യൂറോപ്യന്‍ സന്ദര്‍ശനം പൂര്‍ത്തിയാക്കിയ മുഖ്യമന്ത്രി പിണറായി വിജയന്‍ ഇന്ന് ദുബായില്‍ എത്തും. രണ്ടു ദിവസമാണ് മുഖ്യമന്ത്രി ഇവിടെ ചിലവഴിക്കുക. ഔദ്യോഗിക പരിപാടികളുടെ ഭാഗമായല്ല അദ്ദേഹം ദുബൈയില്‍ എത്തുന്നത്.

ലണ്ടനില്‍ നിന്ന് എമിറേറ്റ്സ് വിമാനത്തില്‍ ദുബായിലെത്തുന്ന മുഖ്യമന്ത്രി ഗ്രാന്‍ഡ് ഹയാത്ത് ഹോട്ടലിലാണ് താമസിക്കുക. വിദേശ പര്യടനത്തിനു ശേഷം 12നു മടങ്ങി എത്തുമെന്നാണു നേരത്തേ പറഞ്ഞിരുന്നതെങ്കിലും പിന്നീടു ദുബായ് സന്ദര്‍ശനം കൂടി ഉള്‍പ്പെടുത്തുകയായിരുന്നു.

അതേസമയം മുഖ്യമന്ത്രിക്ക് ഒപ്പമുണ്ടായിരുന്ന മന്ത്രിമാരും ഉദ്യോഗസ്ഥരും നേരിട്ടു കേരളത്തിലേക്ക് എത്തും. കൂടാതെ നാളെ വൈകുന്നേരം നടക്കാനിരിക്കുന്ന മന്ത്രിസഭാ യോഗം ഓണ്‍ലൈനായി നടക്കും.

ദുബായില്‍ നിന്ന് ഓണ്‍ലൈനായി മുഖ്യമന്ത്രി യോഗത്തില്‍ പങ്കെടുക്കും. ഒക്ടോബര്‍ ഒന്നുമുതല്‍ ഫിന്‍ലന്‍ഡ്, നോര്‍വേ, യുകെ എന്നീ രാജ്യങ്ങള്‍ സന്ദര്‍ശിക്കാനാണു മുഖ്യമന്ത്രിയും സംഘവും തീരുമാനിച്ചിരുന്നത്.




എന്നാല്‍ കോടിയേരി ബാലകൃഷ്ണന്റെ നിര്യാണത്തെ തുടര്‍ന്നു ഫിന്‍ലന്‍ഡ് ഒഴിവാക്കി മറ്റു രാജ്യങ്ങളാണു സന്ദര്‍ശിച്ചത്.മന്ത്രിമാരായ പി.രാജീവ്, വി.അബ്ദുറഹ്മാന്‍, വീണാ ജോര്‍ജ്, വി.ശിവന്‍കുട്ടി, ചീഫ് സെക്രട്ടറി വി.പി.ജോയ്, വകുപ്പു സെക്രട്ടറിമാര്‍ തുടങ്ങിയവര്‍ വിവിധ ഘട്ടങ്ങളില്‍ മുഖ്യമന്ത്രിയോടൊപ്പം വിദേശ സന്ദര്‍ശനത്തില്‍ പങ്കെടുത്തിട്ടുണ്ടായിരുന്നു.