ഒരു ദിവസം കൊണ്ട് പാസ്‌പോര്‍ട്ട് ലഭ്യമാക്കുന്ന തല്‍ക്കാല്‍ സേവനം ആരംഭിച്ചതായി കുവൈറ്റിലെ ഇന്ത്യന്‍ എംബസി പത്രക്കുറിപ്പില്‍ അറിയിച്ചു. കാലാവധി പൂര്‍ത്തിയായതോ, അവസാനിക്കാറായതോ ആയ പാസ്‌പോര്‍ട്ടുകള്‍ പുതിയ അപേക്ഷകള്‍, പേജുകള്‍ തീര്‍ന്നതിനാലുള്ള പുതിയ അപേക്ഷകള്‍, കേടുവന്നതിനാലോ നഷ്ടപ്പെട്ടുപോയതിനാലോ ഉള്ള പുതിയ അപേക്ഷകള്‍ എന്നിവയാണ് ഈ സേവനത്തിന്റെ ഭാഗമായി ഉള്‍പ്പെടുന്നത്.

അത്യാവശ്യഘട്ടങ്ങളിലുള്ള ഇത്തരം പുതിയ അപേക്ഷകള്‍ എംബസിയിലെ കൗണ്‍സിലര്‍ വിഭാഗത്തില്‍ സ്വീകരിക്കും. ആറ് മുതല്‍ എട്ടുമണിക്കൂറിനുള്ളില്‍ പുതിയ പാസ്‌പോര്‍ട്ടുകള്‍ ലഭ്യമാക്കും. തല്‍ക്കാല്‍ സേവനത്തിന് ഫീസിനത്തില്‍ 46 ദിനാര്‍ അധികം നല്‍കണം.തല്‍ക്കാല്‍ സേവനപ്രകാരമുള്ള പുതിയ പാസ്‌പോര്‍ട്ട് അപേക്ഷകര്‍ക്കുള്ള ഫീസുകള്‍ ഇപ്രകാരമാണ്. 36 പേജുകളുള്ള സാധാരണ പാസ്‌പോര്‍ട്ടിന് 69.5 ദിനാറും, 60 പേജുകളുള്ള ജമ്പോ പാസ്‌പോര്‍ട്ടിന് 77.5 ദിനാറും, നഷ്ടപ്പെട്ടു പോയതിനാലോ കേടുവന്നതിനാലോ ഉള്ള സാധാരണ പാസ്‌പോര്‍ട്ട് അപേക്ഷകള്‍ക്ക് 92.5 ദിനാറും, ജമ്പോ പാസ്‌പോര്‍ട്ടിന് 100.5 ദിനാറുമാണ് ഫീസ്.

തല്‍ക്കാല്‍ പാസ്‌പോര്‍ട്ട് സേവനത്തെക്കുറിച്ചും അടിയന്തിര വിസയേക്കുറിച്ചുമുള്ള അന്വേഷണങ്ങള്‍ക്ക് : 22530600 (എക്സ്റ്റന്‍ഷന്‍:279) , 97229948 (കൗണ്‍സിലര്‍ ഫസ്റ്റ് സെക്രട്ടറി കെ കെ പഹേല്‍) എന്നീ നമ്പരുകളില്‍ ബന്ധപ്പെടാം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha