ എല്ലാവിധ സൗകര്യങ്ങളോടെ ആരോഗ്യം, സുരക്ഷ, വിനോദം, എന്നിവയൊരുക്കി പ്രത്യേക പാര്‍പ്പിട കേന്ദ്രങ്ങളിലേക്ക് മാറ്റുന്നതിനാണ് നീക്കം.
നിലവില്‍ സ്വകാര്യ പാര്‍പ്പിട മേഖലകളില്‍ വിദേശി ബാച്ചിലര്‍മാരെ താമസിപ്പിക്കുന്നത് നിരവധി പരാതികള്‍ക്ക് ഇടയാക്കുന്നതായും, സാമൂഹ്യ സുരക്ഷക്ക് വലിയ ഭീഷണി ഉയര്‍ത്തുന്നതായും പാര്‍ലമെന്റില്‍ ഉള്‍പ്പെടെ വലിയ ചര്‍ച്ചക്ക് ഇടയാക്കിയ സാഹചര്യത്തിലാണ് സര്‍ക്കാര്‍ വിദേശി ബാച്ചിലര്‍ സിറ്റികള്‍ നിർമ്മിക്കുന്നതിന് തീരുമാനിച്ചത്.
ഇതോടെ കുടുംബം കൂടെയില്ലാതെ കുവൈറ്റില്‍ ജോലി ചെയ്യുന്ന മലയാളികള്‍ ഉള്‍പ്പെടെയുള്ള വിദേശി ബാച്ചിലര്‍മാര്‍ക്ക് താമസ സ്ഥലം വലിയൊരു പ്രതിസന്ധിയാകും.
https://www.facebook.com/Malayalivartha
