കരുവാറ്റയില്‍ അറുപത്തിയേഴുകാരനെ കൊലപ്പെടുത്തി പണവും സ്വര്‍ണവും മോഷ്ടിച്ചത് സംഭവത്തില്‍ ആഴ്ചകള്‍ നീണ്ട ആസൂത്രണമെന്ന് പൊലീസ്. കൊല്ലം പരവൂര്‍ സ്വദേശികളും 16–18 പ്രായപരിധിയില്‍ വരുന്നതുമായ 3 കൗമാരക്കാര്‍ അതിക്രൂരമായാണു കൊല നടത്തിയത്.പതിമൂന്നുകാരിയായ കൊച്ചുമകളാണു സംഭവം ആസൂത്രണം ചെയ്തത്. ഈ കുട്ടിയുടെ അമ്മയും മുത്തശ്ശിയും (കൊല്ലപ്പെട്ടയാളുടെ മകളും ഭാര്യയും) കേസില്‍ പ്രധാന സാക്ഷികളാണ്.

കഴിഞ്ഞ ഓഗസ്റ്റ് 15നായിരുന്നു കൊലപാതകം. 87 സാക്ഷികള്‍, 98 രേഖകള്‍, 12 തൊണ്ടിമുതലുകള്‍ എന്നിവയാണ് കേസിലുള്ളത്. കുറ്റാരോപിതരായ കൗമാരക്കാര്‍ ഹരിപ്പാട് റെയില്‍വേ സ്‌റ്റേഷനില്‍ ഇറങ്ങി കൊലപാതകം നടന്ന വീട്ടിലേക്ക് എത്തുന്നതും കൃത്യത്തിനു ശേഷം മടങ്ങുന്നതുമായ 6 സിസിടിവി ദൃശ്യങ്ങള്‍ പ്രധാന തെളിവാണ്. ഇവരെ പിടികൂടി 82–ാമത്തെ ദിവസമാണ് ഹരിപ്പാട് ഇന്‍സ്‌പെക്ടര്‍ ബി.വിനോദ്കുമാറിന്റെ നേതൃത്വത്തിലുള്ള അന്വേഷണ സംഘം കുറ്റപത്രം സമര്‍പ്പിച്ചത്. ഈ 3 പേരെയും മുതിര്‍ന്നവരായി കണക്കാക്കി വിചാരണ നടത്തണമെന്ന അപേക്ഷയും സമര്‍പ്പിച്ചിട്ടുണ്ട്. ജുവനൈല്‍ ജസ്റ്റിസ് ബോര്‍ഡ് ഇതില്‍ തീരുമാനമെടുക്കും. ഒരു കൊലക്കേസിലെ എല്ലാ പ്രതികളും 18 വയസ്സില്‍ താഴെയുള്ളവരെന്ന അപൂര്‍വതയും ഈ സംഭവത്തിനുണ്ട്. കൊല്ലപ്പെട്ടയാളുടെ കൊച്ചുമകളും സുഹൃത്തായ കൊല്ലം സ്വദേശിയും തമ്മിലുള്ള സമൂഹമാധ്യമ ചാറ്റാണു കൊലപാതകം ആസൂത്രണം ചെയ്തതിനുള്ള പ്രധാന തെളിവെന്നു കുറ്റപത്രത്തില്‍ പറയുന്നു.