യൂറോപ്യൻ യൂണിയനിൽ ഇനി 27 രാജ്യങ്ങൾ മാത്രം.. ബ്രിട്ടൺ യൂറോപ്യന്‍ യൂണിയന്റെ പടിയിറങ്ങിയതോടെ ഇന്ത്യ അടക്കമുള്ള രാജ്യങ്ങൾ ഏറെ പ്രതീക്ഷയിലാണ്. ഇനി മുതൽ ബ്രിട്ടന് മറ്റു രാജ്യങ്ങളുമായി സ്വതന്ത്രമായി വ്യാപാരപങ്കാളിത്ത കരാറുകൾ ഉറപ്പിക്കാൻ സാധിക്കും എന്നതാണ് ഇതിനു കാരണം ..

ഇന്ത്യന്‍ വിദ്യാര്‍ഥികൾക്കും ഇത് അനുകൂലമായിരിക്കും എന്നാണു കരുതുന്നത് . അതേസമയം, യുകെയിലെ റിയല്‍ എസ്റ്റേറ്റ് രംഗത്ത് നിക്ഷേപം നടത്തിയ ഇന്ത്യക്കാര്‍ക്ക് അത്ര അനുകൂലമാകാതിരിക്കാനും സാധ്യതകളുണ്ട് .

നികുതി ഘടനയില്‍ വലിയ മാറ്റങ്ങള്‍ വരുമെന്നതാണ് റിയല്‍ എസ്റ്റേറ്റ് നിക്ഷേപകരെ ആശങ്കയിലാക്കുന്നത്. ടാറ്റ ഉള്‍പ്പെടെയുള്ള ഇന്ത്യന്‍ വന്‍കിട വ്യവസായികളെയും ആശങ്കപ്പെടുത്തുന്നതാണ് പുതിയ നികുതിഘടന. യൂറോപ്യന്‍ യൂണിയന്‍ രാജ്യങ്ങളിലെ ഇന്ത്യന്‍ സംരംഭകരുടെ ഉത്പന്നങ്ങള്‍ക്ക് ബ്രിട്ടീഷ് വിപണിയില്‍ പ്രവേശനം കിട്ടാനും പ്രസായമായിരിക്കും

ഇന്ത്യൻ സമയം ഇന്ന് രാവിലെ 4 : 30 നാണ് യൂറോപ്യന്‍ യൂണിയനുമായുള്ള 47 വര്‍ഷത്തെ ബന്ധം ബ്രിട്ടണ്‍ അവസാനിപ്പിച്ചത് ..വിടപറയലിന് പിന്നാലെ ബ്രക്സിറ്റിനെ അനുകൂലിക്കുന്നവര്‍ തെരുവുകളില്‍ ആഹ്ളാദ പ്രകടനവും എതിര്‍ക്കുന്നവര്‍ പ്രതിഷേധ പ്രകടനവും നടത്തി. മൂന്നര വര്‍ഷത്തെ ചര്‍ച്ചകള്‍ക്കൊടുവിലാണ് ബ്രിട്ടണ്‍ എക്സിറ്റ് പോള്‍ എന്നര്‍ത്ഥമുള്ള ബ്രെക്സിറ്റ് നടപ്പായത്

2016 ജൂണ്‍ 23 നായിരുന്നു ബ്രിട്ടണ്‍ യൂറോപ്യന്‍ യൂണിയന്‍റെ ഭാഗമായി നില്‍ക്കണമോ വേണ്ടയോ എന്ന് തീരുമാനിക്കാന്‍ ഹിതപരശോധന നടന്നത്. ഇതില്‍ 51.89 ശതമാപേര്‍ ബ്രിട്ടണ്‍ യൂറോപ്യന്‍ യൂണിയന്‍ വിടണം എന്ന നിലപാടിനൊപ്പം നിന്നപ്പോള്‍ 48.11 ശതമാനം വോട്ടര്‍മാരാണ് ബ്രെക്സിറ്റിനെ എതിര്‍ത്തത്. 2019 മാര്‍ച്ച് 29 ന് ബ്രെക്സിറ്റ് നടപ്പാക്കാനായിരുന്നു തീരുമാനമെങ്കിലും കരാറില്‍ ധാരണയില്‍ എത്താന്‍ കഴിയാത്തതിനെ തുടര്‍ന്ന് നീണ്ടു പോവുകയായിരുന്നു.

യൂറോപ്യന്‍ യൂണിയനില്‍ നിന്നുള്ള പുറത്തുകടക്കല്‍ ഒരിക്കലും ഒരു അവസാനമല്ലെന്നും മറിച്ച് ഒരുതുടക്കമാണെന്നും പ്രധാനമന്ത്രി ബോറിസ് ജോണ്‍സണ്‍ പറഞ്ഞു. യൂറോപ്യന്‍ യൂണിയന്‍ ചെയ്ത കാര്യങ്ങളെ തള്ളിപ്പറയുന്നില്ലെന്നും അദ്ദേഹം പറഞ്ഞു

ബ്രിട്ടന്‍ യൂറോപ്പിന് പുറത്തുകടക്കുമ്പോള്‍ ആഗോള വിപണിയില്‍ സംഭവിക്കുന്ന മാറ്റങ്ങള്‍ എന്തായിരിക്കുമെന്നാണ് ലോകം ഉറ്റുനോക്കുന്നത്. നികുതി ആനുകൂല്യങ്ങള്‍ നഷ്‍ടമാകുന്ന കമ്പനികളും ധനകാര്യ സ്ഥാപനങ്ങളും യുകെയില്‍ നിന്ന് യൂറോപ്പിലെ മറ്റേതെങ്കിലും രാജ്യത്തേക്ക് പ്രവര്‍ത്തനം മാറ്റാന്‍ സാധ്യതയുണ്ട്. അങ്ങനെയെങ്കിൽ നികുതി താരതമ്യേന കുറവായ അയര്‍ലന്‍ഡിലേക്കായിരിക്കും സാമ്പത്തിക സ്ഥാപനങ്ങള്‍ മാറുക എന്നും വിലയിരുത്തുന്നു .

എയര്‍ബസ് ഓഫീസ് ഫ്രാന്‍സിലേക്ക് മാറ്റുമെന്നാണ് സൂചന. യൂറോപ്യന്‍ യൂണിയന്‍ വിടാന്‍ യുകെയെ ഏറ്റവുമധികം പ്രേരിപ്പിച്ച യുഎസ് പ്രസിഡന്‍റ് ഡോണള്‍ഡ് ട്രംപ് യുകെയുമായി പുതിയ വ്യാപാര ഉടമ്പടിക്ക് തയ്യാറായേക്കാം എന്നുള്ള പ്രതീക്ഷയും ലോക രാജ്യങ്ങൾ പുലർത്തുന്നു . ഉഭയകക്ഷി വ്യാപാര കരാറിന് തയ്യാറാണെന്ന സൂചനയുമായി യുഎസ് സ്റ്റേറ്റ് സെക്രട്ടറി മൈക്ക് പൊംപെയോ അടുത്തിടെ യുകെയില്‍ എത്തിയിരുന്നതും ഇതിന്റെ സൂചനയായി കണക്കാക്കാം

വേര്‍പിരിയല്‍ നടപടികള്‍ പൂര്‍ത്തിയാക്കാന്‍ ബ്രിട്ടനും യൂറോപ്യന്‍ യൂണിയനും ഇടയില്‍ 11 മാസത്തെ സമയം കൂടിയുണ്ട്. പൂര്‍ണ്ണ അര്‍ത്ഥത്തില്‍ ബ്രിട്ടണ്‍ യൂറോപ്യന്‍ യൂണിയനില്‍ നിന്ന് വേര്‍പിരിയുക ഡിസംബര്‍ 31 നാണ്. അതുവരെ ജനങ്ങളുടെ സ്വതന്ത്ര സഞ്ചാരം അടക്കമുള്ള യൂറോപ്യന്‍ യൂണിയന്‍ നിയമങ്ങള്‍ ബ്രിട്ടനും ബാധകമായിരിക്കും.

ബ്രെക്സിറ്റ് പൂര്‍ണമായി നടപ്പാകുന്നതുവരെ ബ്രിട്ടനിലെ ജനങ്ങളുടെ ജീവിതത്തില്‍ പെട്ടെന്ന് വലിയ മാറ്റങ്ങളുണ്ടാകില്ല. അടുത്ത 11 മാസം കൂടി നികുതിഘടനയും യാത്രാസംവിധാനവും വ്യാപരവും നിലവിലെ രീതിയില്‍ തുടരും.

ബ്രിട്ടീഷ് പൗരന്‍മാര്‍ മറ്റ് യൂറോപ്യന്‍ യൂണിയന്‍ രാജ്യങ്ങളില്‍ എന്തുമ്പോള്‍ പാസ്‍പോര്‍ട്ട് കസ്റ്റംസ് പരിശോധനയില്‍ നിലവിലുള്ള പരിഗണന തുടരും. ഡ്രൈവിങ് ലൈസന്‍സിന് ഉള്‍പ്പെടെ പരസ്‍പരമുള്ള അംഗീകാരം തുടരും. മറ്റ് യൂറോപ്യന്‍ രാജ്യങ്ങളിലെ ബ്രിട്ടീഷ് പൗരന്‍മാര്‍ക്ക് പെന്‍ഷന്‍ ഉള്‍പ്പെടെയുള്ള ആനുകൂല്യങ്ങളും തുടരും. പാസ്‍പോര്‍ട്ടിനാണ് ആദ്യം മാറ്റമുണ്ടാവുക. മെറൂണ്‍ നിറത്തിലുള്ള നിലവിലെ പാസ്‍പോര്‍ട്ടിന് പകരം പഴയ കടുംനീല നിറത്തിലുള്ള ബ്രിട്ടീഷ് പാസ്‍പോര്‍ട്ട് തിരിച്ചുവരും. ബ്രിട്ടന്‍ ബ്രെക്സിറ്റ് സ്‍മൃതി നാണയങ്ങള്‍ പുറത്തിറക്കും.

ഏതായാലും ഇപ്പോൾ ബ്രെക്സിറ് യാഥാർഥ്യമായതോടെ ആഘോഷവും പ്രതിഷേധവും
ഒപ്പത്തിനൊപ്പം ആയി തുടരുകയാണ്. ഡിസംബർ മാസത്തോടെ പൂർണമായും ബ്രിട്ടൻ യൂറോപ്യൻ യൂണിയനിൽ നിന്ന് വിട്ടതിനു ശേഷമേ യഥാർത്ഥ ചിത്രം ലഭിക്കുകയുള്ളൂ